មេបញ្ជាការកងទ័ពជើងគោកកម្ពុជា និងរុស្ស៊ីគ្រោងចុះហត្ថលេខាលើអនុស្សរណៈយោគយល់ (MoU) ស្តីពីកិច្ចសហប្រតិបត្តិការរវាងកងទ័ពជើងគោកកម្ពុជា-រុស្ស៊ីនៅឆ្នាំ ២០២២។ កងទ័ពជើងគោកនៃកងយោធពលខេមរភូមិន្ទ
ភ្នំពេញៈ មេបញ្ជាការកងទ័ពជើងគោកកម្ពុជា និងរុស្ស៊ីគ្រោងចុះហត្ថលេខាលើអនុស្សរណៈយោគយល់ (MoU) ស្តីពីកិច្ចសហប្រតិបត្តិការរវាងកងទ័ពជើងគោកកម្ពុជា-រុស្ស៊ីនៅឆ្នាំ ២០២២ ដើម្បីជំរុញសន្ទុះទំនាក់ទំនងកិច្ចសហប្រតិបត្តិការរវាងកងទ័ពជើងគោកនៃប្រទេសទាំងពីរឱ្យកាន់តែរឹងមាំ។
ការប្រកាសគម្រោងចុះ MoU នេះធ្វើឡើងក្នុងជំនួបកាលពីថ្ងៃទី ១៦ ធ្នូ រវាងលោក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក និងលោក Nikolai Patrushev លេខាធិការក្រុមប្រឹក្សាសន្តិសុខនៃសហព័ន្ធរុស្ស៊ី ដែលបានដឹកនាំគណៈប្រតិភូជាន់ខ្ពស់ក្រុមប្រឹក្សាសន្តិសុខរុស្ស៊ីមកបំពេញទស្សនកិច្ចនៅកម្ពុជាពីថ្ងៃទី ១៤ ដល់ថ្ងៃទី ១៦ ធ្នូ។
សេចក្តីប្រកាសព័ត៌មានកងទ័ពជើងគោកនៃកងយោធពលខេមរភូមិន្ទ បានឱ្យដឹងនៅថ្ងៃទី ១៧ ធ្នូ ថា៖ «នៅឆ្នាំ ២០២២ ខាងមុខនេះ មេបញ្ជាការកងទ័ពជើងគោកនៃប្រទេសទាំងពីរ [កម្ពុជា-រុស្ស៊ី] ក៏គ្រោងនឹងជួបគ្នាម្តងទៀត ដើម្បីចុះហត្ថលេខាលើអនុស្សរណៈយោគយល់ (MoU) ស្តីពីកិច្ចសហប្រតិបត្តិការរវាងកងទ័ពជើងគោកកម្ពុជា-រុស្ស៊ី ដែលជាមូលដ្ឋានដ៏សំខាន់ក្នុងការជំរុញសន្ទុះទំនាក់ទំនងកិច្ចសហប្រតិបត្តិការរវាងកងទ័ពជើងគោកនៃប្រទេសទាំងពីរឱ្យកាន់តែរឹងមាំ»។
សេចក្តីប្រកាសព័ត៌មានដកស្រង់សំដីលោក ហ៊ុន ម៉ាណែត ថ្លែងក្នុងជំនួបនេះ ថា ទំនាក់ទំនងមិត្តភាព និងកិច្ចសហប្រតិបត្តិការលើគ្រប់វិស័យរវាងប្រទេសទាំងពីរ ជាពិសេសវិស័យយោធា កំពុងត្រូវបានពង្រឹង និងពង្រីកឥតឈប់ឈរ ក្នុងស្មារតីមិត្តភាពជាប្រពៃណី ជាមួយនឹងការគោរពជឿទុកចិត្តគ្នា និងជួយគ្នាទៅវិញទៅមកគ្រប់កាលៈទេសៈ តាំងពីអតីតកាលរហូតមកដល់បច្ចុប្បន្ន។
ប្រភពដដែលដកស្រង់សំដីលោក Patrushev ថាការអភិវឌ្ឍកិច្ចសហប្រតិបត្តិការផ្នែកយោធារវាងប្រទេសទាំងពីរ គឺមានសក្តានុពលជាវិជ្ជមាន និងបានចាត់ទុកកម្ពុជាជាដៃគូមានទំនុកចិត្តនៅក្នុងតំបន់អាស៊ីអាគ្នេយ៍ ព្រមទាំងបានចាត់ទុកកិច្ចសហប្រតិបត្តិការផ្នែកសន្តិសុខ គឺជា មូលដ្ឋានគ្រឹះនៃទំនាក់ទំនងទ្វេភាគីរវាងប្រទេសទាំងពីរ។
បើតាមសេចក្តីប្រកាសព័ត៌មានលោក Patrushev បានប្រកាសការប្តេជ្ញាចិត្ត និងការត្រៀមខ្លួនរបស់រុស្ស៊ីក្នុងការជំរុញទំនាក់ទំនងរវាងប្រទេសទាំងពីរឱ្យកាន់តែជិតស្និទ្ធបន្ថែមទៀត ជាពិសេសកិច្ចសហប្រតិបត្តិការក្នុងវិស័យប្រឆាំងភេរវកម្ម សន្តិសុខព័ត៌មានអន្តរជាតិ និងឧក្រិដ្ឋកម្មឆ្លងដែនជាដើម។
ប្រភពដដែលបានដកស្រង់សំដីលោក Oleg Salyukov អគ្គមេបញ្ជាការកងទ័ពជើងគោករុស្ស៊ី ថ្លែងក្នុងជំនួបនេះថា រុស្ស៊ីត្រៀមខ្លួនជានិច្ចក្នុងការអនុវត្តសកម្មភាពកិច្ចសហប្រតិបត្តិការនានា ជាពិសេសការជួយដល់កងទ័ពជើងគោកកម្ពុជាលើការបណ្តុះបណ្តាលធនធានមនុស្សលើមុខជំនាញផ្សេងៗ។
នេះជាជំនួបលើកទី ២ រវាងលោក ហ៊ុន ម៉ាណែត ជាមួយលោក Patrushev និងលោក Salyukov បន្ទាប់ពីជំនួបលើកទី ១ ក្នុងដំណើរទស្សនកិច្ចរបស់លោក ហ៊ុន ម៉ាណែត ទៅកាន់រដ្ឋធានីម៉ូស្គូ ប្រទេសរុស្ស៊ី កាលពីឆ្នាំ ២០១៩៕
