.jpg)
កម្លាំងការពារព្រំដែនកម្ពុជា-ថៃ ខេត្តបាត់ដំបងឃាត់ខ្លួនពលករ ៥៦ នាក់ និងមេខ្យល់ម្នាក់បម្រុងឆ្លងដែនចូលទឹកដីថៃដោយខុសច្បាប់នៅថ្ងៃទី ១៦ តុលា។ រូបថត ទីបញ្ជាការវរសេនាតូចលេខ ៨១៩ ស្រុកកំរៀង-ស្រុកភ្នំព្រឹក
បាត់ដំបងៈ កម្លាំងការពារព្រំដែនកម្ពុជា-ថៃ ខេត្តបាត់ដំបងឃាត់ខ្លួនពលករកម្ពុជា ៥៦ នាក់ និងមេខ្យល់ម្នាក់បម្រុងឆ្លងដែនចូលទឹកដីថៃដោយខុសច្បាប់នៅថ្ងៃទី ១៦ ខែតុលា នៅភូមិអូរក្រូច ឃុំបឹងរាង ស្រុកកំរៀង។
ហ្វេសប៊ុកទីបញ្ជាការវរសេនាតូចលេខ ៨១៩ ស្រុកកំរៀង-ស្រុកភ្នំព្រឹកបញ្ជាក់នៅថ្ងៃទី ១៦ ខែតុលាថា៖ «កម្លាំងយោធាសហការជាមួយទាហានឈុតខ្មៅថៃ ធ្វើការទប់ស្កាត់ពលករលួចឆ្លងដែនដោយមិនស្របច្បាប់ ចូលក្នុងទឹកដីថៃ នៅចំណុចចន្លោះបង្គោលសីមាលេខ 53 និង 54 ភូមិសាស្ត្រភូមិអូរក្រូច ឃាត់ខ្លួនមនុស្សចំនួន ៥៧ នាក់។ ក្រោយពីសួរនាំបានកំណត់មុខសញ្ញាសង្ស័យមេខ្យល់ចំនួន ១ នាក់ ក្នុងចំណោមពលករចំនួន ៥៧ នាក់»។
ក្រោយពីឃាត់ខ្លួន កម្លាំងយោធាបានធ្វើកំណត់ហេតុ និងប្រគល់អ្នកទាំង ៥៧ នាក់នេះទៅឱ្យកម្លាំងអធិការដ្ឋាននគរបាលស្រុកកំរៀង ដើម្បីអនុវត្តតាមនីតិវិធីច្បាប់បន្ត៕
