ក្រុមការងារ CMAC បោសសម្អាតគ្រាប់មិនទាន់ផ្ទុះ នាពេលកន្លងទៅ។ រូបថត CMAC
ភ្នំពេញៈ មជ្ឈមណ្ឌលសកម្មភាពកំចាត់មីនកម្ពុជា CMAC មានផែនការរំដោះផ្ទៃដីរងផលប៉ះពាល់ ដោយសារគ្រាប់មីន តំបន់គ្រាប់បែកចង្កោម និងតំបន់សំណល់គ្រាប់យុទ្ធភណ្ឌពីសង្គ្រាមនានា ឱ្យបានចំនួនប្រមាណជិត ២០០ គីឡូម៉ែត្រក្រឡា នៅក្នុងឆ្នាំ ២០២២ ដែលតួលេខនេះ កើនឡើង ជិត ៩០ ភាគរយ បើប្រៀបធៀបទៅនឹងផែនការឆ្នាំ ២០២១។ នេះបើតាមលោក ហេង រតនា អគ្គនាយក CMAC។
លោកបានថ្លែងនៅថ្ងៃទី ៤ ខែមករាថា ផែនការរំដោះផ្ទៃដី ចំនួនប្រមាណជិត ២០០ គីឡូម៉ែត្រក្រឡានៅក្នុងឆ្នាំ ២០២២ នេះ គឺមានការកើនឡើង ជិត ៩០ ភាគរយ បើប្រៀបធៀបក្នុងឆ្នាំ ២០២១ កន្លងទៅ ដែលមានចំនួនតែ ១១៧ គីឡូម៉ែត្រក្រឡា។
លោកបានថ្លែងថា៖ «នេះជារបត់ថ្មីនៃយុទ្ធសាស្ត្រដើម្បីគាំទ្រផែនការយុទ្ធសាស្ត្រ និងការប្តេជ្ញាចិត្តរបស់រាជរដ្ឋាភិបាល គឺចុងឆ្នាំ ២០២៥" កម្ពុជាគ្មានការគំរាមកំហែងដោយសារគ្រាប់មីនប្រឆាំងមនុស្ស" ដែលការប្តេជ្ញាចិត្តនេះ ស្របតាមស្មារតីនៃអនុសញ្ញាអន្តរជាតិអូតាវ៉ា នៃការហាមប្រាមការប្រើប្រាស់គ្រាប់មីនប្រឆាំងមនុស្ស»។
លោក ហេង រតនា លើកឡើងថា ផែនការយុទ្ធសាស្ត្រ ១ ទៀត CMAC និងបង្កើនការងារអប់រំ និងជួយសង្គ្រោះជនពិការដោយសារមីន ទៅដល់ខ្នងផ្ទះចំនួនជាង ៦០ ម៉ឺន ដែលគិតពីចំនួនមនុស្សប្រមាណជាង ១ លាននាក់ ព្រមទាំងពង្រឹងបណ្តាញនៅតាមតំបន់ដែលមានការគំរាមកំហែងទាប ដូចជានៅខេត្តកែប ខេត្តកំពត កោះកុង កំពង់ស្ពឺ និងតាកែវជាដើម។ CMAC នឹងខិតខំធ្វើការក្នុងតំបន់ខេត្តទាំងនេះ ឱ្យទៅជាខេត្តគ្មានការគំរាមកំហែង ដោយសារគ្រាប់មីនប្រឆាំងមនុស្សក្នុងឆ្នាំ ២០២២។
បន្ថែមលើនោះ CMAC នឹងបន្តខិតខំក្នុងការហ្វឹកហ្វឺន កិច្ចសហប្រតិបត្តិការអន្តរជាតិ និងធ្វើការងារកំណែទម្រង់ផ្ទៃក្នុងដើម្បីបង្កើនប្រសិទ្ធភាពការងារក្នុងឆ្នាំ ២០២២ ឈានដល់ឆ្នាំ ២០២៥ ខាងមុខនេះ តាមរយ:ការពង្រឹងសមត្ថភាព និងវិន័យ ជំនាញកម្លាំងជួរមុខ អ្នកគ្រប់គ្រងជួរកណ្តាល តាមភូមិភាគ/ខេត្ត បំពាក់សម្ភារបច្ចេកទេស និងបទដ្ឋានប្រតិបត្តិ។
លោក ហេង រតនា ប្រាប់ទៀតថា ក្នុងឆ្នាំ ២០២២ នេះ CMAC ក៏មានយុទ្ធសាស្ត្រសំខាន់មួយទៀតគឺ កំពុងតែជំរុញការងារបោសសម្អាតមីន ដើម្បីគាំទ្រការអភិវឌ្ឍសេដ្ឋកិច្ចជាពិសេសក្រោយបរិបទបញ្ហាកូវីដ ១៩។ លោកថ្លែងថា៖ «យើងសំដៅទៅតំបន់មួយចំនួនឱ្យអស់សមត្ថភាពដែលអាចធ្វើទៅបាន ដើម្បីគាំទ្រការអភិវឌ្ឍសេដ្ឋកិច្ចសង្គម ដូចជាតំបន់ទេសចរណ៍ វប្បធម៌ធម្មជាតិ តំបន់ប្រាសាទ ហើយនិងតំបន់នៃការផ្តល់ដីសង្គមកិច្ច ជូនអ្នកក្រីក្រគ្មានដីដើម្បីធ្វើការអភិវឌ្ឍ មានន័យថា តំបន់អស់ហ្នឹងជាតំបន់អាទិភាពរបស់យើង ហើយបូកបន្ថែមនឹងតំបន់តាមបណ្តោយព្រំដែនទាំងអស់»។ បើតាមលោក ហេង រតនា មហិច្ឆតារបស់អង្គភាពស៊ីម៉ាក់ អាចដោះស្រាយបញ្ហាតំបន់គ្រាប់មីននៅសេសសល់ដែលមានកំណត់ត្រាក្នុងទិន្នន័យជាតិបានប្រមាណជាង ៩០% ពោលគឺប្រមាណជាង ៧០០ គីឡូម៉ែត្រក្រឡា ក្នុងរយ:ពេល ៤ ឆ្នាំខាងមុខនេះ។
ដើម្បីសម្រេចផែនការឆ្នាំ ២០២២ នេះ និងទៅមុខទៀត អង្គភាពស៊ីម៉ាក់ បានទទួលនូវការគាំទ្រទាំងថវិកា សម្ភារបច្ចេកទេស និងការឧបត្ថម្ភពីរាជរដ្ឋាភិបាលជប៉ុនផ្ទាល់ រដ្ឋាភិបាលជប៉ុនតាមរយ: JICA និងតាមរយ:អង្គការ JMAS រដ្ឋាភិបាលចិន រដ្ឋាភិបាលអាមេរិក តាមរយ:អង្គការ NPA រដ្ឋាភិបាលន័រវែស តាមរយ:អង្គការ NPA រដ្ឋាភិបាលប៊ែលហ្ស៊ិក តាមរយ:អង្គការ APOPO និងរដ្ឋាភិបាលអូស្ត្រាលី កូរ៉េខាងត្បូង និងកាណាដា តាមរយ:យន្តការពហុភាគី UNDP/CMAA និងដៃគូមួយចំនួនទៀតផងដែរ ។
លោកទេសរដ្ឋមន្ត្រី លី ធុច អនុប្រធានទី ១ អាជ្ញាធរមីន ថ្លែងនៅថ្ងៃទី ៤ ខែមករាថា លោកមានការជឿជាក់ថា ផែនការរបស់អង្គភាពស៊ីម៉ាក់ពិតជាជំហានមួយដ៏ធំសម្រាប់សម្រេចឱ្យបានជោគជ័យនៃគោលដៅរបស់រាជរដ្ឋាភិបាលគឺ នៅក្នុងឆ្នាំ ២០២៥ កម្ពុជាគ្មានមីន ហេតុនេះ រាល់ប្រតិបត្តិករទាំងអស់ មានផែនការរបស់ខ្លួន ដើម្បីចូលរួមអនុវត្តគោលដៅនេះឱ្យបានជោគជ័យ។
លោក លី ធុច បានថ្លែងអំណរគុណទៅដល់សហគមន៍ផ្តល់ជំនួយទាំងអស់ដែលនៅតែបន្តផ្តោតការយកចិត្តទុកដាក់ដល់កម្ពុជា មិនថាមានវិបត្តិកូវីដ ១៩ កើតឡើងក៏ដោយ។ ដោយឡែកអាជ្ញាធរមីន ក៏បាននិងកំពុងស្វែងរកដៃគូថ្មីបន្ថែមទៀតគឺក្នុងវិស័យឯកជននៅកម្ពុជាដើម្បីឱ្យពួកគេចូលរួមក្នុងវិស័យមនុស្សធម៌សម្រាប់ការងារបោសសម្អាតមីន។
លោកថ្លែងថា៖ «យើងមានផែនការដោះតាមភូមិ ដែលមានការគំរាមកំហែងដោយសារជាតំបន់ងើបពីសង្គ្រាម អ៊ីចឹងក្នុងភូមិនីមួយៗ ក្រុមហ៊ុនឯកជននីមួយៗ អាចផ្តល់ការគាំទ្រដល់ការដោះមីននៅតាមចម្ការមីននីមួយៗ តាមភូមិរបស់យើងដែលយើងមាន»៕
