ទិដ្ឋភាពរោងចក្រនៅក្នុងខណ្ឌពោធិ៍សែនជ័យ រាជធានីភ្នំពេញពីឆ្នាំ ២០២០។ ហេង ជីវ័ន
ភ្នំពេញៈ រដ្ឋបាលរាជធានីភ្នំពេញបានកំពុងពិភាក្សាជាមួយសមាគមដឹកជញ្ជូន និងបណ្តាសហគ្រាសធំៗ ដើម្បីស្វែងរកដំណោះរួមគ្នាក្នុងការផ្លាស់ប្តូរទីតាំងរោងចក្រ និងឃ្លាំងទំនិញទៅកាន់តំបន់ជាយរាជធានីភ្នំពេញ ដើម្បីកាត់បន្ថយរថយន្តធុនធំចូលក្នុងក្រុងនាំប៉ះពាល់ដល់ការធ្វើចរាចរណ៍។
ក្នុងឱកាសចូលរួមកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆ្នាំ ២០២១ និងលើកទិសដៅការងារឆ្នាំ ២០២២ កាលពីថ្ងៃទី ៩ ខែកុម្ភៈ អភិបាលរាជធានី-ភ្នំពេញលោក ឃួង ស្រេង បានថ្លែងថា សាលារាជធានីកំពុងបន្តប្រជុំពិភាក្សាជាមួយសមាគមដឹកជញ្ជូន សមាគមកាត់ដេរ GMAC បណ្តាក្រុមហ៊ុនរោងចក្រសហគ្រាស និងម្ចាស់ឃ្លាំងទំនិញធំៗ ដើម្បីស្តាប់សំណូមពរ និងជំរុញឱ្យមានការផ្លាស់ប្តូរទីតាំងទៅតំបន់ជាយរាជធានីភ្នំពេញ។
លោកបន្តថា៖ «ជាទិសដៅខាងមុខនៅពេលដែលការដ្ឋានផ្លូវក្រវាត់ក្រុងទី ៣ បញ្ចប់ការសាងសង់ និងដាក់ឱ្យប្រើប្រាស់នឹងធ្វើឱ្យមានបណ្តាក្រុមហ៊ុន រោងចក្រ សហគ្រាស និងឃ្លាំងទំនិញមួយចំនួនផ្លាស់ប្តូរទៅកាន់ជាយក្រុងដែលយើងអាចកាត់បន្ថយបាននូវចំនួនរថយន្តធុនធ្ងន់ចេញ-ចូលរាជធានីភ្នំពេញ»។
ពាក់ព័ន្ធបញ្ហាចរាចរណ៍ក្នុងរាជធានីភ្នំពេញនេះដែរ លោក ឃួង ស្រេង បាន និងកំពុងប្រើប្រាស់កម្លាំងសរុប និងមធ្យោបាយសរុប ដើម្បីត្រៀមអន្តរាគមន៍ទៅតាមតំបន់កកស្ទះសំខាន់ៗក្នុងរាជធានី ជាពិសេសតំបន់ប្រជុំជនថ្មី។
លោកបានបញ្ជាក់ថា៖ «យើងបន្តបង្កើនប្រើប្រាស់ប្រព័ន្ធបច្ចេកវិទ្យាជំនួសឱ្យប្រើប្រាស់កម្លាំងនគរបាល ដើម្បីពង្រឹងប្រសិទ្ធភាព និងការដោះស្រាយគ្រប់គ្រងចរាចរណ៍នៅទីក្រុងឱ្យកាន់តែមានភាពប្រសើរឡើង»។
លោកបន្តថា ក្រៅពីនេះ រដ្ឋបាលរាជធានីក៏បានបង្កើនការរឹតបន្តឹង និងត្រួតពិនិត្យស្តីពីច្បាប់ចរាចរណ៍ផ្លូវគោក ដូចជា ការត្រួតពិនិត្យយានយន្តកែច្នៃខុសលក្ខណៈបច្ចេកទេស ពិនិត្យគ្រឿងញៀន និងគ្រឿងស្រវឹងចំពោះអ្នកបើកបរ និងដឹកជញ្ជូនទំនិញធុនធ្ងន់ និងអ្នកបើកបររថយន្តដឹកអ្នកដំណើរជាដើម។
លោកបានបន្តទៀត រដ្ឋបាលរាជធានីក៏បានផ្សព្វផ្សាយក្រមសីលធម៌សម្រាប់សុវត្ថិភាព ចរាចរណ៍ និងបន្តបើកវគ្គបណ្តុះបណ្តាលដោយឥតគិតថ្លៃ និងជំរុញឱ្យបងប្អូនរ៉ឺម៉កទេសចរណ៍ម៉ូតូកង់៣ និងក្រុមសេដ្ឋកិច្ចក្រៅប្រព័ន្ធមករៀនសូត្រច្បាប់ស្តីពីចរាចរណ៍ផ្លូវគោក និងប្រឡងយកបណ្ណបើកបរ ដោយចាត់ទុកថា នេះជាផ្នែកមួយនៃការកាត់បន្ថយការកកស្ទះចរាចរណ៍។
ភ្នំពេញប៉ុស្តិ៍មិនទាន់អាចសុំការអត្ថាធិប្បាយបន្ថែមពីលោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរនៅកម្ពុជា (GMAC) បាននៅឡើយទេនៅថ្ងៃទី ១០ កុម្ភៈ ដោយលោកប្រាប់ថាកំពុងជាប់រវល់ប្រជុំ។
យ៉ាងណាក្ដី អនុប្រធានសភាពាណិជ្ជកម្មកម្ពុជាលោក លឹម ហេង នៅថ្ងៃទី ១០ កុម្ភៈបានបង្ហាញការគាំទ្រចំពោះវិធានការដោយលោកថា នឹងធ្វើឱ្យរាជធានីភ្នំពេញកាត់បន្ថយការកកស្ទះ និងកាត់បន្ថយផលប៉ះពាល់ដល់បរិស្ថាន។
លោកថា៖ «នេះជារឿងល្អធម្មតាទេទីក្រុងយើងកន្លងមក ដោយសាររោងចក្រហ៊ុមព័ទ្ធច្រើនធ្វើឱ្យស្ទះចរាចរណ៍ បញ្ហាបរិស្ថានគ្រោះថ្នាក់ចរាចរណ៍ហើយការដែលរថយន្តធំដឹកទំនិញចេញ-ចូលនេះ វាធ្វើឱ្យប៉ះពាល់បរិស្ថាន គ្រោះថ្នាក់ចរាចរណ៍ដែរ អ៊ីចឹង ប្រសិនបើយើងអាចឱ្យគាត់ទៅសង់នៅជាយក្រុងគឺល្អ»។
ទន្ទឹមនេះដែរ លោកស្នើដល់វិស័យឯកជនចូលរួមទាំងអស់គ្នា ដោយមានការអត់ធ្មត់ក្នុងអំឡុងពេលរើរោងចក្រ ឬឃ្លាំងទំនិញដើម្បីទីក្រុងស្អាត បរិស្ថានល្អ។
បន្ថែមពីនេះលោកថា សភាពាណិជ្ជកម្មកម្ពុជាក៏បានជំរុញឱ្យមានការវិនិយោគរោងចក្រនៅតាមបណ្តាខេត្តនានា ដើម្បីកាត់បន្ថយក្រីក្រ និងការចំណាកស្រុក។ លោកថា៖ «បើយើងមានរោងចក្រនៅតាមបណ្តាខេត្ត វិនិយោគនោះទីនោះ គឺជារឿងមួយល្អ កាត់បន្ថយភាពក្រីក្រ កាត់បន្ថយចំណាកស្រុក ក្រៅពីសម្រាកការងារគាត់អាចដាំដុះ ចិញ្ចឹមសត្វ ថែទាំគ្រួសារអ៊ីចឹងគាត់មានឱកាសច្រើនក្នុងការជួយផ្គត់ផ្គង់ជីវភាពគ្រួសារ»។
ពាក់ព័ន្ធការស្ថាបនាផ្លូវខ្សែក្រវាត់ក្រុងទី ៣ វិញ រដ្ឋមន្ត្រីក្រសួងសាធារណការ និងដឹកជញ្ជូនលោក ស៊ុន ចាន់ថុល បានឱ្យដឹងកាលពីសប្ដាហ៍មុនថា ការស្ថាបនាផ្លូវនេះនឹងពន្យារពេលបញ្ចប់ការសាងសង់រយៈពេល ១ ឆ្នាំ ដោយសារបញ្ហាមួយចំនួន។
លោកថា៖ «ផ្លូវខ្សែក្រវាត់ក្រុងទី ៣ ដោយក្រុមហ៊ុនសាងសង់បានស្នើសុំឱ្យពន្យារពេលសាងសង់ ១ ឆ្នាំ ដោយសារមានការយឺតយ៉ាវក្នុងការដោះស្រាយផលប៉ះពាល់»។
លោកបានឱ្យដឹងថា គិតត្រឹមចុងខែមករា ឆ្នាំ ២០២២ នេះ ការស្ថាបនាផ្លូវក្រវាត់ក្រុងទី ៣ សម្រេចបាន ៦៦ ភាគរយហើយ ដោយគ្រោងនឹងបញ្ចប់នៅអំឡុងខែកញ្ញា ឆ្នាំ ២០២២ ប៉ុន្តែត្រូវពន្យារ ១ ឆ្នាំដោយសារមានការស្នើសុំពីក្រុមហ៊ុន៕
វីដេអូ៖
