លោក រ៉ុង ឈុន និយាយជាមួយអ្នកកាសែត ពីថ្ងៃទី ២៣ វិច្ឆិកា នៅភ្នំពេញ។ ហុង មិនា
ភ្នំពេញៈ ប្រធានសហជីពកម្ពុជា លោក រ៉ុង ឈុន ដែលត្រូវបានតុលាការដោះលែងឱ្យនៅក្រៅឃុំសាកល្បង ពាក់ព័ន្ធបទញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម ប្រកាសចូលរួមសកម្មភាពទាមទារឱ្យមានការគោរពសិទ្ធិមនុស្ស និងបានរិះគន់ប្រព័ន្ធតុលាការកម្ពុជាថា ជាទីផ្សារ ទិញលក់សេរីភាព ប៉ុន្ដែមន្ត្រីថាការចោទប្រកាន់នេះគ្មានភ័ស្តុតាងអាចប្រឈមផ្លូវច្បាប់។
ក្នុងសន្និសីទកាសែតស្ដីពីជំហររបស់សកម្មជនបរិស្ថាន និងសិទ្ធិមនុស្សដែលបានរៀបចំឡើងនៅរាជធានីភ្នំពេញ នាថ្ងៃទី ២៣ វិច្ឆិកា លោក រ៉ុង ឈុន ប្រធានសហជីពកម្ពុជាថ្លែងថា រយៈពេលជាង ១ ឆ្នាំដែលលោកស្ថិតក្នុងពន្ធនាគារ លោកសង្កេតឃើញថា អ្នកជាប់ទោសមួយចំនួនរង អយុត្តិធម៌ដោយសារការកាត់ក្តីរបស់តុលាការ។
លោកថ្លែងថា៖ «ពួកយើងជាប់ពន្ធនាគារអស់រយៈពេលជាង ១ ឆ្នាំមកនេះយើងឃើញថាទទួលរងនូវអំពើអយុត្តិធម៌ធ្ងន់ធ្ងរមែនទែន។ យើងមើលឃើញថាដូចជាកញ្ចក់ឆ្លុះបញ្ចាំងនូវទង្វើតុលាការ ទង្វើរបស់ថ្នាក់ដឹកនាំរដ្ឋាភិបាល»។
លោកបន្តថា៖ «ពីព្រោះយើងមើលឃើញទង្វើរបស់តុលាការ ដូចជាកន្លែងទីផ្សារ ទិញលក់សេរីភាព។ យើងមិនប្រើពាក្យថាពុករលួយទេ ដូចជាករណី ដូរបទល្មើសពីទោសស្ថានទម្ងន់ទោសមកទោសធម្មតា ឬមួយលួចមានស្ថាន ទម្ងន់ទោស ដូរបទល្មើសមកលួចធម្មតាយកតម្លៃ ៥ ពាន់ទៅ ៦ ពាន់ដុល្លារ នេះជារឿងមួយធ្ងន់ធ្ងរ»។
លោក រ៉ុង ឈុន កត់សម្គាល់ឃើញអ្នកទោសមួយចំនួនក៏រងនូវភាពអយុត្តិធម៌ជាច្រើន ដោយសារតុលាការកាត់ក្តីដោយមិនបានស៊ើបអង្កេតច្បាស់លាស់។ លោកថាតុលាការមិនបានធ្វើការស៊ើបអង្កេតឱ្យបានច្បាស់លាស់ទេគ្រាន់តែនគរបាលយុត្តិធម៌ចាប់បញ្ជូនមកចេញដីកាឃុំ។
លោកថ្លែងថា៖ «វាជារឿងមួយអយុត្តិធម៌ណាស់! ខ្ញុំនិយាយនេះ មិនមែនចំពោះតែពួកខ្ញុំទេគឺនិយាយ ជាទូទៅ។ ប្រសិនជាប្រព័ន្ធតុលាការមិនធ្វើកំណែទម្រង់ទេ ៣ ឆ្នាំ ឬ ៥ ឆ្នាំទៅមុខទៀត រកគុកដាក់យុវជនខ្មែរលែងបានហើយ»។
ទន្ទឹមនឹងនេះ លោក រ៉ុង ឈុន ស្នើតុលាការទម្លាក់ការចោទប្រកាន់ចំពោះរូបលោក និងសកម្មជនបរិស្ថានផ្សេងទៀត។ លោកថា រូបលោកត្រូវបានដោះលែងឱ្យនៅក្រៅឃុំមែន ប៉ុន្តែស្ថិតក្រោមការត្រួតពិនិត្យរបស់តុលាការ ៣ ឆ្នាំដែលហាក់ដូចជាគូសរង្វង់សេរីភាពឱ្យលោកដើរ។
លោក ឈុន បញ្ជាក់ថា៖ «យើងចង់ឃើញកម្ពុជាមានការគោរពសិទ្ធិមនុស្សផ្តល់សេរីភាពឱ្យពលរដ្ឋពេញលេញ»។
ប៉ុន្តែរដ្ឋលេខាធិការ និងជាអ្នកនាំពាក្យក្រសួងយុត្តិធម៌ លោក ជិន ម៉ាលីន ថ្លែងថា ធម្មតា ជនល្មើសតែងតែមានគំនុំជាមួយសមត្ថកិច្ច និងតុលាការ ហើយតែងតែមានការចោទប្រកាន់គ្រប់បែបយ៉ាង គឺជាសិទ្ធិសេរីភាពរបស់គាត់។ ប៉ុន្តែលោកសង្កត់ធ្ងន់ថា រាល់ការចោទប្រកាន់ដោយគ្មានភ័ស្តុតាងច្បាស់លាស់អាចប្រឈមផ្លូវច្បាប់។
លោកថ្លែងថា៖ «គ្រាន់ថា ការចោទប្រកាន់ក្នុងចេតនាទុច្ចរិត ដោយមិនមានភ័ស្តុតាង មួលបង្កាច់ បង្ខូច វាប៉ះពាល់ដល់កិត្តិយសស្ថាប័នជាតិនាំឱ្យមានការទទួលខុសត្រូវទៅតាមផ្លូវច្បាប់»។
ពាកព័ន្ធបញ្ហាក្នុងពន្ធនាគារនេះដែរ អគ្គនាយកដ្ឋានពន្ធនាគារកាលពីថ្ងៃទី ១៦ វិច្ឆិកា បានចេញសេចក្តីបំភ្លឺថា សិទ្ធិជាមូលដ្ឋានអប្បបរមារបស់ជនជាប់ឃុំគ្រប់រូបភាព ត្រូវបានគោរព និងធានាការពារ។ ប៉ុន្តែអាជ្ញាធរពន្ធនាគារក៏ទទួលស្គាល់ផងដែរថា ពន្ធនាគារ គឺជាទីកន្លែងឃុំឃាំងមនុស្ស ដើម្បីអនុវត្តទោសព្រហ្មទណ្ឌ និងជាកន្លែងអប់រំកែប្រែអ្នកទោស ដើម្បីកែប្រែខ្លួនជាពលរដ្ឋល្អ មិនមែនជាកន្លែងរស់នៅសុខស្រួលមានអាហារឆ្ងាញ់នោះទេ។
សូមជម្រាបថា ប្រធានសហជីពកម្ពុជាលោក រ៉ុង ឈុន ត្រូវបានចាប់ខ្លួនកាលពីអំឡុងខែកក្កដា ឆ្នាំ ២០២០ ជុំវិញអត្ថាធិប្បាយរបស់លោកលើបញ្ហាព្រំដែនកម្ពុជា-វៀតណាម។ ក្រោយមក តុលាការក្រុងភ្នំពេញកាលពីថ្ងៃទី ១៨ ខែសីហា ឆ្នាំ ២០២១ បានកាត់ទោសលោក រ៉ុង ឈុន ឱ្យជាប់ពន្ធនាគារ ២ ឆ្នាំ ពីបទ «ញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
លោកក៏ត្រូវបានសាលាឧទ្ធរណ៍ដោះលែងឱ្យនៅក្រៅឃុំសាកល្បងកាលពីដើមខែវិច្ឆិកា ឆ្នាំ ២០២១ ប៉ុន្តែត្រូវស្ថិតក្រោមការត្រួតពិនិត្យរបស់តុលាការរយៈពេល ៣ ឆ្នាំ៕
វីដេអូ៖
