លោក សុន ឆ័យ មន្ត្រីនៃអតីតគណបក្សសង្គ្រោះជាតិ កាលពីឆ្នាំ ២០១៦។ ហេង ជីវ័ន
ភ្នំពេញៈ មន្ត្រីជាន់ខ្ពស់គណបក្សភ្លើងទៀន ឱ្យដឹងថា មន្ត្រីនៃអតីតគណបក្សសង្គ្រោះជាតិជាច្រើនរូបបន្តចូលរួមជីវភាពនយោបាយជាមួយគណបក្សភ្លើងទៀនរួមទាំងលោក សុន ឆ័យ ដើម្បីចូលរួមប្រកួតប្រជែងការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី ៥ ដែលនឹងប្រព្រឹត្តទៅនៅថ្ងៃទី ៥ ខែមិថុនា ឆ្នាំ ២០២២។
លោក សំ សុគង់ មន្ត្រីជាន់ខ្ពស់នៃគណបក្សភ្លើងទៀន ប្រាប់ភ្នំពេញប៉ុស្តិ៍នៅថ្ងៃទី ២ ខែមីនាថា មន្ត្រីនៃអតីតគណបក្សសង្គ្រោះជាតិបានដាក់ពាក្យស្នើសុំចូលជាមួយគណបក្សភ្លើងទៀនជាបន្តបន្ទាប់ ទោះបីមិនទាន់មានការកំណត់ចំនួនជាក់លាក់។ មន្ត្រីជាន់ខ្ពស់អតីតគណបក្សសង្គ្រោះជាតិមួយចំនួនទៀត ក្រោយពីស្នើសុំសិទ្ធិធ្វើនយោបាយឡើងវិញបានទៅរួមរស់ជាមួយគណបក្សផ្សេង និងបង្កើតគណបក្សថ្មី ព្រោះនេះ គឺជាសិទ្ធិរបស់ពួកគាត់។ ទោះជាយ៉ាងណា អ្នកមួយចំនួនធំ មានបំណងក្នុងការចូលរួមជីវភាពនយោបាយជាមួយនឹងគណបក្សភ្លើងទៀន។
លោកថា៖ «យើងអត់ទាន់ដឹងពីចំនួនច្បាស់អ្នកចូលរួមទេ ប៉ុន្តែយើងសង្ឃឹមថា ក្រោយពីមានការបោះឆ្នោតជ្រើសរើសក្រុមប្រឹក្សាឃុំ សង្កាត់ឆ្នាំ ២០២២ នេះនឹងមានអ្នកចូលរួមជាមួយនឹងគណបក្សភ្លើងទៀនច្រើន ព្រោះគណបក្សនេះ ជាគណបក្សប្រជាធិបតេយ្យ និងប្រជាពលរដ្ឋផ្តល់ក្តីសង្ឃឹមទុកចិត្ត»។
លោកបន្តថា ចំពោះវត្តមានរបស់លោក សុន ឆ័យ អតីតមន្ត្រីជាន់ខ្ពស់នៃអតីតគណបក្សសង្គ្រោះជាតិ ដែលបានប្រកាសចូលរួមជាមួយគណបក្សភ្លើងទៀន នៅពេលនេះ បង្ហាញពីក្តីសង្ឃឹម និងមានឥទ្ធិពលមួយព្រោះលោក សុន ឆ័យ ធ្លាប់ធ្វើជាតំណាងរាស្ត្រ។
លោក សំ សុគង់ បន្តថា ការសម្រេចចូលរួមជីវភាពនយោបាយជាមួយគណបក្សភ្លើងទៀននេះនឹងទទួលបានការគាំទ្រច្រើនពីប្រជាពលរដ្ឋសម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី ៥ ឆ្នាំ ២០២២ ជាពិសេសនឹងឈ្នះមេឃុំច្រើន នៅក្នុងការបោះឆ្នោត។
ភ្នំពេញប៉ុស្តិ៍មិនអាចទាក់ទងលោក សុន ឆ័យ សុំធ្វើអត្ថាធិប្បាយបានទេ នៅថ្ងៃទី ២ ខែមីនា ប៉ុន្តែកាលពីថ្ងៃទី ១ មីនាលោកបានប្រកាសជាសាធារណៈសុំចូលជាសមាជិកគណបក្សភ្លើងទៀនចាប់ពីថ្ងៃទី ១ ខែមីនា ឆ្នាំ ២០២២។ លោក សុន ឆ័យ សរសេរថា៖ «ខ្ញុំសូមអំពាវនាវឱ្យបងប្អូនរួមជាតិមេត្តា ចូលរួម និងគាំទ្រគណបក្ស ភ្លើងទៀនឱ្យបានគ្រប់ៗគ្នា»។
គណបក្សភ្លើងទៀននៅថ្ងៃទី ២ មីនា បានប្រកាសស្វាគមន៍ការចូលរួមរបស់លោក សុន ឆ័យ និងបានសម្រេចផ្តល់តួនាទីជូនលោក សុន ឆ័យ ជាមន្ត្រីជាន់ខ្ពស់ទំនាក់ទំនងជាមួយនឹងអង្គទូត និងអង្គការអន្តរជាតិសម្រាប់គណបក្សនេះ៕
វីដេអូ៖
