លោកនាយករដ្ឋមន្ត្រី ហ៊ុន សែន ថ្លែងកាលពីម្សិលមិញ។ រូបថត SPM
ភ្នំពេញៈ ប្រមុខរាជរដ្ឋាភិបាលកម្ពុជាបានដាក់បទបញ្ជា និងសុំការយោគយល់ចំពោះការមិនអនុញ្ញាតឱ្យអ្នកជំងឺដែលឆ្លងនូវវីរុសកូវីដ ១៩ បំប្លែងថ្មីប្រភេទអូមីក្រុងសម្រាកព្យាបាលនៅផ្ទះជាដាច់ខាត ដោយត្រូវតែទៅសម្រាកព្យាបាលនៅមន្ទីរពេទ្យ ដោយសារជំងឺនេះឆ្លងលឿនដែលអាចនឹងមានការរីករាលដាលដល់សមាជិកគ្រួសារក្នុងផ្ទះ។
លោកនាយករដ្ឋមន្ត្រី ហ៊ុន សែន បានថ្លែងដូច្នេះក្នុងពិធីប្រគល់ប្រាក់រង្វាន់ជូនកីឡាការិនី អ៊ុក ស្រីមុំ បន្ទាប់ពីដណ្តើមបានមេដាយមាសពិភពលោកពីការប្រកួតប៉េតង់ នៅទីក្រុងសាន់តាស៊ូសាណា ប្រទេសអេស្ប៉ាញនាព្រឹកថ្ងៃទី ៥ ខែមករា ឆ្នាំ ២០២២ នេះ។
លោកបានមានប្រសាសន៍ថា៖ «រឿងអូមីក្រុងមិនមែនជារឿងធំទេ ប៉ុន្តែអ្វីដែលខ្ញុំសុំការយោគយល់ និងដាក់បទបញ្ជាដាច់ខាតនេះគឺ បើយើងឱ្យព្យាបាលនៅក្នុងផ្ទះ តែទប់មិនជាប់ជាមួយនឹង កូនចៅនៅជាមួយ រួចវារាលដាលនៅក្នុងផ្ទះ ហើយរាលដាលឆ្លងចូលក្នុងសហគមន៍ នោះវានឹងឈានដល់ចំណុចដើរថយក្រោយហើយ»។
លោកនាយករដ្ឋមន្ត្រីមិនអាចទទួលយកបានទេសម្រាប់អ្នកដែលកើតវីរុសអូមីក្រុងនេះហើយស្នើសុំសម្រាកព្យាបាលនៅគេហដ្ឋាន គឺត្រូវតែយកទៅព្យាបាលនៅមន្ទីរពេទ្យរហូតជាសះស្បើយ ទើបអនុញ្ញាតឱ្យត្រឡប់ទៅផ្ទះវិញ ប៉ុន្តែលោកអនុញ្ញាតឱ្យអ្នកជំងឺកូវីដ ១៩ ប្រភេទដែលតា និងអាល់ហ្វាដែលមានកម្រិតស្រាលអាចសម្រាកព្យាបាលនៅផ្ទះបាន ដោយសារល្បឿននៃកម្រិតឆ្លងយឺត។
លោក ហ៊ុន សែន មានប្រសាសន៍ថា៖ «មកដល់ពេលនេះយើងមានអ្នកឆ្លងវីរុសអូមីក្រុងចំនួន ៩៤ ករណី ប៉ុន្តែក៏មានការជាសះស្បើយមួយចំនួនហើយ ហើយអ្នកដែលមិនទាន់ជា យើងមិនអនុញ្ញាតឱ្យសម្រាកព្យាបាលនៅផ្ទះទេ។ ខ្ញុំដាក់បទបញ្ជានេះ ព្រោះដើម្បីកុំតែសេចក្តីសុខរបស់បុគ្គលម្នាក់ ស្រាប់តែផលប៉ះពាល់ចេញទៅកូន ប្រពន្ធ ហើយនឹងឆ្លងរាលដាលពេញទីក្រុងភ្នំពេញតែម្តង»។
លោក ហ៊ុន សែន ស្នើឱ្យធ្វើការប្រុងប្រយ័ត្នខ្ពស់ចំពោះវីរុសអូមីក្រុងនេះ នៅតាមព្រលានយន្តហោះ ដូចជា រាជធានី-ភ្នំពេញ សៀមរាប និងខេត្តព្រះសីហនុ ហើយក្រៅពីនោះក៏ត្រូវតែប្រុងប្រយ័ត្នទៅលើពលករដែលឆ្លងដែនមកពីប្រទេសថៃ ដោយសារនៅប្រទេសថៃ ករណីឆ្លងអូមីក្រុងនេះមានជាង ២ ០០០ ករណីហើយ ប៉ុន្តែនៅប្រទេសវៀតណាម មានជាង ១០ ករណីប៉ុណ្ណោះ។
ជាមួយគ្នានេះដែរ លោកនាយករដ្ឋមន្ត្រី ក៏បានសម្រេចឱ្យរៀបចំមន្ទីរពេទ្យហ្លួងម៉ែដើម្បីដាក់អ្នកជំងឺកូវីដ ១៩ ប្រភេទអូមីក្រុង ដែលបច្ចុប្បន្នអ្នកជំងឺនេះដាក់ឱ្យសម្រាកព្យាបាលនៅមជ្ឈមណ្ឌលជាតិរោគរបេង និងហង់សិន។
លោកនាយករដ្ឋមន្ត្រី ថា អ្នកជំងឺទាំងអស់ដែលកើតអូមីក្រុងនេះនៅគ្រប់ទីកន្លែងទាំងអស់ត្រូវព្យាបាលនៅមន្ទីរពេទ្យ ទាំងនៅរាជធានីភ្នំពេញ ខេត្តព្រះសីហនុ និងខេត្តសៀមរាប។
លោកនាយករដ្ឋមន្ត្រី ហ៊ុន សែន ថា៖ «អ្នកមកពីក្រៅប្រទេស បើដឹងថាឆ្លងហើយ ត្រូវតែចូលមន្ទីរពេទ្យ ទោះបីអ្នកនោះមានផ្ទះធំប៉ុនណាក៏ដោយ។ សូម្បីតែខ្ញុំ ពេលខ្ញុំទៅប្រទេសមីយ៉ាន់ម៉ា ត្រឡប់មកវិញមានបញ្ហានេះ ខ្ញុំក៏ទៅពេទ្យដែរ។ ខ្ញុំនឹងធ្វើជាគំរូគេចំពោះបញ្ហានេះ ដោយមិនថាអ្នកមាន អ្នកក្រ អ្នកតូច អ្នកធំ ទេ គឺត្រូវតែទៅព្យាបាលនៅមន្ទីរពេទ្យ»។
លោកថា៖ «ប្រសិនបើមានការឆ្លងចូលសហគមន៍ទៀត ជម្រើសមានតែមួយទេគឺបិទខ្ទប់ម្តងទៀត។ ដើម្បីកាត់ផ្តាច់វិធីតែមួយគត់គឺឱ្យនៅតែក្នុងផ្ទះតែម្តង។ អ៊ីចឹង!តើសុខចិត្តទេ? ប្រជាពលរដ្ឋច្បាស់ជាមិនសុខចិត្តទេ»។
ជាមួយគ្នានេះដែរ អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានលើកឡើងដោយយោងលើឯកសារមួយចំនួនរបស់អ្នកវិទ្យាសាស្ត្ររបស់សហរដ្ឋអាមេរិក ថា ពពួកវីរុសអូមីក្រុងមានការឆ្លងលឿនដោយសារវាប៉ះពាល់ជាមួយនឹងផ្នែកដង្ហើមខាងលើ (upper respiratory) របស់មនុស្ស។
លោកស្រីបានឱ្យដឹងថា៖ «ដូចនេះ លទ្ធភាពនៃការខ្ទាតចេញមេរោគពីអ្នកជំងឺដែលមិនបានពាក់ម៉ាស់ តាមរយៈការនិយាយស្តី ការក្អក កណ្តាស់ ឬដកដង្ហើម ដែលធ្វើឱ្យវីរុសនេះចេញលឿន បើធៀបជាមួយនឹងវីរុសដែលតា»។
វីរុសប្រភេទដែលតាមានការវាយលុកខ្លាំងទៅផ្នែកសួតខាងក្រោម ប៉ុន្តែអូមីក្រុងមានតិចតួចណាស់ដែលទៅវាយលុកទៅផ្នែកសួតខាងក្រោម។ ហេតុនេះហើយបានជាធ្វើឱ្យលទ្ធភាពនៃការចម្លងរបស់វីរុសអូមីក្រុងបានលឿនជាង រហ័សជាងវីរុសប្រភេទដែលតា។ នេះបើតាមការបញ្ជាក់ពីលោកស្រី ឱ វណ្ណឌីន។
នាឱកាសនោះដែរ លោកនាយករដ្ឋមន្ត្រីក៏បានស្នើឱ្យអភិបាលរាជធានីភ្នំពេញ និងក្រសួងសុខាភិបាលត្រូវពន្លឿនការធ្វើមន្ទីរពេទ្យសម្រាប់ព្យាបាលអ្នកជំងឺកូវីដ ១៩ ដើម្បីរំដោះយកអ្នកជំងឺចាកពីពហុកីឡដ្ឋានជាតិអូឡាំពិក ដែលការសាងសង់មន្ទីរពេទ្យត្រូវចំណាយរយៈពេល ១ ឆ្នាំ។
លោកបានថ្លែងថា៖ «ពិតហើយ! អ្នកជំងឺនៅសល់ចំនួនតិច ដែលមកដល់ពេលនេះអ្នកជំងឺទាំងអស់ដែលនៅសល់មានជាង ៥០០ នាក់ ដោយក្នុងនោះអ្នកជំងឺដែលកំពុងសម្រាកព្យាបាលនៅក្នុងបន្ទប់សង្គ្រោះបន្ទាន់មានចំនួនតែ ១២៦ នាក់ប៉ុណ្ណោះនៅទូទាំងប្រទេស»។
ទោះបីជាអ្នកជំងឺកូវីដ ១៩ មានការថយចុះក៏ដោយ ក៏លោកនៅតែត្រៀមបម្រុងទុក និងបង្ការក្នុងករណីមានការរីករាលដាលវីរុសនេះឡើងវិញ។
លោក ហ៊ុន សែន ថា៖ «យើងមិនអាចលេងសន្លឹកបៀឱ្យអស់ពីដៃនោះទេ ត្រូវតែបម្រុងទុកនូវហេតុការណ៍អាក្រក់ដែលកើតឡើង ហើយមកដល់ពេលនេះយើងបានសងមជ្ឈមណ្ឌលនានារួចហើយផងដែរ ប៉ុន្តែយើងត្រូវបម្រុងទុកមជ្ឈមណ្ឌលពហុកីឡដ្ឋានជាតិអូឡាំពិក ហើយយើងក៏ត្រូវការនូវកន្លែងមួយទៀតដើម្បីធ្វើជាមជ្ឈមណ្ឌលព្យាបាលដែលអាចដាក់ចំនួនមនុស្សបានច្រើន»។
លោកថា៖ «មិនអាចធ្វេសប្រហែសបានទេ នូវករណីដែលវារីករាលដាលភ្លាមៗ យើងមិនអនុញ្ញាតឱ្យមានអ្នកដែលដេកនៅតាមផ្លូវ ហើយខ្វះកន្លែងព្យាបាលនោះទេ»។
ដោយឡែកទាក់ទងការចាក់វ៉ាក់សាំងកូវីដ ១៩ លោកនាយករដ្ឋមន្ត្រីបានសម្រេចអនុញ្ញាតឱ្យមានការចាក់វ៉ាក់សាំងកូវីដ ១៩ ដូសទី ៤ ទៅដល់ផ្នែកអាទិភាពដូចជា នគរបាល កងទ័ព អាវុធហត្ថ មន្ត្រីរាជការ កីឡាករ-កីឡាការិនី ពិធីករ-ពិធីការិនី អ្នកយកព័ត៌មាន ឬក្រុមសិល្បៈជាដើម។
លោក ហ៊ុន សែន ថ្លែងថា៖ «អ្នកដែលត្រូវចាក់ដូសទី ៤ គឺត្រូវចាក់ដល់មន្ត្រីជួរមុខ ដែលប្រឈមនឹងហានិភ័យ។ យើងមានវ៉ាក់សាំងប្រភេទ Pfizer ជាង ២,៣ លានដូស តែខ្ញុំគិតថា យើងប្រើតែប្រហែលជា ៧០ ម៉ឺនដូសគឺគ្រប់គ្រាន់ហើយ»៕
វីដេអូ៖
