លោក ស៊ុន ចាន់ថុល និងក្រុមការងារចុះពិនិត្យផ្លូវក្នុងក្រុងសៀមរាប នៅថ្ងៃទី ៩ ខែមករា។ រូបថត ក្រសួងសាធារណការ
សៀមរាបៈ ផ្លូវទាំង ៣៨ ខ្សែ នៅក្រុងសៀមរាប ដែលជាគម្រោងស្ថាបនាហេដ្ឋារចនាសម្ព័ន្ធឱ្យមានភាពល្អប្រសើរបានបញ្ចប់ការស្ថាបនា ១០០ ភាគរយហើយ ប៉ុន្តែការតុបតែងដោយដាក់អំពូលលម្អផ្លូវ និងបំពាក់កាមេរ៉ាសុវត្ថិភាពទើបសម្រេចបានជាង ៧០ ភាគរយ។ នេះបើតាមរដ្ឋមន្ត្រីក្រសួងសាធារណការ និងដឹកជញ្ជូនលោក ស៊ុន ចាន់ថុល។
ក្នុងអំឡុងពេលដឹកនាំក្រុមការងារចុះពិនិត្យវឌ្ឍនភាពការងារស្ថាបនាហេដ្ឋារចនាសម្ព័ន្ធផ្លូវចំនួន ៣៨ ខ្សែ ក្នុងក្រុងសៀមរាប នាថ្ងៃទី ៩ ខែមករា លោក ស៊ុន ចាន់ថុល ថ្លែងថា ជារួមការសាងសង់ផ្លូវទាំងអស់ ៣៨ ខ្សែរួចរាល់ ១០០ ភាគរយហើយ និងត្រៀមដាក់សម្ពោធឱ្យប្រើប្រាស់ជាផ្លូវការនាពេលខាងមុខ។
លោកថា៖ «គិតមកដល់ថ្ងៃទី ២៩ ខែធ្នូ ឆ្នាំ ២០២១ យើងបានបញ្ចប់ជាស្ថាពរ ១០០ ភាគរយលើការសាងសង់ផ្លូវទាំងអស់ទាំង ៣៨ ខ្សែ។ ប៉ុន្តែចំពោះការដាក់បរិក្ខារផ្លូវថ្នល់ ដូចជាបង្គោលភ្លើង ភ្លើងស្តុបចរាចរណ៍ក៏ដូចជាដាក់កាមេរ៉ា យើងធ្វើបាន ៧២ ភាគរយទេ ប៉ុន្តែជារួមផ្លូវធ្វើហើយ ១០០ ភាគរយតាមការគ្រោងទុក»។
លោកបន្តថា ពាក់ព័ន្ធការសម្ពោធដាក់ឱ្យប្រើប្រាស់ជាផ្លូវការនោះ មិនទាន់អាចកំណត់កាលបរិច្ឆេទបាននៅឡើយទេ ដោយរង់ចាំគោរពស្នើសុំលោកនាយករដ្ឋមន្ត្រី ហ៊ុន សែន ដើម្បីរកពេលវេលាសមស្រប។
ទន្ទឹមនឹងមានហេដ្ឋារចនាសម្ព័ន្ធស្អាតនេះដែរ លោក ស៊ុន ចាន់ថុលស្នើឱ្យពលរដ្ឋចូលរួមថែរក្សាទាំងអស់គ្នាដើម្បីប្រើប្រាស់ជាប្រយោជន៍រួមបានយូរ។
លោកបន្តថា ទន្ទឹមនឹងការសាងសង់ផ្លូវ ៣៨ខ្សែ ក៏មានសាងសង់លូទឹកភ្លៀង និងលូទឹកកខ្វក់ប្រវែង ២៥០ គីឡូម៉ែត្រ ផងដែរ និងដាក់កាមេរ៉ាសុវត្ថិភាព ២០០ កន្លែង ភ្លើងស្តុប ២០ កន្លែង ដាក់បង្គោលភ្លើង ៥ ៣០០ បង្គោល ដាំដើមឈើ ៣ ១២៥ ដើម ដើម្បីលើកសោភណភាពផ្លូវឱ្យកាន់តែល្អបន្ថែមទៀត។
លោកបានថ្លែងឱ្យដឹងដែរថា ក្រៅពីផ្លូវ ៣៨ ខ្សែនេះ ក៏មានសង់ផ្លូវ ២ ខ្សែទៀត ចាប់ពីស្តុបសណ្ឋាគារសុខាទៅព្រលានយន្តហោះប្រវែង ៥ គីឡូម៉ែត្រ ដែលពង្រីកដល់ ៨ គន្លងទៅ ៤ មក ៤ គន្លង ដែលនឹងបញ្ចប់នៅចុងខែមករា ឆ្នាំ ២០២២ នេះ ដោយប្រើថវិកាបន្ថែមប្រមាណ ៩ លានដុល្លារអាមេរិក។ ចំណែក ១ ខ្សែទៀត ពីស្តុបសណ្ឋាគារសុខា ទៅផ្លូវស៊ីវត្ថា ប្រវែងជាង ១ ៥០០ ម៉ែត្រត្រូវបានស្ថាបនាចប់សព្វគ្រប់ហើយ។
លោក គង់ រតនៈ ប្រធានវិទ្យាស្ថានជាតិសុវត្ថិភាពចរាចរណ៍ផ្លូវគោកមិនអាចធ្វើការវាយតម្លៃបានចំពោះដំណើរការទាំងស្រុង នៃការសាងសង់ផ្លូវទាំង ៣៨ ខ្សែនេះស្ថិតក្នុងកម្រិតណានោះទេ។ ប៉ុន្តែលោកមើលឃើញថា ការចុះត្រួតពិនិត្យរបស់ថ្នាក់ដឹកនាំទាំងនេះ បង្ហាញពីការយកចិត្តទុកដាក់ ក្នុងការពង្រឹងគុណភាពនៃការសាងសង់ ចៀសវាងការធ្វេសប្រហែស ជាពិសេសការសាងសង់ដែលមិនគោរពទៅតាមស្តង់ដាបច្ចេកទេស។
លោកបញ្ជាក់ថា៖ «សម្រាប់ខ្ញុំ រាល់ការអភិវឌ្ឍដែលមានការចូលរួមលើកទឹកចិត្ត និងគាំទ្រ គឺជារឿងដែលប្រសើរ ដើម្បីផ្តល់គំរូទាំងនេះទៅដល់កន្លែងផ្សេងៗទៀតនៃស្ថាប័នសាធារណៈហ្នឹង គឺសូមឱ្យគាត់បង្ហាញតម្លាភាព តាមរយៈឱ្យមានការចូលរួមនៅក្នុងការត្រួតពិនិត្យសមិទ្ធផលនានា ក៏ដូចជាឱ្យប្រជាពលរដ្ឋបានដឹង»។
ក្រៅពីចូលរួមសាទរ លោក គង់ រតនៈ ថ្លែងថា គម្រោងនេះ វានឹងផ្តល់ផលដ៏ធំធេងដល់ប្រជាពលរដ្ឋ និងសង្គមជាតិ ក្នុងរយៈពេលវែង។
សូមជម្រាបថា គម្រោងសាងសង់ផ្លូវទាំង ៣៨ ខ្សែក្នុងក្រុងសៀមរាបនេះ គឺមានប្រវែងសរុប ១០៦,៤២៤ គីឡូម៉ែត្រ ប្រើប្រាស់ថវិកាជាតិសរុបជាង ១៤៩ ២១៦ ៥៩៥ ដុល្លារ ដោយក្នុងនោះចំនួន ៩ លានដុល្លារ ចំណាយលើការងារចាំបាច់ក្នុងការរៀបចំស្ថាបនាប្រព័ន្ធបង្ហូរទឹកភ្លៀង និងទឹកកខ្វក់ស្ថិតក្រៅក្នុងគម្រោងសាងសង់ផ្លូវទាំង ៣៨ ខ្សែនេះ៕
