កុមារឈ្មោះ គង់ សីហា ដែលដាក់កាតចាក់វ៉ាក់សាំងកូវីដក្នុងថង់ចងជាប់នឹងអាវ។ រូប SPM
ភ្នំពេញៈ ប្រមុខរាជរដ្ឋាភិបាលកម្ពុជាស្នើឱ្យក្រសួងអប់រំ យុវជន និងកីឡា អភិបាលរាជធានី-ខេត្ត ព្រមទាំងមន្ត្រីអប់រំ អនុញ្ញាតឱ្យសិស្សានុសិស្ស និងកុមារប្រើប្រាស់កាត ឬបណ្ណចាក់វ៉ាក់សាំងកូវីដ ១៩ ប្រភេទថតចម្លង ដោយជំនួសនូវការប្រើប្រាស់កាតដើម សម្រាប់ការបង្ហាញនៅតាមសាលារៀន គ្រឹះស្ថានសិក្សានានា ដើម្បីចៀសវាងនូវការខូច ឬបាត់បណ្ណចាក់វ៉ាក់សាំងដើម។
លោកនាយករដ្ឋមន្ត្រី ហ៊ុន សែន លើកឡើងដូចនេះ តាមរយៈសារសំឡេង នាថ្ងៃទី ២ វិច្ឆិកា ដោយលោកបញ្ជាក់ថាកុមារា កុមារី បានប្រើប្រាស់កាតចាក់វ៉ាក់សាំងសម្រាប់បង្ហាញនៅពេលចូលរៀន។ លោកបញ្ជាក់ថា ប្រសិនបើឱ្យមានការប្រើប្រាស់នូវច្បាប់ដើមសម្រាប់ការពាក់ចូលរៀនដូចនេះអាចនឹងត្រូវខូចខាត ឬបាត់កាត ឬបណ្ណចាក់វ៉ាក់សាំងនេះ។
លោកថ្លែងថា៖ «ម្យ៉ាងទៀត កុមារាកុមារី មានការខ្វះខាតនូវការថែទាំ ហើយប្រសិនបើមានមេឃភ្លៀងទៀតនោះនឹងកាន់តែមានការលំបាក។ ក្នុងន័យនេះ ខ្ញុំសុំស្នើឱ្យមានការពិចារណា។ បន្ទាប់ពីនេះទៅគប្បីប្រើប្រាស់នូវបណ្ណថតចម្លង ហើយរក្សាបណ្ណដើមទុកនៅឯផ្ទះ ហើយបណ្ណថតចម្លងនេះសម្រាប់ប្រើប្រាស់ក្នុងពេលសិស្សទៅរៀន»។
លោក ហ៊ុន សែន បន្ថែមថា៖ «ការធ្វើបែបនេះ គឺដើម្បីចៀសវាងនូវការខូចខាតបណ្ណ ឬបាត់បណ្ណដើម។ ដូចនេះខ្ញុំសុំស្នើឱ្យឯកឧត្តមរដ្ឋមន្ត្រីក្រសួងអប់រំ យុវជន និងកីឡា ក៏ដូចជាអភិបាលខេត្ត រាជធានី ធ្វើការពិនិត្យ និងខិតខំដោះស្រាយបញ្ហានេះ ដោយយើងអាចធ្វើការថតចម្លងកាតចាក់វ៉ាក់សាំងជាសខ្មៅ ឬជាពណ៌»។
លោកថា ប្រសិនបើក្រុមគ្រួសារមិនមានលទ្ធភាពថតចម្លងបណ្ណ ឬកាតចាក់វ៉ាក់សាំងនេះទេ សាលាត្រូវជួយសម្រួលក្នុងថតចម្លង។
លោកនាយករដ្ឋមន្ត្រីបានស្នើឱ្យមានការប្រើកាតចាក់វ៉ាក់សាំងថតចម្លងនេះ បន្ទាប់ពីលោកបានឃើញរូបភាពកូនសិស្ស ១ រូបដែលបានដាក់កាតចាក់វ៉ាក់សាំងរបស់ខ្លួនក្នុងថង់ និងចងជាប់ជាមួយនឹងអាវរបស់គាត់។
លោកសរសេរលើហ្វេសប៊ុករបស់លោកនាព្រឹកថ្ងៃទី ២ វិច្ឆិកាថា៖ «ទោះជារូបភាព ១ សន្លឹកនេះខ្ញុំមិនដឹងថា នៅទីណា និងចៅតូចនេះឈ្មោះអី អាយុប៉ុន្មាន តែខ្ញុំពិតជាមានមោទនភាពចំពោះចៅៗដែលចង់រៀនសូត្រ។ បណ្ណចាក់វ៉ាក់សាំងពាក់នៅក បង្ហាញថា ខ្ញុំបានចាក់វ៉ាក់សាំងរួចហើយ និងចូលរៀនដោយគ្មានការភ័យខ្លាចជាមួយនឹងការពាក់ម៉ាស់បានត្រឹមត្រូវ»។
លោក ហ៊ុន សែន បន្ថែមថា៖ «ទោះចៅមិនមានស្បែកជើងពាក់តែ តាជឿថា ចៅច្បាស់ជាលាងដៃ និងរក្សាអនាម័យបានល្អ»។
ជាមួយគ្នានេះ លោកនាយករដ្ឋមន្ត្រីក៏បានប្រាប់ទៅក្រសួងសុខាភិបាល គណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស និងក្រសួងការពារជាតិត្រូវខិតខំធ្វើកាតចាក់វ៉ាក់សាំង និងដាក់ឈ្មោះឱ្យបានត្រឹមត្រូវ ពិសេសផ្នែកភាសាអង់គ្លេស ដោយសារប្រជាពលរដ្ឋខ្មែរត្រូវធ្វើដំណើរទៅក្រៅប្រទេស។
លោកថា៖ «ក្នុងករណីមានការដាក់ឈ្មោះមិនត្រឹមត្រូវជាមួយនឹងលិខិតឆ្លងដែនគឺមិនអាចធ្វើដំណើរចេញទៅក្រៅប្រទេសបានទេ។ ដូចនេះសុំយកចិត្តទុកដាក់ទៅលើការដាក់ឈ្មោះឱ្យបានត្រឹមត្រូវទាំងភាសាខ្មែរ និងអង់គ្លេស»។
លោក ហ៊ុន សែន បានបង្ហោះរូបថតកុមារា ១ រូបដែលគេស្គាល់ថា ឈ្មោះ គង់ សីហា អាយុ ៧ ឆ្នាំ រស់នៅភូមិត្មាតពង ឃុំរុនតាឯក ស្រុកបន្ទាយស្រី រៀននៅថ្នាក់ទី ១ នៅសាលាបឋមសិក្សាជ័យ។ អ្វីដែលទាក់ទាញលើរូបកុមារានេះគឺគាត់បានដាក់កាតចាក់វ៉ាក់សាំងក្នុងស្បោងហើយបានចងស្បោងនេះជាប់នឹងកអាវរបស់គាត់ និងមិនមានស្បែកជើងពាក់ឡើយ។
ទន្ទឹមនឹងនេះ បន្ទាប់ពីរូបនេះត្រូវបានផ្សព្វផ្សាយតាមបណ្តាញសង្គមមានសប្បុរសជនជាច្រើនបានប្រកាសផ្តល់ថវិកាក៏ដូចជាសម្ភារសិក្សាដល់កុមារនេះ។ លោក ជា ច័ន្ទបរិបូណ៍ រដ្ឋលេខាធិការក្រសួងព័ត៌មានក៏បានផ្តល់ថវិកា និងអំណោយផងដែរដល់កុមារនេះ។
លោកថ្លែងថា៖ «អ៊ំសុំជូនក្មួយ ៤០ ម៉ឺនរៀលដែលជាប្រាក់ខែរបស់អ៊ំ សម្រាប់ក្មួយទិញស្បែកជើង និងសម្លៀកបំពាក់ទៅសាលា»។
ចំណែកអង្គការពុទ្ធសាសនាដើម្បីការអប់រំនៃកម្ពុជា (ព.អ.ក.) ដែលដឹកនាំដោយព្រះតេជព្រះគុណ ប្រធាន ហាក់ សៀងហៃ នឹងចុះជួបជាមួយកុមារា គង់ សីហា ដោយ នាំយកសម្ភារសិក្សា និងឧបករណ៍ ដូចជា កង់ កាបូប សម្លៀកបំពាក់ សម្ភារផ្គត់ផ្គង់គ្រួសារ ព្រមទាំងចែកសម្ភារសិក្សាដល់សិស្សានុសិស្សជិត ៣០០ នាក់ផងដែរ នៅថ្ងៃទី ៣ ខែវិច្ឆិកានេះ។
ដូចគ្នានេះថ្នាក់ដឹកនាំខេត្តសៀមរាបនឹងយកអំណោយរបស់ប្រមុខរាជរដ្ឋាភិបាលប្រគល់ជូនកុមារា គង់ សីហា នៅថ្ងៃទី ៣ ខែវិច្ឆិកា ឆ្នាំ ២០២១ នេះ។
កាលពីថ្ងៃទី ១៧ តុលា សាលារាជធានីភ្នំពេញបានលើកលែងនូវកាតព្វកិច្ចបង្ហាញបណ្ណចាក់វ៉ាក់សាំងបង្ការជំងឺកូវីដ ១៩ ឬលិខិតបញ្ជាក់ការចាក់វ៉ាក់សាំងចំពោះ កុមារ និងយុវវ័យមានអាយុក្រោម ១៨ ឆ្នាំពេលចេញ-ចូលគ្រឹះស្ថានសិក្សាសាធារណៈ និងឯកជនក្នុងរាជធានីភ្នំពេញដោយសារក្រុមនេះ មិនមែនជាក្រុមហានិភ័យនៃការចម្លងវីរុសកូវីដ ១៩ ឡើយ។
ដោយឡែកស្ថានឯកអគ្គរាជទូតកម្ពុជាប្រចាំអូស្ត្រាលីនៅថ្ងៃទី ២ ខែវិច្ឆិកា បានជូនដំណឹងថា រដ្ឋាភិបាលអូស្ត្រាលីបានទទួលស្គាល់វ៉ាក់សាំងចិនប្រភេទស៊ីណូហ្វាមបន្ថែមលើការទទួលស្គាល់វ៉ាក់សាំងចិនប្រភេទស៊ីណូវ៉ាក់ក្នុងការអនុញ្ញាតឱ្យអ្នកដំណើរចូលមកអូស្ត្រាលីដោយពុំធ្វើចត្តាឡីស័ក បន្ទាប់ពីចាក់បានពេញលេញរួចរាល់ចំនួន ២ ដូស។
ស្ថានឯកអគ្គរាជទូតកម្ពុជាប្រចាំអូស្ត្រាលីបន្ថែមថា ដើម្បីចៀសវាងការខកជើងយន្តហោះ ឬការពន្យារពេលទាក់ទងនឹងកាត ឬបណ្ណ ឬលិខិតឆ្លងដែនវ៉ាក់សាំង (Vaccination Certificate/ Vaccine Passport/ Vaccination Card) សម្រាប់ការធ្វើដំណើរ ត្រូវសួរបញ្ជាក់ និងផ្តល់ព័ត៌មានពិស្តារអំពីកាតចាក់វ៉ាក់សាំងនៅក្នុងស្រុកជាមួយក្រុមហ៊ុនលក់សំបុត្រយន្តហោះ ដើម្បីក្រុមហ៊ុននោះសួរបញ្ជាក់ និងសុំការសម្រេចពីអាជ្ញាធរពាក់ព័ន្ធរបស់អូស្ត្រាលីជាមុន។
ស្ថានទូតបញ្ជាក់ថា៖ «ជាមួយគ្នានេះ សម្រាប់បងប្អូនពលរដ្ឋខ្មែរ ឬបរទេសដែលចង់ទៅកម្ពុជា ក្នុងករណីបានចាក់វ៉ាក់សាំងបានពេញលេញហើយ (ចំនួន ២ ដូស) ការធ្វើចត្តាឡីស័កនឹងត្រូវកំណត់ត្រឹមចំនួន ៧ ថ្ងៃ»។
រដ្ឋាភិបាលអូស្ត្រាលីចាប់ពីថ្ងៃទី ១ វិច្ឆិកា ឆ្នាំ ២០២១ បានបើកព្រំដែនអន្តរជាតិ ជំហានដំបូង ដោយអនុវត្តនៅរដ្ឋចំនួន ២ គឺ រដ្ឋ New South Wales និង Victoria។ រីឯការធ្វើដំណើរចូលមកតាមរដ្ឋផ្សេងៗតម្រូវឱ្យធ្វើចត្តាឡីស័ក ១៤ ថ្ងៃដដែល ទោះបានចាក់វ៉ាក់សាំង ២ ដូសរួចហើយក៏ដោយ។
បច្ចុប្បន្នប្រភេទវ៉ាក់សាំងដែលទទួលស្គាល់ពីរដ្ឋាភិបាល អូស្ត្រាលី មាន AstraZeneca VaXZevria, AstraZeneca COVISHIELD (India), Pfizer/Biontech Comirnaty, Moderna Spikevax, Janssen-Cilag COVID Vaccine, Sinovac Coronavac និង Sinopharm៕
វីដេអូ៖
