សៀមរាបៈ អាជ្ញាធរជាតិអប្សរា បានរៀបចំកែលម្អសោភ័ណភាពបរិស្ថាននៃតូបលក់ដូរ និងចំណតរថយន្តនៅភ្នំបាក់ខែង ដើម្បីទទួលភ្ញៀវទេសចរនៅទីតាំងនេះឱ្យមានសណ្តាប់ធ្នាប់ និងរៀបរយ។
អាជ្ញាធរជាតិអប្សរាបញ្ជាក់ក្នុងហ្វេសប៊ុកនៅថ្ងៃទី ១៨ វិច្ឆិកាថា៖ «អាជ្ញាធរជាតិអប្សរា ចាប់ផ្តើមការងារកែលម្អសោភ័ណភាពបរិស្ថានតូបលក់ដូរ និងចំណតសម្រាប់ទទួលភ្ញៀវទេសចរមុខប្រាសាទភ្នំបាក់ខែងឱ្យមានសណ្តាប់ធ្នាប់របៀបរៀបរយ និងងាយស្រួលក្នុងការមកទស្សនាប្រាសាទភ្នំបាក់ខែង»។
ហ្វេសប៊ុកដដែលបញ្ជាក់ថា អាជ្ញាធរជាតិអប្សរាក៏នឹងរៀបចំបរិស្ថាននៅផ្នែកខាងកើត ដើម្បីលើកកម្ពស់តម្លៃប្រវត្តិសាស្ដ្រប្រាសាទភ្នំបាក់ខែងឡើងវិញផងដែរ។
អាជីវករលក់ដូរនៅទីនោះបានស្ម័គ្រចិត្តប្តូរទៅទីតាំងបណ្តោះអាសន្ន ដើម្បីបន្តលក់ដូរក្នុងពេលរៀបចំ និងចូលទៅក្នុងទីកន្លែងនោះវិញនៅពេលរៀបចំរួចរាល់៕