វ៉ាក់សាំង AstraZeneca ចំនួន ៣៣ ម៊ឺនដូស ដែលជប៉ុនផ្ដល់ជំនួយមកកម្ពុជា កាលពីថ្ងៃទី ២៣ កក្កដា។ រូបថត ស្ថានទូតជប៉ុននៅកម្ពុជា
ភ្នំពេញៈ ជប៉ុនប្រកាសផ្ដល់ជំនួយវ៉ាក់សាំង AstraZeneca ប្រមាណ ៣០ ម៉ឺនដូសបន្ថែមទៀតដល់កម្ពុជា ដែលនឹងត្រូវដឹកជញ្ជូនមកដល់កម្ពុជានៅថ្ងៃទី ១៩ ធ្នូ ក្រោមការរៀបចំភ័ស្តុភារដោយ COVAX Facility និងគាំទ្រដោយអង្គការយូនីសេហ្វ និងអង្គការសុខភាពពិភពលោក។
វ៉ាក់សាំងដែលត្រូវបានផ្ដល់អាជ្ញាប័ណ្ណផលិតក្នុងប្រទេសជប៉ុន ប្រមាណ ៣០ ម៉ឺនដូសនេះ គឺជាការបន្ថែមពីលើវ៉ាក់សាំងប្រមាណ ១ លានដូសដែលរដ្ឋាភិបាលជប៉ុនបានផ្តល់ដល់កម្ពុជារួចហើយ។
លោក មិកាមិ ម៉ាសាហ៊ីរ៉ូ (Mikami Masahiro) ឯកអគ្គរាជទូតជប៉ុនប្រចាំកម្ពុជា ថ្លែងនាថ្ងៃទី ១៦ ធ្នូ ថា៖ «ការសម្រេចនេះ ធ្វើឡើងស្របតាមចំណងមិត្តភាពរវាងជប៉ុន និងកម្ពុជា។ ខ្ញុំសង្ឃឹមថា ជំនួយនេះនឹងរួមចំណែកបន្ថែមទៀត ដល់ជំហានឆ្ពោះទៅរកការងើបឡើងវិញនៃសង្គម និងសេដ្ឋកិច្ចក៏ដូចជាកាត់បន្ថយការព្រួយបារម្ភមួយចំនួនរបស់ប្រជាជនកម្ពុជា»។
លោកថ្លែងក្នុងសេចក្តីប្រកាសព័ត៌មានថា ប្រឈមមុខនឹងការរីករាលដាលនៃមេរោគឆ្លងថ្មីដែលពិភពលោកកំពុងជួបប្រទះនេះ ការចាក់វ៉ាក់សាំង និងការពង្រឹងប្រព័ន្ធសុខាភិបាលគឺជាអាទិភាពចម្បង សម្រាប់រាជរដ្ឋាភិបាល និងប្រជាជនកម្ពុជា។
មកទល់ពេលនេះ រដ្ឋាភិបាលជប៉ុនបានផ្ដល់ជំនួយផ្នែកសុខាភិបាលសរុបប្រមាណជាង ៦០ លានដុល្លារអាមេរិកដល់កម្ពុជា ដែលរួមមានការផ្ដល់បរិក្ខារពេទ្យ ការកែលម្អមន្ទីរពេទ្យ ការគាំទ្រតាមរយៈអង្គការអន្តរជាតិនានា សម្រាប់វិធានការទប់ស្កាត់ការចម្លងជំងឺតាមព្រំដែនក៏ដូចជាការផ្ដល់បរិក្ខារសម្រាប់ដឹកជញ្ជូន និងរក្សាទុកវ៉ាក់សាំងឱ្យបានត្រឹមត្រូវផងដែរ។
លោក មិកាមិ ម៉ាសាហ៊ីរ៉ូ ថ្លែងថា រដ្ឋាភិបាលជប៉ុនក៏បានផ្ដល់ជាកម្ចីប្រមាណ ២២៧ លានដុល្លារអាមេរិក ដែលត្រូវបានយកទៅប្រើប្រាស់ក្នុងការគាំទ្រហិរញ្ញវត្ថុដល់ប្រជាជនដែលរងផលប៉ះពាល់ ដោយសារកូវីដ ១៩ និងសម្រាប់ការពង្រឹងប្រព័ន្ធសុខាភិបាល។
លោក Masahiro ថ្លែងថា៖ «ខ្ញុំក៏សូមឆ្លៀតក្នុងឱកាសនេះសម្ដែងនូវការគោរពដ៏ខ្ពង់ខ្ពស់ចំពោះអ្នកជំនាញសុខាភិបាល និងមន្ត្រីរដ្ឋាភិបាលទាំងអស់ដែលកំពុងតែចាត់វិធានការប្រយុទ្ធប្រឆាំងនឹងកូវីដ ១៩ ហើយខ្ញុំក៏សូមបួងសួងជូនពរដល់ប្រជាពលរដ្ឋទាំងអស់ដែលបាននិងកំពុងតែខិតខំប្រឹងប្រែងប្រឈមនឹងស្ថានភាពដ៏លំបាកនេះ»។ ក្នុងការប្រយុទ្ធប្រឆាំងនឹងជំងឺកូវីដ ១៩ ប្រទេសជប៉ុន នឹងបន្តសហការ និងធ្វើការរួមគ្នាជាមួយកម្ពុជាដែលជាមិត្តដ៏សំខាន់របស់ជប៉ុន។ លោក Masahiro សង្ឃឹមថា ស្ថានភាពសកលលោករួមទាំងកម្ពុជានឹងអាចល្អប្រសើរឡើងវិញ ក្នុងពេលដ៏ឆាប់ខាងមុខហើយការផ្លាស់ប្ដូរទំនាក់ទំនងរវាងប្រទេសទាំង ២ ក៏ដូចជាក្នុងពិភពលោកនឹងអាចចាប់ផ្តើមឡើងវិញ។
ដោយឡែក នៅថ្ងៃទី ១៦ ធ្នូក្រសួងសុខាភិបាលបានចេញសេចក្តីណែនាំឱ្យមូលដ្ឋានសេវាសុខាភិបាលឯកជនត្រូវប្រើប្រាស់ប្រព័ន្ធចុះឈ្មោះចាក់វ៉ាក់សាំងកូវីដ ១៩ ដែលជាប្រព័ន្ធផ្ទុកទិន្នន័យជាតិតែមួយ ដែលបច្ចុប្បន្នកំពុងប្រើប្រាស់ និងគ្រប់គ្រងដោយគណៈកម្មការចំពោះកិច្ចវ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គវក-១៩) ដើម្បីងាយស្រួលក្នុងការគ្រប់គ្រង ទិន្នន័យ និងផ្ទៀងផ្ទាត់តំណភ្ជាប់ទៅកាត និងវិញ្ញាបនបត្រចាក់វ៉ាក់សាំងកូវីដ ១៩។
ការអនុវត្តបែបនេះគឺដើម្បីធានាឱ្យការកត់ត្រាទិន្នន័យអំពីការចាក់វ៉ាក់សាំងកូវីដ ១៩ និងការចេញកាតចាក់វ៉ាក់សាំងកូរីដ ១៩ ដោយមូលដ្ឋានសេវាសុខាភិបាលឯកជនធ្វើឡើងក្នុងស្តង់ដាតែមួយ និងចៀសវាងការលេចចេញនូវការកត់ត្រា និងការចេញកាតចាក់វ៉ាក់សាំងច្រើនប្រភេទ ដែលអាចធ្វើឱ្យមានការពិបាកក្នុងការទទួលស្គាល់នូវកាតចាក់វ៉ាក់សាំងកូវីដ ១៩។
ក្រសួងសុខាភិបាលបានណែនាំឱ្យមូលដ្ឋានសេវាសុខាភិបាលឯកជនត្រូវប្រើប្រាស់កាតចាក់វ៉ាក់សាំងកូវីដ ១៩ ដែលរៀបចំ និងបោះពុម្ពដោយក្រសួងសុខាភិបាល និងត្រូវផ្ទៀងផ្ទាត់ និងកត់ត្រាព័ត៌មានអ្នកមកចាក់វ៉ាក់សាំងកូវីដ ១៩ ឱ្យបានច្បាស់លាស់ និងត្រឹមត្រូវក្នុងប្រព័ន្ធទិន្នន័យចាក់វ៉ាក់សាំងកូវីដ ១៩៕
