ជនជាតិដើមភាគតិចសម្តែងរបាំក្នុងពិធីប្រារព្ធខួប ៦០ ឆ្នាំនៅថ្ងៃ ៣០ ធ្នូ ថ្ងៃបង្កើតខេត្តមណ្ឌលគិរី។ រូបថត រដ្ឋបាលខេត្តមណ្ឌលគិរី
មណ្ឌលគិរីៈ រដ្ឋបាលខេត្តមណ្ឌលគិរី នៅរសៀលថ្ងៃទី ៣០ ធ្នូ បានប្រារព្ធពិធីអបអរសាទរ ខួបអនុស្សាវរីយ៍លើក ទី ៦០ ឆ្នាំ នៃការបង្កើតខេត្តមណ្ឌលគិរី ជាខេត្តដែលស្ថិតនៅភាគឦសាននៃប្រទេសកម្ពុជា ដែលសម្បូរទៅដោយជនជាតិដើមភាគតិចជាច្រើនអម្បូររស់នៅ និងសម្បូរទៅដោយព្រៃឈើ និងធនធានធម្មជាតិ។
បើតាមរដ្ឋបាលខេត្តនេះ អញ្ជើញជាគណៈអធិបតីភាព ក្នុងពិធីអបអរសាទរ ខួបអនុស្សាវរីយ៍លើកទី ៦០ ឆ្នាំ (៣០ ធ្នូ ១៩៦១ ដល់ ៣០ ធ្នូ ២០២១) នៃការបង្កើតខេត្តមណ្ឌលគិរីនេះ មានលោក ម៉ែន ង៉ុយ ប្រធានក្រុមប្រឹក្សាខេត្តមណ្ឌលគិរី លោក ថង សាវុន អភិបាលខេត្ត លោក ណយ ស្រូន សមាជិកព្រឹទ្ធសភាភូមិភាគទី ៨។
ក្នុងពិធីនោះដែរ ក៏មានការអញ្ជើញចូលរួមពីសំណាក់ សមាជិកក្រុមប្រឹក្សាខេត្ត អភិបាលរងខេត្ត ព្រះរាជអាជ្ញា ព្រះរាជអាជ្ញារងអមសាលាដំបូងខេត្ត ថ្នាក់ដឹកនាំមន្ទីរអង្គភាពជុំវិញខេត្ត កងកម្លាំងប្រដាប់អាវុធទាំងបីប្រភេទ អភិបាលក្រុង/ស្រុកទាំង០៥ ក្រុមយុវជន និងប្រជាពលរដ្ឋជាច្រើនរូប ដែលប្រព្រឹត្តទៅនៅវិមានឯករាជ្យ សួនច្បារសែនមនោរម្យ ស្ថិតនៅទីរួមខេត្តមណ្ឌលគិរី។
ក្នុងពិធីនោះដែរ ថ្នាក់ដឹកនាំខេត្ត និងមន្ត្រីរាជការ បានអញ្ជើញទស្សនាពិព័រណ៍សមិទ្ធផលនានារបស់មន្ទីរអង្គភាព និងមានការបញ្ចាំងស្លាយ និងវីដេអូឃ្លីប ស្តីពីការបង្កើតខេត្ត ឈ្មោះអតីតថ្នាក់ដឹកនាំខេត្ត និងសមិទ្ធផលរបស់ខេត្តមណ្ឌលគិរី។
នៅក្នុងពិធីនេះ ក៏មានការសម្ដែងសិល្ប: ប្រគំតន្ត្រី និងមានការបាញ់កាំជ្រួច ដើម្បីអបអរ និងទស្សនាក្នុងពិធីនេះផងដែរ។
បច្ចុប្បន្នខេត្តមណ្ឌលគិរី ដែលសម្បូរទៅដោយជនជាតិដើមភាគតិចរស់នៅ បានក្លាយទៅជាគោលដៅទេសចរណ៍ដ៏ទាក់ទាញមួយក្នុងចំណោមបណ្តាខេត្តភាគឦសាននៃប្រទេសកម្ពុជា ដោយសារតែមានព្រៃឈើ ទឹកជ្រោះ និងធម្មជាតិស្រស់បំព្រងគួរជាទីគយគន់៕
