មន្រ្តីឧទ្យានុរក្សបរិស្ថានចំនួន ១០ រូបទទួលការបណ្ដុះបណ្ដាលពីការប្រើប្រាស់បច្ចេកទេស SMART Mobile ដើម្បីបង្កើនប្រសិទ្ធភាពការងារអភិរក្ស។ រូបថត អង្គការជីវិតសត្វស្លាបអន្តរជាតិប្រចាំនៅកម្ពុជា
រតនគិរី/មណ្ឌលគិរីៈ មន្ត្រីឧទ្យានុរក្សបរិស្ថានចំនួន ១០ រូប នៅដែនជម្រកសត្វព្រៃ លំផាត់ បានទទួលការបណ្តុះបណ្តាលរយៈពេល ២ ថ្ងៃលើការប្រើប្រាស់កម្មវិធី SMART Mobile ដើម្បីពង្រឹងសមត្ថភាព និងគាំទ្រសកម្មភាពល្បាតឱ្យកាន់តែមានប្រសិទ្ធភាពខ្ពស់។
អង្គការជីវិតសត្វស្លាបអន្តរជាតិប្រចាំនៅកម្ពុជា (Bird Life International Cambodia Program) បានលើកឡើងនៅថ្ងៃព្រហស្បតិ៍ ទី១៨ ខែវិច្ឆិកានេះ ថា មន្ត្រីឧទ្យានុរក្ស គឺជាកម្លាំងជួរមុខក្នុងការអភិរក្សនិងការពារធនធានធម្មជាតិ។ ដូចនេះការកសាងសមត្ថភាព ចំណេះដឹង ក៏ដូចជា បច្ចេកវិទ្យាក៏ជាកត្តាដ៏សំខាន់ក្នុងការជំរុញការងាររបស់ពួកគាត់ឱ្យកាន់តែមានប្រសិទ្ធភាពខ្ពស់។
ដោយមើលឃើញពីសារៈសំខាន់ទាំងនេះហើយ ទើបអង្គការនេះបានធ្វើការបណ្ដុះបណ្ដាលអំពី កម្មវិធីកត់ត្រាទិន្នន័យពីការល្បាតតាមទូរស័ព្ទដៃ SMART mobile patrol system ដល់មន្ត្រីឧទ្យានុរក្ស ក្នុងដែនជម្រកសត្វព្រៃលំផាត់ ភូមិសាស្រ្តខេត្តរតនគិរី និងខេត្តមណ្ឌលគិរី ចំនួន ១០ រូប កាលពីថ្ងៃទី០៨ និងទី០៩ ខែវិច្ឆិកា ឆ្នាំ ២០២១។
មន្រ្តីទាំង ១០ នាក់នោះ ត្រូវបានជ្រើសរើសមកពីស្នាក់ការចំនួន ៤ ផ្សេងៗគ្នា។ នៅក្នុងការបណ្តុះបណ្តាលនោះ ក៏មានការប្រគល់ជូនទូរស័ព្ទដៃ (Smart mobile) ចំនួន ១ គ្រឿងដល់ស្នាក់ការនីមួយៗ ដែលសរុបមាន ៤ គ្រឿង ដើម្បីដំឡើងកម្មវិធីកត់ត្រាទិន្នន័យល្បាតតាមទូរស័ព្ទដៃ SMART Mobile Patrol System សម្រាប់ប្រើប្រាស់គាំទ្រដល់ការងារល្បាតអនុវត្តច្បាប់ប្រចាំខែ។
អង្គការជីវិតសត្វស្លាប បានគូសបញ្ជាក់ថា៖ «ជាលទ្ធផល ក្រោយពីបានឆ្លងកាត់វគ្គបណ្ដុះបណ្ដាលអស់រយៈពេលពីរថ្ងៃតាមរយៈសំណួរវាយតម្លៃ និងការចុះអនុវត្តន៍លើទីវាលផ្ទាល់ យើងទទួលបានលទ្ធផលល្អពោលគឺមន្ត្រីឧស្យានុរក្សយើងមានលទ្ធភាពអាចប្រើប្រាស់កម្មវិធីនេះបានគ្រប់ៗគ្នា។ ដូចនេះ កម្មវិធី SMART Mobile នឹងចាប់ផ្ដើមប្រើប្រាស់ក្នុងដែនជម្រកសត្វព្រៃ លំផាត់ ចាប់ពីពាក់កណ្ដាលខែវិច្ឆិកា ឆ្នាំ ២០២១ នេះតទៅ»។
លោក ប៊ូ វរសក្ស នាយកកម្មវិធីនៃអង្គការជីវិតសត្វស្លាបអន្តរជាតិប្រចាំនៅកម្ពុជាបានថ្លែងបន្ថែមនៅថ្ងៃទី១៨ ខែវិច្ឆិកា នេះថា មន្រ្តីឧទ្យានុរក្សបរិស្ថានមានប្រមាណជា ២០ រូប នៅដែនជម្រកសត្វព្រៃលំផាត់នោះ។ ប៉ុន្តែ ដោយសារតែបញ្ហាជំងឺកូវីដ១៩ ទើបអង្គការបានជម្រើសរើសតែតំណាងៗចំនួន ១០ រូបឱ្យចូលរួមក្នុងវគ្គបណ្តុះបណ្តាលដ៏មានសារៈសំខាន់មួយនេះ។
លោកបានបញ្ជាក់ថា៖ «កម្មវិធីហ្នឹងគាំទ្រដល់ការងារល្បាតរបស់គាត់ឱ្យបញ្ចូលទិន្នន័យបានស្រួល។ ពេលបញ្ចូលនៅទូរស័ព្ទហ្នឹង វាលោតចូលនៅក្នុងប្រព័ន្ធយើងតែម្តង... កាលពីមុន គាត់ប្រើ GPS និងកត់លើសៀវភៅ។ [កម្មវិធីនេះ] វាលឿនជាងមុន ហើយវាចេញជារបាយការណ៍លឿនជាងមុន។ វាចំណេញពេល។ វាមានប្រសិទ្ធភាពជាងមុន»។
លោកបន្ថែមថា ក្នុងការល្បាតនេះ មន្រ្តីឧទ្យានុរក្សធ្វើកំណត់ត្រា និងបង្រ្កាបបទល្មើសផ្សេងៗ ធ្វើកំណត់ត្រាជីវៈចម្រុះ និងសត្វព្រៃដែលជួបប្រទះជាដើម។
លោក សាយ សំអាល់ រដ្ឋមន្រ្តីក្រសួងបរិស្ថាន កាលពីថ្ងៃពុធ ទី១៧ ខែវិច្ឆិកា ក៏បានសរសរនៅលើហ្វេសប៊ុករបស់លោកផងដែរថា៖ «ការកសាងសមត្ថភាព ចំណេះដឹង ព្រមទាំងបច្ចេកវិទ្យាក៏ជាកត្តាដ៏សំខាន់ក្នុងការជំរុញការងាររបស់មន្រ្តីឧទ្យានុរក្សបរិស្ថានឱ្យកាន់តែមានប្រសិទ្ធភាពខ្ពស់»៕
