ទិដ្ឋភាពមើលពីលើនៃខេត្តព្រះសីហនុ។ មហាសន្និបាតសមុទ្រអាស៊ីបូព៌ាឆ្នាំនេះ រៀបចំធ្វើឡើងនៅក្នុងខេត្តព្រះសីហនុនៅថ្ងៃទី ១-២ ធ្នូ។ រូប រ៉ាស់ហ៊ីម
ព្រះសីហនុៈ មហាសន្និបាតសមុទ្រអាស៊ីបូព៌ាលើកទី ៧ ឆ្នាំនេះ ដែលកម្ពុជារៀបចំឡើងពីថ្ងៃទី ១-២ ខែធ្នូ ក្នុងខេត្ដព្រះសីហនុ គឺដើម្បីបង្ហាញអន្តរជាតិពីសក្តានុពលនៃខេត្តនៅជាប់មាត់សមុទ្រ។ អភិបាលខេត្ដព្រះសីហនុ លោក គួច ចំរើន ក៏រំពឹងដែរថា តាមរយៈនេះនឹងផ្ដល់ពុទ្ធិ បទពិសោធ និងផែនការមួយចំនួន សម្រាប់យកមកកែលម្អឆ្នេរសមុទ្រក្នុងខេត្ដប្រកបដោយចីរភាព។
លោក នេត្រ ភក្ត្រា រដ្ឋលេខាធិការក្រសួងបរិស្ថានថ្លែងក្នុងសន្និសីទកាសែត ថា ដំណើរឆ្ពោះទៅកាន់មហាសន្និបាតសមុទ្រអាស៊ីបូព៌ាឆ្នាំ ២០២១ នៅខេត្តព្រះសីហនុ ក្រសួងបរិស្ថាន និងរដ្ឋបាលខេត្តព្រះសីហនុរៀបចំមហាសន្និបាតសមុទ្រអាស៊ីបូព៌ាលើកទី ៧ ដែលកម្ពុជាធ្វើជាម្ចាស់ផ្ទះនឹងប្រព្រឹត្តទៅ នាថ្ងៃទី ១-២ ខែធ្នូ ឆ្នាំ ២០២១ ក្រោមប្រធានបទ «បង្កើតទសវត្សរ៍ថ្មីសម្រាប់សុខុមាលភាពមហាសមុទ្រ មនុស្ស និងសេដ្ឋកិច្ច»។
បើតាមលោក នេត្រ ភក្ត្រា ខេត្ដព្រះសីហនុជាខេត្ដមួយជាប៉ូលសេដ្ឋកិច្ចសំខាន់ ជាទិសដៅចក្ខុវិស័យរបស់រាជរដ្ឋាភិបាល ប្រែក្លាយខេត្ដនេះជាតំបន់សេដ្ឋកិច្ចពិសេសគំរូពហុបំណង។ តំបន់ខេត្ដព្រះសីហនុក៏ជាខេត្ដ ដែលមានវិស័យទេសចរណ៍ ឧស្សាហកម្មរីកចម្រើន និងជាខេត្ដដែលមានកំពង់ផែទឹកជ្រៅជាងគេនៅទូទាំងប្រទេសកម្ពុជា មានព្រលានយន្តហោះអន្តរជាតិ មានផ្លូវ High way និងហេដ្ឋារចនាសម្ព័ន្ធនៅក្នុងខេត្ដ ដែលទើបតែធ្វើទំនើបកម្មធ្វើឱ្យខេត្ដនេះក្លាយជាខេត្ដទំនើបមួយ កំពុងបោះជំហានទៅមុខ ក្នុងទិសដៅដែលរាជរដ្ឋាភិបាលកំណត់ជាតំបន់សេដ្ឋកិច្ចពិសេសពហុបំណង។
លោកបញ្ជាក់ថា៖ «នេះក៏ជាឱកាសមួយដែលរាជរដ្ឋាភិបាលជ្រើសរើសយកខេត្ដព្រះសីហនុក្នុងការរៀបចំមហាសន្និបាតសមុទ្រអាស៊ីបូព៌ា ដើម្បីបង្ហាញទៅដល់បណ្ដាប្រទេសនានា ដែលជាសមាជិកនៃអង្គការ PEMSEA មាន សិង្ហបុរី ឡាវ ហ្វីលីពីន ឥណ្ឌូនេស៊ី វៀតណាម ទីម័រ ចិន កូរ៉េខាងត្បូង កូរ៉េខាងជើង ជប៉ុន ព្រមទាំងមានអង្គការដៃគូជាច្រើនទៀតឱ្យឃើញពីសក្តានុពលខេត្ដនៅជាប់មាត់សមុទ្ររបស់កម្ពុជា»។
លោកបន្តថា៖ «ប្រទេសកម្ពុជារបស់យើង ក្រោមការដឹកនាំរបស់សម្ដេចតេជោនាយករដ្ឋមន្ដ្រី ហ៊ុន សែន ខេត្ដនៅជាប់មាត់សមុទ្រ ដែលជាផ្នែកមួយសំខាន់លើផ្នែកសេដ្ឋកិច្ច គឺមានសមត្ថភាពគ្រប់គ្រាន់ក្នុងការរៀបចំមហាសន្និបាតនេះ»។
លោកថា មហាសន្និបាតសមុទ្រអាស៊ីបូព៌ាឆ្នាំ ២០២១ នេះ រួមមាន កិច្ចប្រជុំនៃរដ្ឋបាលថ្នាក់ក្រោមជាតិនៃបណ្តាខេត្តរបស់ប្រទេសសមាជិក PEMSEA សន្និសីទអន្តរជាតិ និងវេទិការដ្ឋមន្ត្រី គឺជាមហាសន្និបាតលើកទី ៧ បន្ទាប់ពីបានរៀបចំជាលើកទី ១ នៅឆ្នាំ ២០០៣ នៅប្រទេសម៉ាឡេស៊ី។ មហាសន្និបាតសមុទ្រអាស៊ីបូព៌ាត្រូវបានរៀបចំឡើងរៀងរាល់ ៣ ឆ្នាំមកហើយ ដោយមានការចូលរួមពីប្រទេសជាសមាជិកនៃអង្គការអន្តរជាតិភាពជាដៃគូនៃការគ្រប់គ្រងបរិស្ថានសមុទ្រអាស៊ីបូព៌ា។
លោក នេត្រ ភក្ត្រា និងលោក គួច ចំរើន ថ្លែងនៅក្នុងសន្និសីទកាសែត។ រូប រ៉ាស់ហ៊ីម
លោកបន្តថា៖ «មហាសន្និបាតសមុទ្រអាស៊ីបូព៌ាលើកទី ៧ ឆ្នាំ ២០២១ នេះ កម្ពុជារបស់យើងចាប់តាំងពីបានចូលជាសមាជិកនៅក្នុងអង្គការភាពជាដៃគូនៃការគ្រប់គ្រងបរិស្ថានអាស៊ីបូព៌ា (PEMSEA) នៅឆ្នាំ ១៩៩៤ នេះគឺជាលើកទី ១ ហើយដែលកម្ពុជាបានទទួលធ្វើជាម្ចាស់ផ្ទះ ក្នុងការរៀបចំមហាសន្និបាតនេះ។ អង្គការ PEMSEA គឺបានដំណើរការនៃការរៀបចំមហាសន្និបាតរបស់ខ្លួនតាំងពីឆ្នាំ ២០០៣ រហូតមក។ ការរៀបចំមហាសន្និបាតនេះ គឺធ្វើឡើងជារៀងរាល់ ៣ ឆ្នាំម្ដង ទៅតាមបណ្ដាប្រទេស ទៅតាមអក្ខរក្រម»។
លោក នេត្រ ភក្ត្រា បញ្ជាក់ថា៖ «កម្ពុជារបស់យើង គឺទើបតែបានរៀបចំមហាសន្និបាតនេះលើកទី ១ ព្រោះកន្លងមកប្រទេសយើងនៅមិនទាន់រៀបចំគ្រប់លក្ខខណ្ឌ ដោយសារយើងត្រូវការពេលវេលាបន្ថែមក្នុងការកសាងពង្រឹងប្រទេស ហើយឥឡូវនេះ គឺជាពេលវេលាមួយសមស្រប ដែលកម្ពុជាមានលទ្ធភាព និងមានសមត្ថភាពពេញលេញក្នុងការទទួលធ្វើជាម្ចាស់ផ្ទះនៃមហាសន្និបាតអាស៊ីបូព៌ានេះ»។
លោកឱ្យដឹងថា ការដែលរាជរដ្ឋាភិបាលសម្រេចជ្រើសរើសខេត្ដព្រះសីហនុ ធ្វើជាកន្លែងរៀបចំមហាសន្និបាតសមុទ្រអាស៊ីបូព៌ានេះ គឺដោយសារខេត្ដព្រះសីហនុ គឺជាខេត្ដ ១ ក្នុងចំណោមខេត្ដ ៤ នៃខេត្ដដែលមានព្រំប្រទល់ជាប់នឹងសមុទ្រ ក្នុងនោះមានខេត្ដកំពត កែប កោះកុង និងខេត្ដព្រះសីហនុនេះ។
លោកបន្ថែមថា ប្រទេសកម្ពុជាមានឆ្នេរសមុទ្រប្រវែង ៤៤០ គីឡូម៉ែត្រក្នុងនោះឆ្នេរសមុទ្រនៅក្នុងខេត្ដព្រះសីហនុ មានជាង ១៧០ គីឡូម៉ែត្រ ហើយខេត្ដព្រះសីហនុក៏ជាខេត្ដមួយដែលកំពុងមានការរីកចម្រើនខ្លាំង។
លោកថ្លែងថា៖ «ដូចអ្នកសារព័ត៌មានយើងបានឆ្លងកាត់ បើសិនជាអ្នកដែលមិនបានមករយៈពេល ២ ទៅ ៣ ឆ្នាំមុន ហើយទើបតែមកនៅពេលនេះ គឺអាចនឹងវង្វេងផ្លូវខ្លះៗ ដោយសារតែកម្រិតនៃការអភិវឌ្ឍខ្លាំង»។
អភិបាលខេត្តព្រះសីហនុ លោក គួច ចំរើន សម្តែងនូវក្តីរំពឹងបែបនេះ ក្នុងសន្និសីទសារព័ត៌មានកាលពីថ្ងៃទី ២៩ វិច្ឆិកា មុនពេលចាប់ផ្តើមមហាសន្និបាតសមុទ្រអាស៊ីបូព៌ាលើកទី ៧ ដើម្បីជម្រាបជូនអ្នកសារព័ត៌មានអំពីការត្រៀមខ្លួនរួចជាស្រេចរបស់កម្ពុជាក្នុងការរៀបចំដឹកនាំមហាសន្និបាតសមុទ្រអាស៊ីបូព៌ា ២០២១ និងបង្ហាញពីសមិទ្ធផលនានាដែលរាជរដ្ឋាភិបាលសម្រេចបានសម្រាប់ខេត្តព្រះសីហនុ រៀបចំដោយក្រសួងបរិស្ថាន និងរដ្ឋបាលខេត្តព្រះសីហនុនៅសាលាខេត្ដ។
លោកថ្លែងថា៖ «ពាក់ព័ន្ធនឹងកិច្ចប្រជុំ PEMSEA នាពេលខាងមុខ យើងនិយាយពីឆ្នេរសមុទ្រ ខ្ញុំក៏នឹងចូលរួមដើម្បីបានការស្វែងយល់បន្ថែមតាមរយៈកិច្ចប្រជុំនេះ សង្ឃឹមថាបានផ្ដល់ពុទ្ធិខ្លះ ឬក៏បទពិសោធខ្លះ ឬក៏ផែនការមួយចំនួនណាខ្លះ ដែលខ្ញុំនឹងទទួលបានដើម្បីយកមកខិតខំបន្តទៀតជាមួយនឹងថ្នាក់ដឹកនាំរបស់យើង ក្នុងការខិតខំកែលម្អជាបន្តបន្ទាប់»។
បើតាម ក្រសួងបរិស្ថានមហាសន្និបាតសមុទ្រឆ្នាំនេះធ្វើឡើងក្នុងគោលបំណងសំខាន់ៗទី១ ចែករំលែកមេរៀនជាបទពិសោធតាមដានវឌ្ឍនភាពការងារកន្លងមក និងពង្រីកបន្ថែមនូវការអនុវត្តយុទ្ធសាស្ត្រ ដែលបានប្រតិបត្តិនៅថ្នាក់តំបន់ជាតិ និងរដ្ឋបាលថ្នាក់ក្រោមជាតិ។ ទី២ បង្កើត និងរៀបចំឡើងវិញនូវយន្តការគ្រប់គ្រង ដែលមានស្រាប់ និងជំរុញបង្កើតឱកាសថ្មីៗបន្ថែមទៀត សម្រាប់ភាពជាដៃគូក្នុងតំបន់ តាមរយៈបច្ចេកវិទ្យានវានុវត្តន៍ ការវិនិយោគ និងហិរញ្ញប្បទាន ដើម្បីបន្តនិរន្តរភាពនៃបរិស្ថានតំបន់ឆ្នេរ និងសមុទ្រ។ ទី៣ កំណត់នូវផែនទីបង្ហាញផ្លូវដ៏ច្បាស់លាស់មួយសម្រាប់ជាដំណោះស្រាយចំពោះបញ្ហាសមុទ្រនាទសវត្សរ៍ខាងមុខ ដោយអនុលោមទៅតាមផែនការ ១ ទសវត្សរ៍ របស់អង្គការសហប្រជាជាតិនៃវិទ្យាសាស្ត្រមហាសមុទ្រ របៀបវារៈរបស់អង្គការសហប្រជាជាតិឆ្នាំ ២០៣០ អនុសញ្ញា ក្របខ័ណ្ឌសហប្រជាជាតិស្តីពីការប្រែប្រួលអាកាសធាតុ និងក្របខ័ណ្ឌជីវចម្រុះសកលក្រោយឆ្នាំ ២០២០ (The UN Decade of Ocean Science, The 2030 Agenda for SD, UNFCCC, The Post-2020 Global Biodiversity Framework) ព្រមទាំងបណ្តាក្របខ័ណ្ឌពាក់ព័ន្ធនានា៕
វីដេអូ៖
