គ្រូពេទ្យយកសំណាកបុរសម្នាក់ក្នុងខណ្ឌដូនពេញ កាលពីថ្ងៃទី ១៤ កញ្ញា។ ហុង មិនា
ភ្នំពេញៈ កម្ពុជាបានបន្តរកឃើញអ្នកឆ្លងវីរុសកូវីដ ១៩ បន្ថែមទៀត ចំនួនជិត ៩០ នាក់ និងមានអ្នកជាសះស្បើយជិត ១០០ នាក់ ខណៈអ្នកស្លាប់ដោយសារជំងឺកូវីដ ១៩មានចំនួន ៧ នាក់ ដោយក្នុងនោះមាន ៥ នាក់ មិនបានចាក់វ៉ាក់សាំងបង្ការកូវីដ ១៩ ឡើយ។
យោងតាមប្រកាសរបស់ក្រសួងសុខាភិបាលនៅថ្ងៃទី ៣ ខែ វិច្ឆិកា ឆ្នាំ ២០២១ នេះ មនុស្សចំនួន ៨៥ (PCR) នាក់ទៀត បានរកឃើញមានឆ្លងវីរុសកូវីដ ១៩ និងមានអ្នកជាសះស្បើយបន្ថែមចំនួន ៩៤ នាក់។ ករណីរកឃើញឆ្លងថ្មីមានករណីឆ្លងសហគមន៍ចំនួន ៧៦ នាក់ និងអ្នកដំណើរពីបរទេសចំនួន ៩ នាក់។
គិតត្រឹមព្រឹកថ្ងៃទី ៣ ខែ វិច្ឆិកា ឆ្នាំ ២០២១ កម្ពុជាមានអ្នកឆ្លងវីរុសកូវីដ ១៩ សរុបទូទាំងប្រទេសចំនួន ១១៨ ៧៨៧ នាក់ អ្នកជាសះស្បើយសរុបចំនួន ១១៥ ១១១ នាក់ និងអ្នកស្លាប់សរុបបានកើនឡើងដល់ចំនួន ២ ៨០៧ នាក់ ៕
