អ្នកទៅទិញសៀវភៅលក់បញ្ចុះថ្លៃកាលពីឆ្នាំ ២០២០។ ហេង ជីវ័ន
ភ្នំពេញៈ ទិវាជាតិអំណានលើកទី៧ ឆ្នាំ ២០២២ នេះនឹងត្រូវរៀបចំឡើង ដោយក្រសួងអប់រំ យុវជន និងកីឡា នាថ្ងៃទី ១១ ខែមីនា ក្រោមប្រធាបបទ «អំណានជួយលើកកម្ពស់គុណភាពជីវិតក្នុងសម័យឌីជីថល» ក្នុងគោលបំណងធ្វើការបណ្ដុះទម្លាប់អាន ជំរុញវប្បធម៌អាន លើកកម្ពស់សមត្ថភាពអាន ស្មូតកំណាព្យ និងការតែងនិពន្ធផងដែរ។
ទិវានេះ នឹងប្រព្រឹត្តទៅនៅវិទ្យាស្ថានជាតិអប់រំ និងតាមរយៈប្រព័ន្ធអនឡាញ Zoom ដោយមានការផ្សាយផ្ទាល់តាមគេហទំព័រហ្វេសប៊ុកផ្លូវការរបស់ក្រសួងអប់រំផងដែរ។
លោក រស់ សុវាចា អ្នកនាំពាក្យក្រសួងអប់រំ បានប្រាប់ ភ្នំពេញ ប៉ុស្តិ៍ នៅថ្ងៃទី ៦ ខែមីនាថា គោលបំណងនៃការប្រារព្ធទិវាជាតិអំណាន គឺការបណ្ដុះទម្លាប់អាន ជំរុញវប្បធម៌អាន លើកកម្ពស់សមត្ថភាពអាន ស្មូត កំណាព្យ និងការតែងនិពន្ធ សំដៅរួមចំណែកការពារ និងពង្រឹងវប្បធម៌អរិយធម៌ខ្មែរដល់សិស្ស និស្សិតមន្ត្រីរាជការ ប្រជាជនគ្រប់រូប ក្នុងប្រទេសកម្ពុជា ព្រមទាំងលើកកម្ពស់រក្សាគុណតម្លៃ កេរដំណែលរបស់មនុស្សជាតិ។ លោកបានបញ្ជាក់ថា៖ «គោលបំណងសំខាន់ទៀតគឺ សម្រេចគោលដៅអភិវឌ្ឍន៍ប្រកបដោយចីរភាពដែលធានាគុណភាពអប់រំប្រកបដោយសមធម៌ បរិយាបន្ន និងលើកកម្ពស់ការសិក្សាពេញ ១ ជីវិតសម្រាប់ទាំងអស់គ្នា»។
ជាមួយគ្នានោះដែរ ក្នុងទិវាជាតិអំណាននោះដែរ ក៏មានរៀបចំនូវសកម្មភាពនានាដែលមានដូចជា ការប្រឡងប្រណាំងអាន ស្មូតកំណាព្យ និងតែងនិពន្ធ «ពានរង្វាន់សម្តេចតេជោ ហ៊ុន សែន» បាឋកថាស្រាវជ្រាវស្តីពី «ការអភិវឌ្ឍភាសា និងទ្រឹស្តីនៃការអភិវឌ្ឍកុមារ» ។
ក្រសួងបញ្ជាក់ថា ក្នុងនោះក៏មានកិច្ចពិភាក្សាលើប្រធានបទ «អំណានជួយលើកម្ពស់គុណភាពនៃការអប់រំ» ទៅលើវិធីសាស្ត្រដឹកនាំសកម្មភាពអំណានក្នុងបណ្ណាល័យបឋមសិក្សា, អំណានដើម្បីលើកកម្ពស់គុណភាពអប់រំនៅកម្ពុជា និងអំណានដើម្បីលើកកម្ពស់ស្តង់ដាវិជ្ជាជីវៈគ្រូបង្រៀន។
ថ្ងៃទី ១១ ខែមីនា ត្រូវបានកំណត់យកជាថ្ងៃទិវាជាតិអំណាននៃព្រះរាជាណាចក្រកម្ពុជា ដើម្បីបណ្ដុះទម្លាប់អាន ជំរុញវប្បធម៌អាន លើកកម្ពស់សមត្ថភាពអាន និងការតែងនិពន្ធដើម្បីរួមចំណែកពង្រឹងការងារនិងពង្រឹងវប្បធម៌ខ្មែរ៕
វីដេអូ៖
