សត្វស្វានៅតំបន់វត្តភ្នំ ក្នុងសង្កាត់ផ្សារចាស់ ខណ្ឌដូនពេញ។ រូបថត FB
ភ្នំពេញៈ ស្វាកាចៗចំនួន ១៨ ក្បាល ដែលអុកឡុក និងបង្កភាពភ័យខ្លាចដល់ប្រជាពលរដ្ឋក្នុងតំបន់ព្រំប្រទល់រវាងសង្កាត់ស្រះចក និងសង្កាត់វត្តភ្នំ ខណ្ឌដូនពេញ នាពេលកន្លងមក ត្រូវបានមន្ត្រីជំនាញនៃខណ្ឌរដ្ឋបាលព្រៃឈើភ្នំពេញ សហការជាមួយមន្ត្រីជំនាញនៃឧទ្យានសួនសត្វភ្នំតាម៉ៅ ចាប់យកទៅកាន់ភ្នំតាម៉ៅ កាលពីរសៀលថ្ងៃទី ៦ ធ្នូ។ នេះបើតាមលោក គាំ សីហា នាយខណ្ឌ-រដ្ឋបាលព្រៃឈើភ្នំពេញ។
លោក គាំ សីហា ប្រាប់ ភ្នំពេញ ប៉ុស្តិ៍ថា ក្នុងរយៈពេល ២ ឆ្នាំកន្លងមកនេះ ចំនួនសត្វស្វានៅតំបន់រមណីយដ្ឋានវប្បធម៌ប្រវត្តិសាស្ត្រវត្តភ្នំមានការកើនឡើងជាបន្តបន្ទាប់ ធ្វើឱ្យព្រៃឈើក្នុងតំបន់រមណីយដ្ឋាននេះផ្ដល់ផ្លែផ្កាមិនគ្រប់សម្រាប់ជាចំណីរបស់វា។ ដោយសារកង្វះចំណីអាហារ សត្វស្វាមួយចំនួន ពិសេសស្វាធំៗដែលមានវ័យត្រូវបន្តពូជ បានដើរបង្កការអុកឡុក នៅតាមលំនៅឋានរបស់ប្រជាពលរដ្ឋក្នុងតំបន់រមណីយដ្ឋានវត្តភ្នំនេះ។ ពេលខ្លះបានលួចវាយប្រហារលើកុមារតូចៗ ដើម្បីដណ្ដើមយក ចំណីអាហារមកស៊ី។
លោកបញ្ជាក់ថា៖ «នៅថ្ងៃម្សិលមិញ [ទី ៦ ធ្នូ] ក្រុមការងារយើងដែលមានកិច្ចសហការពីកម្លាំងជំនាញនៃមជ្ឈមណ្ឌលសង្គ្រោះសត្វព្រៃភ្នំតាម៉ៅចុះបង្ក្រាបចាប់ពួកវា [ស្វាធំៗ និងកាចៗ] ដោយប្រើថ្នាំសណ្ដំ និងសំណាញ់បាញ់ ត្រងចាប់បាន ១៨ ក្បាល បញ្ជូនយកទៅកាន់មជ្ឈមណ្ឌលសង្គ្រោះសត្វព្រៃភ្នំតាម៉ៅ ជាទីដែលមានព្រៃឈើច្រើនប្រភេទសម្រាប់ជាចំណីរបស់ពួកវាស៊ី និងរស់នៅ។ ប៉ុន្តែត្រូវធ្វើចត្តាឡីស័កជាមុនសិន ដើម្បីប្រាកដថាពួកវាគ្មានជំងឺឆ្លងទើបដោះលែងចូលទៅក្នុងព្រៃ»។
បើតាមលោក សីហា សត្វស្វាធំៗ ដែលច្រើនទៅបង្កការអុកឡុកនៅតាមផ្ទះប្រជាពលរដ្ឋនោះ ភាគច្រើនជាស្វា ដែលធ្លាប់ត្រូវបានអ្នកភូមិ អាណិតស្រឡាញ់និងផ្ដល់ចំណីអាហារឱ្យពួកវាស៊ី កាលពីពួកវានៅតូចៗ។ លុះដល់វាធំឡើង មិនឃើញឱ្យចំណីអាហារពួកវាស៊ីទៀត ពួកវាក៏បង្កការរំខានចូលមកលួចផ្លែឈើ នំចំណី ត្រី សាច់ រហូតដល់ទ្រព្យសម្បត្តិក្នុងផ្ទះ ដែលអ្នកភូមិមិនប្រយ័ត្ន ដាក់ក្បែរបង្អួចចំហ ឬនៅយ៉ខាងមុខផ្ទះជាដើម។
ទោះយ៉ាងណា លោកបានអំពាវនាវពលរដ្ឋ កុំវាយប្រហារពួកវា ឬដាក់អង្គប់ ដាក់អន្ទាក់ ចាប់ពួកវា ដោយគ្មានការអនុញ្ញាតពីសមត្ថកិច្ចជំនាញនោះទេ។ ត្រូវរាយការណ៍ដល់សមត្ថកិច្ចជំនាញ នៅពេលឃើញពួកវាមកបង្កការអុកឡុក រំខានដល់ការរស់នៅប្រចាំថ្ងៃ។
លោក សីហា បន្តថា នៅថ្ងៃទី ៧ ខែធ្នូ ក្រុមការងាររបស់លោកនៅតែបន្តប្រតិបត្តិការចុះពិនិត្យ និងបង្ក្រាបចាប់សត្វស្វាកាចៗ ក្នុងតំបន់វត្តភ្នំនេះផងដែរ ដើម្បី ការពារដល់សុវត្ថិភាពនៃការរស់នៅរបស់ប្រជាពលរដ្ឋក្នុងតំបន់នេះ។ សត្វស្វាធំៗកាចៗទាំងនោះ ភាគច្រើនមិនរស់នៅលើដើមឈើនោះទេ គឺវារស់នៅលើពិតាននៃដំបូលអគារចាស់ៗ ភាគខាងត្បូងនៃមន្ទីរពេទ្យព្រះកេតុមាលា ដែលពិបាកក្នុងការបង្ក្រាបចាប់វា។
ការចុះអន្តរាគមន៍បង្ក្រាបចាប់សត្វស្វាធំៗ កាចៗ របស់សមត្ថកិច្ចជំនាញខណ្ឌរដ្ឋបាលព្រៃឈើភ្នំពេញ និង ឧទ្យានសួនសត្វភ្នំតាម៉ៅ នាពេលនេះ ត្រូវបានទទួលការស្វាគមន៍ និងគាំទ្រយ៉ាងខ្លាំងពីប្រជាពលរដ្ឋក្នុងមូលដ្ឋានសង្កាត់ស្រះចក និងសង្កាត់វត្តភ្នំនៃខណ្ឌដូនពេញ។
លោក ប្រាក់ សុផាត អាយុ ៤២ ឆ្នាំមានលំនៅភូមិ ១១ សង្កាត់ស្រះចក ខណ្ឌដូនពេញ ប្រាប់ភ្នំពេញប៉ុស្តិ៍ថា គាត់ និងអ្នកភូមិដែលរស់នៅក្បែរមន្ទីរពេទ្យព្រះកេតុមាលាមានអារម្មណ៍ធូរស្រាលក្នុងចិត្តបន្តិច ក្រោយពេលឃើញក្រុមមន្ត្រីជំនាញចុះបង្ក្រាបចាប់សត្វស្វា «ទំនើង» ទាំងនោះចេញពីតំបន់រស់នៅរបស់គាត់។
លោក សុផាត បាននិយាយថា៖ «ខ្ញុំត្រេកអរពេលឃើញមន្ត្រីជំនាញគេមកចាប់ពួកវា [សត្វស្វា] យកទៅ ព្រោះពួកវាមួយចំនួនមានចរិតកាចសាហាវហ៊ានចូលលួចផ្លែឈើ ត្រី សាច់ និងខោអាវ ដែលយើងដាក់ហាលនៅយ៉ខាងមុខផ្ទះ ហើយពេលយើងយកឈើទៅ [ជន្ល] វាយវា វាលោតស្ទុះមករកខាំយើងវិញ។ វាមិនខ្លាចយើងទេ»។
ចំណែកអ្នកស្រី ទេព ផល្លី អាយុ ៥៦ ឆ្នាំមានលំនៅភូមិ ១០ ក្នុងសង្កាត់វត្តភ្នំ ខណ្ឌដូនពេញ ក៏បានរៀបរាប់ស្រដៀងគ្នានេះដែរថា កូនចៅគាត់មួយចំនួនធ្លាប់ត្រូវស្វាទាំងនោះខាំដណ្ដើមយកនំបុ័ងសាច់ និងចេកទុំ ហើយពួកស្វាទាំងនោះ គាត់ធ្លាប់ឱ្យផ្លែឈើដល់ពួកវាស៊ី កាលពីនៅតូចៗ។
អ្នកស្រីនិយាយថា៖ «សត្វស្វាតូចៗ គឺស្លូតបូតគួរឱ្យស្រឡាញ់។ ប៉ុន្តែនៅពេលពួកវាធំ បែរជាកាចសាហាវ ហ៊ាន ខាំ ក្រញៅយើង ដែលធ្លាប់ឱ្យនំចំណី និងផ្លែឈើដល់ពួកវាស៊ី កាលពីពួកវានៅតូចៗ។ កូនចៅខ្ញុំ ២ នាក់ធ្លាប់ត្រូវវាខ្វាចក្រញៅ និងដេញខាំឱ្យរងរបួសថែមទៀតផង»៕
វីដេអូ៖
