អ្នកចូលរួមតាមដានសវនាការនៅសាលាក្តីខ្មែរក្រហមកាលពីពេលកន្លងមក។ រូបថត សាលាក្តីខ្មែរក្រហម
ភ្នំពេញៈ រដ្ឋាភិបាលជប៉ុនបានផ្តល់ជំនួយជាថវិកាចំនួន ២២ ម៉ឺនដុល្លារអាមេរិកបន្ថែមទៀត ជាវិភាគទានដើម្បីផ្តល់ជូនភាគីអង្គការសហប្រជាជាតិនៃអង្គជំនុំជម្រះវិសាមញ្ញក្នុងតុលាការកម្ពុជាដោយភាគីកម្ពុជាបានស្វាគមន៍ដល់ការផ្តល់ជំនួយនេះ ដែលរហូតមកដល់ពេលនេះ ប្រទេសជប៉ុនបានផ្តល់ជំនួយមកដល់សាលាក្តីខ្មែរក្រហមជាង ៨៨ លានដុល្លារអាមេរិកហើយ។
យោងតាមសេចក្តីប្រកាសព័ត៌មានរបស់ស្ថានទូតជប៉ុនប្រចាំកម្ពុជានៅថ្ងៃទី ៧ ខែកុម្ភៈ បានឱ្យដឹងថា កាលពីថ្ងៃទី ៤ កុម្ភៈ រដ្ឋាភិបាលជប៉ុនបានបញ្ចេញប្រាក់ចំនួន ២២០ ០០០ ដុល្លារអាមេរិក ជាវិភាគទាន ដើម្បីផ្តល់ជូនភាគីអង្គការសហប្រជាជាតិនៃថវិកាអង្គជំនុំជម្រះ វិសាមញ្ញក្នុងតុលាការកម្ពុជា។ រដ្ឋាភិបាលជប៉ុនបានសម្រេចចិត្តផ្តល់វិភាគទាននេះ ដើម្បីទ្រទ្រង់ដំណើរការរបស់សាលាក្តីខ្មែរក្រហម។
ស្ថានទូតជប៉ុនបានបន្ថែមថា៖ «រដ្ឋាភិបាលជប៉ុនផ្តល់សារៈសំខាន់ទៅលើសាលាក្តីខ្មែរក្រហម ដោយផ្អែកលើទស្សនៈចំនួន ៣។ ទី ១ ការកាត់ក្តីមេដឹកនាំខ្មែរក្រហម គឺជាដំណាក់កាលបញ្ចប់នៃដំណើរការស្វែងរកសន្តិភាពនៅកម្ពុជា ដើម្បីបង្ការទប់ស្កាត់ការកើតមានឡើងវិញនៃអំពើឃោរឃៅដែលបានប្រព្រឹត្តឡើងនៅក្នុងសម័យខ្មែរក្រហម»។
ទី ២ សាលាក្ដីខ្មែរក្រហមនេះនឹងជួយស្វែងរកយុត្តិធម៌ជូនជនរងគ្រោះនៃរបបខ្មែរក្រហមដែលប្រការនេះនឹងរួមចំណែកដល់ការផ្សះផ្សាជាតិឡើងវិញ និងទី ៣ សាលាក្តីនេះនឹងរួមចំណែកដល់ការពង្រឹងនីតិរដ្ឋនៅកម្ពុជា ក៏ដូចជានៅសហគមន៍អន្តរជាតិផងដែរ។ ស្ថានទូតជប៉ុនបានបញ្ជាក់បន្ថែម។
រដ្ឋាភិបាលជប៉ុនបាននិងកំពុងជួយដល់អង្គជំនុំជម្រះវិសាមញ្ញក្នុងតុលាការកម្ពុជា តាំងពីដើមដំបូងរៀងមក ហើយគិតត្រឹមថ្ងៃនេះ ជំនួយហិរញ្ញវត្ថុពីប្រទេសជប៉ុន សម្រាប់តុលាការនេះមានចំនួន ៨៨,៧ លានដុល្លារអាមេរិកដោយគិតរួមទាំងការបញ្ចេញថវិកាលើកនេះដែលប្រហាក់ប្រហែលនឹង ២៧% នៃថវិកាសរុបផ្តល់ដោយប្រទេសផ្តល់ជំនួយជូនភាគីជាតិ និងភាគីអង្គការសហប្រជាជាតិ នៃ អ.វ.ត.ក។ ស្ថានទូតជប៉ុនបានបញ្ជាក់ថា ប្រទេសជប៉ុន រួមជាមួយប្រទេសបារាំងក្នុងឋានៈជាសហប្រធាននៃមិត្តរបស់ អ.វ.ត.ក. បានតាមដានដំណើរការរបស់តុលាការនេះយ៉ាងសកម្ម។
អ្នកនាំពាក្យសាលាក្តីខ្មែរក្រហម លោក នេត្រ ភក្ត្រា បានប្រាប់ភ្នំពេញប៉ុស្តិ៍នៅថ្ងៃទី ៧ ខែកុម្ភៈដោយលោកបានស្វាគមន៍នូវការផ្តល់ជំនួយនេះ និងថ្លែងអំណរគុណដល់ប្រទេសជប៉ុន ដែលបានផ្តល់ការគាំទ្រហិរញ្ញវត្ថុមកសាលាក្តីខ្មែរក្រហម ចាប់តាំងពីដំណើរការតុលាការនេះមក។ លោកបានប្រាប់ថា៖ «ប្រទេសជប៉ុននៅតែជាប្រទេសម្ចាស់ជំនួយធំជាងគេមួយរបស់សាលាក្តីខ្មែរក្រហមដែលបានផ្តល់ថវិកាយ៉ាងច្រើន ដែលមកដល់ពេលនេះ បានផ្តល់ឱ្យមកសាលាក្តីខ្មែរក្រហម ទាំងភាគីជាតិ និងអន្តរជាតិជាង ៨៨ លានដុល្លារអាមេរិក ដែលស្មើនឹងប្រមាណជា ២៧% នៃថវិកាចំណាយសរុបរបស់សាលាក្តីខ្មែរក្រហម»។
លោក នេត្រ ភក្ត្រា បានបន្តថា មកដល់ឆ្នាំ ២០២១ កន្លងទៅនេះ សាលាក្តីខ្មែរក្រហមបានចំណាយថវិកាគឺចំនួនជាង ៣៣០,៤ លានដុល្លារអាមេរិកដែលក្នុងនោះភាគីអន្តរជាតិចំណាយអស់ជាង ២៣៥,៦៦ លានដុល្លារ និងភាគីជាតិចំណាយអស់ជាង ៩៤,៧៣ លានដុល្លារអាមេរិក។
ប្រទេសដែលផ្តល់ជំនួយច្រើនជាងគេ គឺប្រទេសជប៉ុនដែលមានជាង ៨៨ លានដុល្លារអាមេរិកបន្ទាប់មកគឺរាជរដ្ឋាភិបាលកម្ពុជា ដែលមានប្រមាណជា ៤២ លានដុល្លារអាមេរិកស្មើនឹង ១៣% ប្រទេសអូស្ត្រាលីជាប្រទេសទី ៣ គឺមានចំនួន ៣៤ លាន ស្មើនឹង ១១% ហើយប្រទេសទី ៤ គឺសហរដ្ឋអាមេរិក ដែលបានផ្តល់ចំនួន ៣២ លានដុល្លារអាមេរិក ស្មើនឹង ១០% បន្ទាប់មកមានសហភាពអឺរ៉ុប ស៊ុយអែត អង់គ្លេស បារាំង និងប្រទេសន័រវែសជាដើម។
ដោយផ្អែកលើតម្រូវការដែលបានរំពឹងទុក អង្គជំនុំជម្រះវិសាមញ្ញកំពុងស្នើសុំការអនុម័តថវិកាដែលបានស្នើឡើងក្នុងចំនួនទឹកប្រាក់ ១៦,១៨ លានដុល្លារអាមេរិកសម្រាប់ឆ្នាំ ២០២២ ដែលមានការថយចុះចំនួន ៩,១៧% បើប្រៀបធៀបនឹងថវិកាសម្រាប់ឆ្នាំ ២០២១៕
