លោក ហ៊ុន សែន ជួបជាមួយលោក Takahashi Fumaiki ពីថ្ងៃទី ១ កុម្ភៈ។ រូបថត SPM
ភ្នំពេញៈ ប្រធានសមាគមជប៉ុន-កម្ពុជា ស្នើសុំផ្តល់ដី ១ កន្លែងជូននាយករដ្ឋមន្ត្រី ហ៊ុន សែន សម្រាប់ធ្វើសួនសាធារណៈទុកជាអនុស្សាវរីយ៍រវាងកម្ពុជា និងជប៉ុន។ សំណើនេះត្រូវបានលោក ហ៊ុន សែន គាំទ្រ និងបានណែនាំលោក សុខ ចិន្តាសោភា ប្រធានក្រុមប្រឹក្សាអភិវឌ្ឍន៍កម្ពុជា ដើម្បីធ្វើការងារនេះបន្តជាមួយសាលារាជធានីភ្នំពេញ។
លោកនាយករដ្ឋមន្ត្រី ហ៊ុន សែន បានទទួលជួបពិភាក្សាការងារជាមួយលោក Takahashi Fumaiki ប្រធានសមាគមជប៉ុន-កម្ពុជា និងជាអតីតឯកអគ្គរាជទូតជប៉ុនប្រចាំនៅកម្ពុជានៅព្រឹកថ្ងៃទី ១ ខែកុម្ភៈ។ លោក Takahashi Fumaiki បានស្នើសុំប្រគល់ទីតាំងដី ១ កន្លែងជូនលោកនាយករដ្ឋមន្ត្រី ដើម្បីរៀបចំធ្វើជាសួនអនុស្សាវរីយ៍ កម្ពុជា-ជប៉ុន ដែលនឹងដាក់ឈ្មោះថា សួន PKO សម្រាប់សាធារណជនប្រើប្រាស់ផង និងសម្រាប់ជាតំណាងទំនាក់ទំនងរវាងប្រទេសទាំង ២ ផង។
លើសពីនេះលោកប្រធានសមាគមជប៉ុន-កម្ពុជា ក៏បានស្នើសុំលោកនាយករដ្ឋមន្ត្រី ពិនិត្យលទ្ធភាព ការដោះស្រាយបញ្ហាទឹកជំនន់ព្រែកត្នោត ដែលលោកបានធ្វើការដោះស្រាយរួចមួយចំនួនក្នុងពេលកន្លងមក។ ជាមួយគ្នានោះ លោកបានវាយតម្លៃខ្ពស់ចំពោះចំណាត់ការរបស់លោក ហ៊ុន សែន និងរបស់រាជរដ្ឋាភិបាលកម្ពុជាក្នុងការទប់ស្កាត់ការឆ្លងរីករាលដាលនៃជំងឺកូវីដ ១៩។ លោកក៏បានសុំការអនុញ្ញាតពីលោកនាយករដ្ឋមន្ត្រី ដើម្បីនាំប្រតិភូអ្នកវិនិយោគធុនកណ្ដាលមកកាន់ព្រះរាជាណាចក្រកម្ពុជាក្នុងអំឡុងខែមេសាខាងមុខផងដែរ។
ជាការឆ្លើយតបលោកនាយករដ្ឋមន្ត្រីក៏បានទទួលស្វាគមន៍ និងសម្ដែងនូវការគាំទ្រចំពោះគំនិតផ្ដួចផ្ដើមក្នុងការរៀបចំឱ្យមានជាសួនសាធារណៈ សម្រាប់អនុស្សាវរីយ៍រវាង កម្ពុជា និងជប៉ុន ដែលបានដាក់ឈ្មោះថា សួន PKO។
លោក ហ៊ុន សែន បានថ្លែងអំណរគុណចំពោះលោក Takahashi Fumaiki និងបានជម្រាបជូនអំពីវិធានការ និងចំណាត់ការរបស់រាជរដ្ឋាភិបាលកម្ពុជាក្នុងការទប់ស្កាត់ការរាតត្បាតជំងឺកូវីដ ១៩ នៅកម្ពុជា។ លោកនាយករដ្ឋមន្ត្រីក៏បានស្វាគមន៍ចំពោះគណៈប្រតិភូ អ្នកវិនិយោគធុនកណ្ដាល ដែលមានបំណងនាំមកកម្ពុជាផងដែរ។
ដោយឡែក ពាក់ព័ន្ធនឹងការការពារទឹកជំនន់ស្ទឹងព្រែកត្នោត លោក ហ៊ុន សែន បានធ្វើការណែនាំជូនទៅលោក សុខ ចិន្តាសោភា សហការសម្របសម្រួលជាមួយរដ្ឋមន្ត្រីក្រសួងធនធានទឹក និងឧតុនិយម និងស្ថាប័នពាក់ព័ន្ធដទៃទៀត ក្នុងការអនុញ្ញាតឱ្យប្រតិភូរបស់លោក Takahashi Fumaiki ដើម្បីធ្វើបទបង្ហាញពាក់ព័ន្ធនឹងករណីនេះផងដែរ។
លោក ប៉ា ចន្ទរឿន ប្រធានវិទ្យាស្ថានប្រជាធិបតេយ្យកម្ពុជាថ្លែងនៅថ្ងៃទី ១ ខែកុម្ភៈថា ប្រទេសជប៉ុនជាហត្ថលេខីមួយនៃកិច្ចព្រមព្រៀងសន្តិភាពទីក្រុងប៉ារីស និងជាដៃគូអភិវឌ្ឍន៍ ព្រមទាំងជាម្ចាស់ជំនួយដ៏សំខាន់ដែលបានជួយអភិវឌ្ឍប្រទេសកម្ពុជាជាច្រើនវិស័យក្នុងរយៈពេលជិត ៣០ឆ្នាំកន្លងមកនេះ។ ហេតុនេះគំនិតផ្តួចផ្តើមក្នុងការកសាងសួនសាធារណៈអនុស្សាវរីយ៍កម្ពុជា-ជប៉ុន នឹងក្លាយជានិមិត្តរូបមួយ ដើម្បីឆ្លុះបញ្ចាំងអំពីទំនាក់ទំនងរវាងកម្ពុជា និងជប៉ុន។
លោកថ្លែងថា៖ «ការបង្កើតសួនសាធារណៈនៅក្នុងទីក្រុងភ្នំពេញនេះ ក៏ជាការឆ្លើយតបទៅនឹងតម្រូវការរបស់អ្នករស់នៅក្នុងទីក្រុងភ្នំពេញបច្ចុប្បន្នផងដែរដែលទីក្រុងភ្នំពេញយើងបច្ចុប្បន្នមានការខ្វះខាតទីធ្លាសាធារណៈ និងសួនបៃតងដើម្បីឱ្យប្រជាពលរដ្ឋប្រើប្រាស់ និងធ្វើសកម្មភាពផ្សេងៗរួមទាំងការកម្សាន្ត និងការហាត់ប្រាណប្រចាំថ្ងៃផងដែរ»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាថ្លែងនៅថ្ងៃទី ១ កុម្ភៈថា ការធ្វើសួនសាធារណៈសម្រាប់អនុស្សាវរីយ៍ កម្ពុជា-ជប៉ុននេះជាគំនិតផ្តួចផ្តើមល្អមួយដែលធ្វើឱ្យទំនាក់ទំនងរវាងកម្ពុជា- ជប៉ុន កាន់តែប្រសើរឡើង ព្រោះជប៉ុនបានដើរតួនាទីសំខាន់ក្នុងការកសាង រក្សាសន្តិភាពនៅកម្ពុជាតាំងពីដើមទសវត្សរ៍ឆ្នាំ ១៩៩០ ដែលជប៉ុនបានរួមចំណែកយ៉ាងសំខាន់ក្នុងការស្តារ និងអភិវឌ្ឍប្រទេសកម្ពុជាឡើងវិញ ក្រោមកិច្ចព្រមព្រៀងសន្តិភាពទីក្រុងប៉ារីស។
លោកថ្លែងថា៖ «បើយើងនិយាយពីការចងចាំទស្សនៈរបស់ប្រជាពលរដ្ឋខ្មែរចំពោះជប៉ុន ខ្ញុំគិតថា រូបភាពប្រទេសជប៉ុននៅក្នុងក្រសែភ្នែករបស់ប្រជាជនខ្មែរហ្នឹងគឺមានរូបភាពជាវិជ្ជមានច្រើន។ អ៊ីចឹងទេខ្ញុំគិតថា សួនអនុស្សាវរីយ៍នេះ កាន់តែធ្វើឱ្យទំនាក់ទំនងរវាងប្រទេសទាំង ២ កាន់តែមានលក្ខណៈស៊ីជម្រៅគ្រប់ជ្រុងជ្រោយហើយដិតជាប់នៅក្នុងការចងចាំរបស់ប្រជាពលរដ្ឋខ្មែរចំពោះការរួមចំណែករបស់ជប៉ុនចំពោះកម្ពុជា»៕
វីដេអូ៖
