សន្និសីទកាសែតស្តីពីបច្ចុប្បន្នភាពជំងឺកូវីដ ១៩ នៅថ្ងៃទី ៩ ធ្នូ។ ហុង មិនា
នំពេញៈ ការចាក់វ៉ាក់សាំងកូវីដ ១៩ ដូសទី ៤ ប្រហែលជាអាចនឹងត្រូវចាក់នៅក្នុងឆ្នាំ ២០២២ សម្រាប់អ្នកដែលបានចាក់វ៉ាក់សាំងដូសទី ៣ ក្នុងរយៈពេលចន្លោះពី ៦ ខែទៅ ១ ឆ្នាំ ខណៈដែលទាំងក្រសួងសុខាភិបាល និងអង្គការសុខភាពពិភពលោកប្រចាំកម្ពុជាលើកឡើងថា មកដល់ពេលនេះ មិនទាន់មានវ៉ាក់សាំងណាមួយដែលអាចការពារការឆ្លងវីរុសកូវីដ ១៩ បាន ១០០ ភាគរយនោះទេ។
លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសបានថ្លែងនារសៀលថ្ងៃទី ៩ ខែធ្នូ ក្នុងបទសម្ភាសរួមគ្នារវាងក្រសួងសុខាភិបាល និងអង្គការសុខភាពពិភពលោកប្រចាំកម្ពុជាពីបច្ចុប្បន្នភាពនៃវីរុសកូវីដ ១៩ បំប្លែងថ្មី «អូមីក្រុង»។ លោកស្រីថ្លែងថា៖ «តាមការយល់ឃើញរបស់ខ្ញុំ ប្រហែលជាដូសទី ៤ ត្រូវប្រើប្រាស់នៅក្នុងឆ្នាំ ២០២២ សម្រាប់អ្នកដែលបានចាក់ដូសទី ៣ បានក្នុងរយៈពេលពី ៦ ខែទៅ ១ ឆ្នាំ ដែលយើងអាចត្រូវចាក់ដូសទី ៤ នេះជាបន្តទៀត។ ប៉ុន្តែចំណុចនេះត្រូវឱ្យមានភាពច្បាស់លាស់ នៅពេលណាដែលមានការបកស្រាយ និងសិក្សាបន្ថែមទៀត»។
លោកស្រីបញ្ជាក់ថា ក្រោយពីមានការចាក់វ៉ាក់សាំងដូសទី ៤ ការចាក់ដូសទី ៥ ក៏នឹងអាចកើតមានដែរ ប្រសិនបើមានការរកឃើញថា រយៈពេល ៦ ខែត្រូវចាក់ម្តង ឬ ១ ឆ្នាំត្រូវចាក់ម្តង ដែលចំណុចនេះកំពុងតែត្រូវធ្វើការសិក្សា។
រាជរដ្ឋាភិបាលកម្ពុជាក៏បានឱ្យវិស័យឯកជន ធ្វើការផ្តល់ការចាក់វ៉ាក់សាំងកូវីដ ១៩ ដែរ ដែលធ្វើឱ្យប្រជាពលរដ្ឋមានជម្រើសក្នុងការស្វែងរកសេវាចាក់វ៉ាក់សាំងកូវីដ ១៩ នៅពេលណាដែលវិស័យឯកជនចាប់ផ្តើមអនុវត្តទៅតាមការណែនាំរបស់ក្រសួងសុខាភិបាល និងមានការទុកដាក់រក្សាវ៉ាក់សាំងនេះបានល្អត្រឹមត្រូវ តាមក្បួនបច្ចេកទេសរបស់ក្រសួង។
ទាក់ទងនឹងការចាក់វ៉ាក់សាំងនេះដែរ បើតាមរបាយការណ៍របស់ក្រសួងសុខាភិបាល ដែលចេញជារៀងរាល់ថ្ងៃឃើញថា អ្នកស្លាប់ដោយសារជំងឺកូវីដ ១៩ នៅតែមានហើយអ្នកស្លាប់ទាំងនោះខ្លះបានចាក់វ៉ាក់សាំង និងខ្លះមិនបានចាក់វ៉ាក់សាំង។
ត្រង់ចំណុចនេះ លោកស្រី ឱ វណ្ណឌីន បានសង្កត់ធ្ងន់ថា មកដល់ពេលនេះ មិនទាន់មានវ៉ាក់សាំងកូវីដ ១៩ ណាមួយដែលបានអះអាងថា ចាក់ហើយនឹងការពារការឆ្លងបាន ១០០% នោះទេ។
ជាមួយគ្នានោះដែរ លោកស្រី លី អៃឡែន តំណាងអង្គការសុខភាពពិភពលោកប្រចាំកម្ពុជាបានថ្លែងថា មកដល់ពេលនេះមិនទាន់មានវ៉ាក់សាំងណាដែលមានប្រសិទ្ធភាព ១០០ ភាគរយ សម្រាប់ការពារទៅលើការឆ្លង ប៉ុន្តែវ៉ាក់សាំងមានប្រសិទ្ធភាពសម្រាប់ការពារទៅលើការឈឺធ្ងន់ធ្ងរ ការសម្រាកពេទ្យការបាត់បង់ជីវិត រួមទាំងជំងឺកូវីដ ១៩ បណ្តាលមកពីវីរុសបំប្លែងថ្មីអូមីក្រុងផងដែរ។
យោងតាមសេចក្តីប្រកាសព័ត៌មានរួមគ្នារវាងក្រសួងសុខាភិបាល និងអង្គការសុខភាពពិភពលោកប្រចាំកម្ពុជាបានលើកឡើងថា គិតត្រឹមថ្ងៃទី ៧ ខែធ្នូ ឆ្នាំ ២០២១ អត្រាចាក់វ៉ាក់សាំងកូវីដ ១៩ មានចំនួន ១០១,១០% នៃប្រជាជនគោលដៅ ១០ លាននាក់ ដែលមានអាយុចាប់ពី ១៨ ឆ្នាំឡើងទៅដែលបានចាក់វ៉ាក់សាំងយ៉ាងហោចណាស់ក៏ ១ ដូស ហើយមនុស្សពេញវ័យបានចាក់វ៉ាក់សាំងដូសមូលដ្ឋានពេញលេញសរុបបានចំនួន ៩៦,៤៤%។
រីឯបុគ្គលដែលមានអាយុចាប់ពី ៥ ឆ្នាំឡើងទៅ ទទួលបានការចាក់វ៉ាក់សាំងកូវីដ ១៩ សរុបបានចំនួន ៩៥,២២ ភាគរយ និងបុគ្គលិកសុខាភិបាលនៅទូទាំងប្រទេសបានចាក់វ៉ាក់សាំងកូវីដ-១៩ដូសពេញលេញសរុបបានចំនួន ១០០ ភាគរយ ហើយមនុស្សវ័យចាស់ដែលមានអាយុចាប់ពី ៦០ ឆ្នាំឡើងទៅ ក៏ត្រូវទទួលបានការចាក់វ៉ាក់សាំងកូវីដ ១៩ ដូសពេញលេញបានចំនួន ៩៩ ភាគរយ នៃចំនួនសរុបក្រុមអាយុនេះផងដែរ។
លោកស្រី ឱ វណ្ណឌីន បានបញ្ជាក់ថា ក្រសួងសុខាភិបាលនៅតែបន្តដំណើរការចាក់វ៉ាក់សាំងកូវីដ ១៩ ជាពិសេស ការចាក់ដល់អ្នកដែលមិនមានលទ្ធភាពអាចមករកសេវាចាក់វ៉ាក់សាំងបាន (hard to reach population) ដើម្បីឈានទៅដល់កម្រិតអប្បបរមា និងដើម្បីបំពេញកម្រិតវ៉ាក់សាំងឱ្យបានគ្រប់ដូសពេញលេញ៕
វីដេអូ៖
