ក្រុមអ្នកតវ៉ាបង្ហាញផែនទីផ្លូវដែលប៉ះពាល់ផ្ទះពួកគេ។ រូបថត រ៉ាស់ហ៊ីម
ភ្នំពេញៈ ប្រជាពលរដ្ឋប្រមាណ ៣០ នាក់បានប្រមូលផ្ដុំគ្នានៅមុខសាលារាជធានីភ្នំពេញ កាលពីថ្ងៃទី ១៦ ខែវិច្ឆិកា ទាមទាររកដំណោះស្រាយដីធ្លីពីគម្រោងសាងសង់ផ្លូវឈ្មោះសម្ដេច ហ៊ុន នាង ដែលតភ្ជាប់ពីផ្លូវ ៦០ ម៉ែត្រ (ផ្លូវសម្ដេចតេជោ ហ៊ុន សែន) មកផ្លូវ ៣៧១ ដែលបានប៉ះពាល់ទៅលើខ្នងផ្ទះរបស់ពួកគេជាង ១០ គ្រួសារ ដោយមិនទាន់មានសំណងច្បាស់លាស់។ គ្រួសារទាំងនោះ ស្ថិតនៅក្នុងប្រជាសហគមន៍ព្រែកតាគង់ ១ ភូមិព្រែកតាគង់ ១ សង្កាត់ចាក់អង្រែលើ ខណ្ឌមានជ័យបានដាក់ញត្តិទៅលោក ឃួង ស្រេង អភិបាលរាជធានីភ្នំពេញ ដើម្បីទាមទារស្នើសុំដំណោះស្រាយដីធ្លី ដោយពួកគេបាត់ឈ្មោះពីបញ្ជីចុះឈ្មោះដីធ្លីជាប្រព័ន្ធ។
លោក គង់ ស៊ីថន អ្នកចូលរួមតវ៉ាម្នាក់បានអះអាងប្រាប់ភ្នំពេញប៉ុស្តិ៍ថា ពួកគេ បានរស់នៅលើដីនេះជាយូរឆ្នាំមកហើយ ព្រមទាំងមានបង្កាន់ដៃក្បាលដីក្នុងការទទួលបានកម្មសិទ្ធិដីធ្លីប្រទានកម្មរបស់លោកនាយករដ្ឋមន្ត្រី ហ៊ុន សែន។ ប៉ុន្តែនៅពេលគណៈកម្មការបិទផ្សាយទិន្នន័យជាសាធារណៈនូវឯកសារនៃការវិនិច្ឆ័យវាស់វែងដីជាលក្ខណៈជាប្រព័ន្ធ ស្រាប់តែពុំមានលេខក្បាលដីរបស់គេទៅវិញដែលដីរបស់ពួកគេស្ថិតក្នុងគម្រោងផ្លូវ ៣០ ម៉ែត្រ។
អ្នកស្រី វាំង សំណាប់ អ្នកតវ៉ាម្នាក់ទៀតថ្លែងថាសំណើរបស់ពួកគាត់គឺសុំឱ្យមានការដោះដូរដីឱ្យនៅផ្លូវហ្នឹងវិញ បើសិនជាគម្រោងអភិវឌ្ឍន៍នេះ ពិតប្រាកដ តែបើសិនជាគម្រោងនេះ មិនពិតប្រាកដទេ គឺស្នើឱ្យផ្តល់សិទ្ធិស្របច្បាប់លើទីតាំងដីដែលពួកគេបានរស់នៅមក។
លោក ម៉េត មាសភក្តី អ្នកនាំពាក្យសាលារាជធានីភ្នំពេញបានប្រាប់ភ្នំពេញប៉ុស្តិ៍ថា សាលារាជធានីបានទទួលញតិ្តរបស់ពលរដ្ឋហើយៗថ្នាក់ដឹកនាំសាលារាជធានីនឹងបើកកិច្ចប្រជុំ ដើម្បីពិនិត្យលើសំណើរបស់ពលរដ្ឋនៅសប្តាហ៍ក្រោយដើម្បីពិនិត្យលើគម្រោងផលប៉ះពាល់នេះ៕
វីដេអូ៖
