កិច្ចប្រជុំមន្ត្រីការពារជាតិជាន់ខ្ពស់អាស៊ាន។ រូបថត ក្រសួងការពារជាតិ
ភ្នំពេញៈ កម្ពុជាប្តេជ្ញាបន្តកិច្ចសហប្រតិបត្តិការជាមួយបណ្តាប្រទេសជាសមាជិកអាស៊ាន និងដៃគូអាស៊ានទាំងអស់ ដើម្បីរក្សាសន្តិភាព សន្តិសុខ និងវិបុលភាព របស់អាស៊ាន ខណៈមន្ត្រីជាន់ខ្ពស់ការពារជាតិអាស៊ានទាំង ១០ ប្រទេសកំពុងពិភាក្សាគ្នានៅភ្នំពេញ ដើម្បីស្វែងរកដំណោះស្រាយលើបញ្ហាប្រឈមផ្នែកសន្តិសុខក្នុងតំបន់។
ការប្តេជ្ញានេះ ធ្វើឡើងក្នុងកិច្ចប្រជុំក្រុមការងារមន្ត្រីជាន់ខ្ពស់ការពារជាតិអាស៊ាន (ADSOM WG) នាថ្ងៃទី ៧ ខែកុម្ភៈ ដែលកម្ពុជាធ្វើជាម្ចាស់ផ្ទះនៅអគាររដ្ឋបាលថ្មីនៃក្រសួងការពារជាតិកម្ពុជា ដោយមានការចូលរួមពីប្រធានក្រុមការងារឧត្តមមន្ត្រីការពារជាតិនៃប្រទេសជាសមាជិកអាស៊ានទាំង ១០ ប្រទេស។
លោក ឡៃ ចិន្តា អគ្គនាយករង អគ្គនាយកដ្ឋាននយោបាយ និងកិច្ចការបរទេសនៃក្រសួងការពារជាតិកម្ពុជា និងជាប្រធានក្រុមការងារឧត្តមមន្ត្រីការពារជាតិអាស៊ានរបស់កម្ពុជាជាថ្មីម្តងទៀតបានថ្លែងកោតសរសើរប្រទេសប្រ៊ុយណេ ចំពោះការខិតខំប្រឹងប្រែងរបស់ខ្លួន ដើម្បីធ្វើឱ្យកិច្ចប្រជុំរដ្ឋមន្ត្រីការពារជាតិអាស៊ាន និងកិច្ចប្រជុំពាក់ព័ន្ធកាលពីឆ្នាំ ២០២១ បានបញ្ចប់ដោយជោគជ័យ និងទទួលបានសមិទ្ធផលដ៏អស្ចារ្យ។ នេះបើតាមសេចក្តីប្រកាសព័ត៌មាននាយកដ្ឋានព័ត៌មាន នៃក្រសួងការពារជាតិកម្ពុជានាថ្ងៃទី ៧ ខែកុម្ភៈ។
លោកថ្លែងថា៖ «ឈរលើសមិទ្ធផលដែលប្រធានកិច្ចប្រជុំរដ្ឋមន្ត្រីការពារជាតិអាស៊ានរបស់យើងបានធ្វើកន្លងមកកម្ពុជានឹងបន្តកិច្ចសហប្រតិបត្តិការជាមួយរដ្ឋសមាជិកអាស៊ាន និងដៃគូអាស៊ានទាំងអស់ ដើម្បីសម្រេចបាននូវសេចក្តីប្រាថ្នានៃសន្តិភាព សន្តិសុខ និងវិបុលភាពរបស់អាស៊ាន»។
កិច្ចប្រជុំមន្ត្រីជាន់ខ្ពស់អាស៊ាននេះ ធ្វើឡើងមានរយៈពេល ២ ថ្ងៃគឺនៅថ្ងៃទី ៧-៨ ខែកុម្ភៈ ក្រោមប្រធានបទ «សាមគ្គីភាព ដើម្បីសន្តិសុខប្រកបដោយសុខដុមរមនា» ដែលមន្ត្រីជាន់ខ្ពស់មកពីបណ្តាប្រទេសជាអាស៊ានពិភាក្សាគ្នាអំពីគំនិតផ្តួចផ្តើមកិច្ចសហប្រតិបត្តិការលើវិស័យការពារជាតិអាស៊ាន និងស្វែងរកដំណោះស្រាយចំពោះបញ្ហាប្រឈមផ្នែកសន្តិសុខបច្ចុប្បន្នដែលកំពុងកើតមានឡើង និងកំពុងប្រឈមមុខនឹងតំបន់។
លោក ឡៃ ចិន្តា បន្តថា នេះជាមោទនភាពរបស់កម្ពុជាដែលអាចធ្វើជាម្ចាស់ផ្ទះកិច្ចប្រជុំក្រុមការងារមន្ត្រីជាន់ខ្ពស់ការពារជាតិអាស៊ាន បន្ទាប់ពីអវត្តមាននៃកិច្ចប្រជុំទល់មុខគ្នាអស់រយៈពេលជិត ២ ឆ្នាំកន្លងមកដោយសារបញ្ហាជំងឺរាតត្បាតកូវីដ ១៩។
លោកបានចាត់ទុកវត្តមានក្រុមការងារមន្ត្រីជាន់ខ្ពស់ការពារជាតិអាស៊ាននេះគឺជាការបង្ហាញពីការគាំទ្រដ៏រឹងមាំផ្តល់ឱ្យកម្ពុជាក្នុងនាមជាម្ចាស់ផ្ទះនៃកិច្ចប្រជុំរដ្ឋមន្ត្រីការពារជាតិអាស៊ាន និងកិច្ចប្រជុំពាក់ព័ន្ធនៅឆ្នាំ ២០២២ និងជាសក្ខីកម្មមួយទៀត ក្នុងការពង្រឹងកិច្ចសហប្រតិបត្តិការការពារជាតិរបស់អាស៊ានដើម្បីផលប្រយោជន៍រួម។
ក្រុមមន្ត្រីការពារជាតិនៃបណ្តាប្រទេសអាស៊ានបានពិភាក្សាគ្នាអំពីគំនិតផ្តួចផ្តើមដែលបានដាក់ចេញសម្រាប់ការពិចារណា និងការអនុម័តពីរដ្ឋមន្ត្រីការពារជាតិអាស៊ាន (ADMM) នៅក្នុងខែមិថុនាខាងមុខ។
លោក ឡៃ ចិន្តា បានថ្លែងថា៖ «ទោះបីជាយើងបានទទួលមតិយោបល់ និងធាតុចូលមួយចំនួនពីសហសេវិករបស់យើងនៅលើឯកសារទាំងនេះក៏ដោយ ការពិភាក្សាដោយចេតនា គឺចាំបាច់ដើម្បីធ្វើឱ្យគំនិតផ្តួចផ្តើមទាំងនេះកាន់តែទូលំទូលាយ និងឆ្លុះបញ្ចាំងពីតម្រូវការជាក់ស្តែង សម្រាប់កិច្ចសហប្រតិបត្តិការជាក់ស្តែងដើម្បីដោះស្រាយបញ្ហាប្រឈមនាពេលបច្ចុប្បន្ន និងអនាគត»។
កម្ពុជា និងសិង្ហបុរីបានបង្កើតសេចក្តីព្រាងនៃចក្ខុវិស័យរួមរបស់អាស៊ានស្តីពីតួនាទីនៃការបង្កើតការការពារក្នុងការគាំទ្រការប្រយុទ្ធប្រឆាំងជំងឺកូវីដ ១៩ និងការងើបឡើងវិញ។ ឯកសារនេះ បច្ចុប្បន្នមានឈ្មោះថា «ទស្សនៈទីក្រុងភ្នំពេញ»។
លោក ឡៃ ចិន្តា បញ្ជាក់ថា៖ «ជាការពិតណាស់ ឯកសារនេះនឹងជាតម្លៃបន្ថែមមួយទៀត នៃស្ថាប័នការពារជាតិចំពោះកិច្ចខិតខំប្រឹងប្រែងរបស់អាស៊ានទាំងមូល ដើម្បីដោះស្រាយបញ្ហាប្រឈមនៃជំងឺរាតត្បាត និងដំណើរការស្តារឡើងវិញក្នុងតំបន់»។
លោក ហេង គីមគង់ អ្នកស្រាវជ្រាវជាន់ខ្ពស់នៃមជ្ឈមណ្ឌលអភិវឌ្ឍន៍កម្ពុជា ប្រាប់ភ្នំពេញ-ប៉ុស្តិ៍នាថ្ងៃទី ៧ ខែកុម្ភៈថា ក្នុងនាមជាប្រធានអាស៊ាន កម្ពុជាដើរតួនាទីយ៉ាងសំខាន់ក្នុងការលើកកម្ពស់កិច្ចសហប្រតិបត្តិការក្នុងចំណោមប្រទេសជាសមាជិកអាស៊ានទាំងអស់ក្នុងវិស័យជាច្រើន រួមទាំងសន្តិភាព និងសន្តិសុខ។ លោកថ្លែងថា៖ «កម្ពុជាបាននិងកំពុងសកម្មក្នុងការលើកកម្ពស់ពហុភាគីនិយម ហើយកម្ពុជាគួរតែបន្តកិច្ចសហប្រតិបត្តិការជាមួយបណ្តាប្រទេសក្នុងតំបន់ដើម្បីការពារ និងថែរក្សាសន្តិភាព និងសន្តិសុខក្នុងតំបន់ និងពិភពលោក»៕
