សត្វអណ្តើកជាង ១៣០ ក្បាល រួមទាំងប្រភេទសត្វដែលត្រូវបានរងការគំរាមកំហែង ត្រូវបានក្រុមជួយសង្គ្រោះសត្វព្រៃបន្ទាន់បានជួយសង្គ្រោះ។ Wildlife Alliance Cambodia
សត្វអណ្តើកជាង ១៣០ ក្បាល រួមទាំងប្រភេទសត្វដែលត្រូវបានរងការគំរាមកំហែង ត្រូវបានក្រុមជួយសង្គ្រោះសត្វព្រៃបន្ទាន់បានជួយសង្គ្រោះ ក្នុងរយៈពេល ៩ ខែដើមឆ្នាំ ២០២១ នេះ និងបានធ្វើការដោះលែងក្នុងព្រៃវិញ។
យោងតាមអង្គការសម្ព័ន្ធមិត្តសត្វព្រៃ (Wildlife Alliance Cambodia) បានឱ្យដឹងថា ក្នុងរយៈពេល ៩ ខែដំបូងនៃឆ្នាំនេះ ក្រុមជួយសង្គ្រោះសត្វព្រៃបន្ទាន់បានជួយសង្គ្រោះសត្វអណ្តើកជាង ១៣០ ក្បាលរួមទាំងប្រភេទសត្វដែលត្រូវបានរងការគំរាមកំហែងផងដែរ។ ក្នុងនោះ ១២៥ ក្បាលត្រូវបានដោះលែង។
អង្គការនេះបានបញ្ជាក់ថា៖ «អណ្តើកចំនួន ១២៥ ក្បាលត្រូវបានសង្គ្រោះពីការជួញដូរសត្វព្រៃខុសច្បាប់ហើយបានវិលត្រឡប់ទៅកាន់ព្រៃវិញ»។
សត្វអណ្តើកនៅកម្ពុជាត្រូវបានការពារដោយច្បាប់ មានន័យថាវាជាការខុសច្បាប់ក្នុងការបរបាញ់ ចាប់យកធ្វើជាកម្មសិទ្ធិ និងជួញដូរ។
ដោយឡែក ទាក់ទងនឹងអណ្តើកហ្លួង ឬអណ្តើកសរសៃ ដែលជាប្រភេទឧរង្គសត្វ ដែលត្រូវបានចាត់ទុកជានិមិត្តរូបតំណាងឱ្យសត្វប្រចាំប្រទេសកម្ពុជា បច្ចុប្បន្នមានចំនួនជាង ៤៥០ ក្បាលបានស្ថិតក្នុងការចិញ្ចឹមក្នុងមជ្ឈមណ្ឌលសង្គ្រោះ និងអភិរក្សសត្វល្មូនក្នុងស្រុកស្រែអំបិល។
លោក នេត្រ ភក្ត្រា អ្នកនាំពាក្យក្រសួងបរិស្ថានបានលើកឡើងកាលពីថ្ងៃទី ២០ ខែតុលាថា ពូជអណ្តើកហ្លួង ឬអណ្តើកសរសៃនេះ ស្ថិតក្នុងវ័យជំទង់ចំនួន ៨៦ ក្បាលទៀតត្រូវបានលែងឱ្យទៅរស់នៅតាមបែបធម្មជាតិ។
លោកថា៖ «អណ្តើកពេញវ័យជាច្រើនទៀតនឹងត្រូវលែងចូលក្នុងតំបន់ធម្មជាតិ។ អណ្តើកហ្លួងជាប្រភេទសត្វល្មូនដែលស្ថិតក្នុងបញ្ជីក្រហមរបស់អង្គការសហភាពអន្តរជាតិ ដើម្បីការអភិរក្សធម្មជាតិហៅកាត់ (IUCN) ជាប្រភេទរងគ្រោះថ្នាក់ជិតផុតពូជក្នុងចំណោមអណ្តើកទាំង ២៥ ប្រភេទដែលកំពុងរងគ្រោះថ្នាក់ខ្លាំងជាងគេនៅលើពិភពលោក»។
លោក នេត្រ ភក្ត្រា បានបន្ថែមថា អណ្តើកហ្លួងត្រូវបានគេជឿថាបាត់ពូជ តែនៅអំឡុងឆ្នាំ ២០០០ មន្ត្រីជំនាញ និងអង្គការ WCS បានរកឃើញវត្តមានឡើងវិញ។
អណ្ដើកប្រភេទកម្រនេះត្រូវបានរងការគំរាមកំហែងដោយការកាប់បំផ្លាញព្រៃលិចទឹក ការនេសាទខុសច្បាប់ដូចជា ការប្រើប្រាស់ឧបករណ៍ឆក់ត្រី ការដាក់សន្ទូច ឧបករណ៍ហាមឃាត់នានាការនេសាទក្នុងតំបន់ហាមឃាត់ជាដើមដែលធ្វើឱ្យចំនួនអណ្ដើកហ្លួងកាន់តែថយចុះយ៉ាងខ្លាំងដែលអាចឈានដល់ផុតពូជនាពេលខាងមុខបើមិនមានការការពារត្រឹមត្រូវ៕
វីដេអូ៖
