លោក នុត សវនា អ្នកនាំពាក្យនៃអគ្គនាយកដ្ឋានពន្ធនាគារក្រសួងមហាផ្ទៃ ថ្លែងនាពេលកន្លងទៅ។ រូបថត ក្រសួងមហាផ្
ភ្នំពេញៈ បន្ទាប់ពីមានការរិះគន់និងចោទប្រកាន់របស់អតីតអ្នកជាប់ឃុំជាសកម្មជននយោបាយ សកម្មជនការពារសិទ្ធិមនុស្ស សង្គម និងបរិស្ថាន តាមបណ្តាញសារព័ត៌មាន មន្ត្រីនៃអគ្គនាយកដ្ឋានពន្ធនាគារនៃក្រសួងមហាផ្ទៃបានបដិសេធដោយបានបញ្ជាក់ថា ពន្ធនាគារ គឺជាទីកន្លែងឃុំឃាំងមនុស្សឱ្យកែប្រែជាពលរដ្ឋល្អ មិនមែនជាទីកន្លែងរស់នៅសុខស្រួលមានអាហារឆ្ងាញ់ៗ ដូចនៅខាងក្រៅឡើយ។
លោក នុត សវនា អ្នកនាំពាក្យនៃអគ្គនាយកដ្ឋានពន្ធនាគារក្រសួងមហាផ្ទៃបានឱ្យដឹងតាមរយៈសេចក្តីថ្លែងការណ៍នៅថ្ងៃទី ១៦ ខែវិច្ឆិកាថា អតីតជនជាប់ឃុំមួយចំនួនដែលតុលាការទើបបានដោះលែងពីពន្ធនាគារថ្មីៗនេះបានលើកឡើងប្រកបដោយចេតនាមិនស្មោះត្រង់ឆ្លៀតឱកាសកេងចំណេញនយោបាយដោយចោទមកលើពន្ធនាគារ ដែលលោកបានបដិសេធ និងច្រានចោលទាំងស្រុង។
ចំណុចដែលអតីតអ្នកជាប់ឃុំទាំងនោះបានលើកឡើងមានដូចជា បញ្ហាចង្អៀតណែនក្នុងពន្ធនាគារ និងកង្វះទឹកស្អាត, ការព្រមាន និងគំរាមសម្លាប់ដោយមន្ត្រី, បញ្ហាខ្វះខាតក្នុងការផ្គត់ផ្គង់ថ្នាំសង្កូវ និងសេវាគាំពារសុខភាព និងបញ្ហាអំពើពុករលួយជាដើម។
លោក នុត សវនា បានលើកឡើងថា ការចង្អៀតណែនក្នុងពន្ធនាគារ មិនមែនជារឿងថ្មីសម្រាប់កម្ពុជា ឬបណ្តាប្រទេសជាច្រើននៅលើសកលលោកឡើយ។ អាជ្ញាធរពន្ធនាគារកម្ពុជាតែងខិតខំដោះស្រាយបញ្ហានេះជាមួយស្ថាប័នពាក់ព័ន្ធ និងដៃគូអភិវឌ្ឍន៍នានា។
លោកថា៖ «ជាលទ្ធផលភាពចង្អៀតណែនក្នុងមណ្ឌលអប់រំកែប្រែ និងពន្ធនាគារ ជាពិសេសក្នុងរាជធានីភ្នំពេញ ត្រូវបានកាត់បន្ថយជាបន្តបន្ទាប់ចាប់តាំងពីឆ្នាំ ២០២០ ឈានមកឆ្នាំ ២០២១ នេះ តាមរយៈការអនុវត្តគោលនយោបាយ កំណែទម្រង់ ពន្ធនាគារ គួបផ្សំនឹងប្រសិទ្ធភាពនៃយុទ្ធនាការពន្លឿនសំណុំរឿងនៅតុលាការរបស់ក្រសួងយុត្តិធម៌»។
អ្នកនាំពាក្យរូបនេះបានបន្តថា ជាក់ស្តែងចំនួនជនជាប់ឃុំនៅមណ្ឌលអប់រំកែប្រែទី១ បានថយចុះក្នុងខែវិច្ឆិកា ឆ្នាំ ២០២០ ពី ៩ ៤១២ នាក់ មកនៅត្រឹម ៧ ៧០០ នាក់ (ថយចុះ ១៩%) និងនៅខែវិច្ឆិកា ឆ្នាំ ២០២១ នេះ បានថយចុះនៅត្រឹម ៦ ៦១៦ នាក់ ( ថយចុះ ១៤%)។
សម្រាប់មណ្ឌលអប់រំកែប្រែទី២ ចំនួនជនជាប់ឃុំបានថយចុះក្នុងខែវិច្ឆិកា ឆ្នាំ ២០២០ ពី ១ ៨៤៨ នាក់ មកនៅត្រឹម ១ ៣៩៩ នាក់ (ថយចុះ ២៤%) និងនៅខែវិច្ឆិកា ឆ្នាំ ២០២១ នេះ ចំនួនជនជាប់ឃុំបានថយចុះមកនៅត្រឹម ១ ១២៦ នាក់ (ថយចុះ ១៩,៥០%)។ ដោយឡែកចំនួនជនជាប់ឃុំសរុបនៅពន្ធនាគាររាជធានី ភ្នំពេញ (PJ) សម្រាប់ខែវិច្ឆិកា ឆ្នាំ ២០២១ នេះក៏មានការធ្លាក់ចុះប្រមាណ ២៩% ធៀបនឹងខែវិច្ឆិកា ឆ្នាំ ២០២០ ពោលគឺបានថយចុះពី ១ ៧៣៨ នាក់ មកនៅត្រឹម ១ ២២៧ នាក់ប៉ុណ្ណោះ។
លោក នុត សវនា បានបន្ថែមទៀតថា ក្នុងពេលដ៏ខ្លីខាងមុខនេះ មជ្ឈមណ្ឌលស្តារនីតិសម្បទាសម្រាប់អនីតិជនប្រព្រឹត្តល្មើសដែលស្ថិតក្រោមការគ្រប់គ្រងរបស់ក្រសួងសង្គមកិច្ច អតីតយុទ្ធជន និងយុវនីតិសម្បទានឹងបើកឱ្យដំណើរការមុនដំណាច់ឆ្នាំ ២០២១ ដែលនឹងរួមចំណែកជួយកាត់បន្ថយចំនួនជនជាប់ឃុំក្នុងពន្ធនាគារទូទាំងប្រទេស យ៉ាងតិចបាន ចំនួន ១ ៤០០នាក់ទៀត។
ពាក់ព័ន្ធនឹងបញ្ហាកង្វះទឹកស្អាតវិញ លោក នុត សវនា បានបញ្ជាក់ដែរថា មណ្ឌលអប់រំកែប្រែទី១ មានជនជាប់ឃុំជិត ១ ម៉ឺន ក្នុងឆ្នាំ ២០១៩ រហូតទើបតែក្នុងឆ្នាំ ២០២១ នេះបានថយចុះមកនៅត្រឹមជាង ៦ ពាន់នាក់។ ដូច្នេះតម្រូវការប្រើប្រាស់ទឹករបស់ជនជាប់ឃុំ បូករួមទាំងមន្ត្រីកំពុងនៅបម្រើការងារផ្ទាល់ រាប់រយនាក់ផង ធ្វើឱ្យបរិមាណទឹកស្អាតសម្រាប់ផ្គត់ផ្គង់នៅមានកម្រិត។
ចំណែកបញ្ហាដែលអតីតជនជាប់ឃុំបានលើកឡើងទាក់ទងនឹងការព្រមាននិងគំរាមសម្លាប់ដោយមន្ត្រីវិញ លោក នុត សវនា បានឱ្យដឹងថា វាជាការចោទប្រកាន់ដែលប្រាសចាកការពិតទាំងស្រុង សបញ្ជាក់ពីគំនិតទុច្ចរិតគ្មានសច្ចធម៌ ក្នុងខ្លួនរបស់បុគ្គល ដែលមិនចេះបែងចែករវាងគុណ និងទោស។
លោកថា ការគ្រប់គ្រងជនជាប់ឃុំគ្រប់រូបត្រូវបានអនុវត្តទៅតាមច្បាប់ស្តីពីពន្ធនាគារ នីតិវិធីពន្ធនាគារ បទបញ្ជាផ្ទៃក្នុងពន្ធនាគារ និងបទដ្ឋានអប្បបរមាអង្គការសហប្រជាជាតិ ដោយមានការធ្វើអធិការកិច្ចយ៉ាងតឹងរ៉ឹងពីសំណាក់ស្ថាប័នអយ្យការជារៀងរាល់ខែ គណៈកម្មាធិការសិទ្ធិមនុស្សកម្ពុជា គណៈកម្មាធិការជាតិប្រឆាំងទារុណកម្ម និងអគ្គាធិការដ្ឋាន ក្រសួងមហាផ្ទៃ ជាប្រចាំផងដែរ។
លោក នុត សវនា បានបញ្ជាក់ថា៖ «ក្នុងនាមជាអ្នកនាំពាក្យ ដែលបានចុះទៅពិនិត្យដោះស្រាយបញ្ហាផ្ទាល់របស់ជនជាប់ឃុំ ខ្ញុំពិតជាមានការភ្ញាក់ផ្អើល នឹកស្មានមិនដល់ និងសោកស្តាយបំផុតចំពោះទង្វើប្រកបដោយល្បិចកលបំភ្លៃការពិតទាំងគ្មានអៀនខ្មាសរបស់អតីតជនជាប់ឃុំ អេង ម៉ាឡៃ ហៅ សូ មេត្តា នេះ»។
ដើម្បីធានាសិទ្ធិស្មើគ្នាចំពោះមុខច្បាប់ ប្រសិនបើមានការគំរាមសម្លាប់ពីសំណាក់មន្ត្រីណាម្នាក់ អ្នកនាំពាក្យនៃអគ្គនាយកដ្ឋានពន្ធនាគារលើកទឹកចិត្តឱ្យអតីតជនជាប់ឃុំកញ្ញា អេង ម៉ាឡៃ ហៅ សូ មេត្តា ប្រញាប់ដាក់ពាក្យបណ្តឹង និងសហការជាមួយសមត្ថកិច្ច ដើម្បីរកយុត្តិធម៌ទាំងអស់គ្នានៅចំពោះមុខច្បាប់។
លោក នុត សវនា បានឱ្យដឹងដែរថា សិទ្ធិជាមូលដ្ឋានអប្បបរមារបស់ជនជាប់ឃុំគ្រប់រូបត្រូវបានគោរព និងធានាការពារ ប៉ុន្តែទោះជាយ៉ាងនេះក្តី អាជ្ញាធរពន្ធនាគារក៏ទទួលស្គាល់ផងដែរថា ពន្ធនាគារ គឺជាទីកន្លែងឃុំឃាំងមនុស្សដើម្បីអនុវត្តទោសព្រហ្មទណ្ឌ និងជាទីកន្លែងអប់រំកែប្រែអ្នកទោស ដើម្បីកែប្រែខ្លួនជាពលរដ្ឋល្អ មិនមែនជាទីកន្លែងរស់នៅសុខស្រួល មានអាហារឆ្ងាញ់ៗ និងមានការផ្តល់សេវាសុខាភិបាលបានប្រសើរដូចនៅក្នុងសហគមន៍នោះទេ៕
វីដេអូ៖
