រថយន្តសម្រាប់ដឹកវ៉ាក់សាំង ដែលនឹងត្រូវផ្តល់ជូនរដ្ឋាភិបាលឡាវ។ រូបថត FN
ភ្នំពេញៈ លោកនាយករដ្ឋមន្ត្រី ហ៊ុន សែន បានសម្រេចផ្តល់នូវរថយន្តសម្រាប់ដឹកវ៉ាក់សាំងចំនួន ១០ គ្រឿង ជូនរដ្ឋាភិបាល និងប្រជាជននៃសាធារណរដ្ឋប្រជាធិបតេយ្យប្រជាមានិតឡាវ ដែលមន្ត្រីជាន់ខ្ពស់នៃក្រសួងសុខាភិបាលនឹងធ្វើពិធីប្រគល់ទទួលនាព្រឹកថ្ងៃទី ១២ ខែមីនា នៅច្រកព្រំដែនអន្តរជាតិត្រពាំង ក្រៀល ស្ថិតនៅក្នុងខេត្តស្ទឹងត្រែងជាប់ព្រំដែនខេត្តចំប៉ាសាក់នៃប្រទេសឡាវ។
លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក-១៩) និងក្នុងនាមជាតំណាងដ៏ខ្ពង់ខ្ពស់របស់លោកនាយករដ្ឋមន្ត្រីនឹងនាំយកជំនួយរថយន្តដឹកវ៉ាក់សាំងចំនួន ១០ គ្រឿង ជាជំនួយរបស់រាជរដ្ឋាភិបាលកម្ពុជា និងប្រជាជនកម្ពុជាប្រគល់ជូនរដ្ឋាភិបាល និងប្រជាជន នៃសាធារណរដ្ឋប្រជាធិបតេយ្យប្រជាមានិតឡាវ។
យោងតាមសេចក្តីជូនព័ត៌មានរបស់ក្រសួងសុខាភិបាលនាថ្ងៃទី ៩ ខែមីនា បានឱ្យដឹងថា៖ «ការសម្រេចផ្តល់រថយន្តដឹកវ៉ាក់សាំងដល់សាធារណរដ្ឋប្រជាធិបតេយ្យប្រជាមានិតឡាវនាពេលនេះ គឺជាការបង្ហាញនូវការយកចិត្តទុកដាក់ខ្ពស់បំផុតរបស់នាយករដ្ឋមន្ត្រី ចំពោះសុខភាព និងសុខុមាលភាពរបស់ប្រជាជនឡាវក្នុងនាមជាប្រទេសជិតខាងភូមិផងរបងជាមួយគ្នា»។
ក្រសួងបានបញ្ជាក់ទៀតថា វាក៏ជាការបង្ហាញពីការពង្រឹងនូវកិច្ចសហប្រតិបត្តិការទ្វេភាគី និងជាកាយវិការមនុស្សធម៌ប្រកបដោយបេះដូងដ៏ល្អប្រពៃពិតប្រាកដរបស់នាយករដ្ឋមន្ត្រីនៃប្រទេសកម្ពុជាក្នុងន័យថា «កម្ពុជាជាប្រទេសតូចតាចតែមានបេះដូងធំទូលាយ»។ កម្ពុជាតែងតែបាននិងកំពុងធ្វើដោយឈរលើស្មារតីមិត្តភាពសាមគ្គីភាព និងកិច្ចសហប្រតិបត្តិការល្អ ប្រកបដោយការគិតគូរខ្ពស់រួមគ្នាដោះស្រាយវិបត្តិនៃការឆ្លងរីករាលដាលជំងឺកូវីដ ១៩ នៅក្នុងប្រទេស និងនៅក្នុងតំបន់។
ក្រសួងសុខាភិបាលបញ្ជាក់ថា៖ «អំណោយមនុស្សធម៌ដ៏ថ្លៃថ្លារបស់កម្ពុជានាពេលនេះនឹងរួមចំណែកបន្ថែមទៀតជូនដល់ប្រទេសឡាវនៅក្នុងការឆ្លើយតបទៅនឹងវិបត្តិជំងឺកូវីដ ១៩ ជាពិសេសលើកិច្ចការចាក់វ៉ាក់សាំងកូវីដ ១៩ ជូនដល់ប្រជាជនឡាវឱ្យកាន់តែមានភាពល្អប្រសើរឡើងជាលំដាប់»។
គួរបញ្ជាក់ថា កាលពីចុងឆ្នាំ ២០២១ រាជរដ្ឋាភិបាលកម្ពុជាបានផ្តល់រថយន្តដឹកវ៉ាក់សាំងចំនួន ៣ គ្រឿងរួចមកហើយ អមនឹងវ៉ាក់សាំងបង្ការជំងឺកូវីដ ១៩ ចំនួន ៥០ ម៉ឺនដូសផងដែរដល់រដ្ឋាភិបាល និងប្រជាជននៃសាធារណរដ្ឋប្រជាធិបតេយ្យប្រជាមានិតឡាវ។
កាលពីឆ្នាំ ២០២០ រាជរដ្ឋាភិបាលកម្ពុជាក៏បានផ្តល់ជំនួយមនុស្សធម៌ជាម៉ាស់ ២ លានម៉ាស់ និងបរិក្ខារវេជ្ជសាស្ត្រចំនួន ១១ មុខផ្សេងទៀតជូនរដ្ឋាភិបាលឡាវ និងកាលពីចុងខែកញ្ញា ឆ្នាំ ២០២១ កន្លងទៅរាជរដ្ឋាភិបាលកម្ពុជាក៏បានផ្តល់ជំនួយវ៉ាក់សាំងប្រភេទស៊ីណូវ៉ាក់ចំនួន ២០ ម៉ឺនដូសដល់ឡាវផងដែរ។
ដោយឡែកទាក់ទងនឹងដំណើរការចាក់វ៉ាក់សាំងកូវីដ ១៩ ដល់ប្រជាពលរដ្ឋកម្ពុជា គិតត្រឹមថ្ងៃទី ៨ ខែមីនា ឆ្នាំ ២០២២ កម្ពុជាដែលមានក្រសួងសុខាភិបាលនិងក្រសួងការពារជាតិបានដំណើរការចាក់វ៉ាក់សាំងកូវីដ ១៩ ទៅដល់ប្រជាពលរដ្ឋនៅទូទាំងប្រទេសបានចំនួនជិត ៩២% ហើយ ឬដែលមានប្រជាពលរដ្ឋជិត ១៥ លាននាក់ធៀបនឹងចំនួនសរុបចំនួន ១៦ លាននាក់។
យោងតាមរបាយការណ៍របស់ក្រសួងសុខាភិបាល និងក្រសួងការពារជាតិបានឱ្យដឹងថា ប្រជាពលរដ្ឋចំនួន ១៤ ៧១៣ ៦៨៥ នាក់ ស្មើនឹង ៩១,៩៦% បានចាក់វ៉ាក់សាំងកូវីដ ១៩ រួចនៅទូទាំងប្រទេស ដែលក្នុងនោះមានចាប់ពីកុមារអាយុ ៣ ឆ្នាំរហូតដល់បុគ្គលដែលមានអាយុ ១៨ ឆ្នាំឡើងទៅ។
លោកស្រី យក់ សម្បត្តិ រដ្ឋលេខាធិការក្រសួងសុខាភិបាលបានថ្លែងកាលពីថ្ងៃទី ៧ ខែមីនាថា កម្ពុជាទទួលបានជោគជ័យក្នុងការប្រយុទ្ធប្រឆាំងជាមួយនឹងជំងឺកូវីដ ១៩ ដោយសារតែកម្ពុជាមានវ៉ាក់សាំងនៅក្នុងដៃគ្រប់គ្រាន់ ដែលរហូតមកដល់ពេលនេះ កម្ពុជាទទួលបានវ៉ាក់សាំងទាំងជាវ៉ាក់សាំងជំនួយ និងការបញ្ជាទិញ សរុបជាង ៤៣ លានដូស។
លោកស្រីមានប្រសាសន៍ថា៖ «វ៉ាក់សាំងភាគច្រើនត្រូវបានបញ្ចេញសម្រាប់ចាក់ជូនប្រជាពលរដ្ឋគ្រប់លំដាប់ថ្នាក់ទាំងកុមារ ជនចាស់ជរា រួមនឹងជនបរទេសដែលកំពុងរស់នៅនិងធ្វើការក្នុងប្រទេសកម្ពុជាផងដែរ។ យើងនៅមានវ៉ាក់សាំងជិត ១០ លានដូសទៀតដែលកំពុងរក្សាទុកក្នុងឃ្លាំង និងកំពុងធ្វើចលនាចាក់ក្នុងខេត្តនីមួយៗផងដែរ»។
លោក ហ៊ុន សែន កាលពីថ្ងៃ ៧ ខែមីនាប្រកាសជាសាធារណៈថា លោកមិនអនុញ្ញាតឱ្យប្រើប្រាស់វ៉ាក់សាំងហួសកាលបរិច្ឆេទដល់ប្រជាពលរដ្ឋឡើយ បើទោះបីជាកម្ពុជាមិនមានវ៉ាក់សាំងកូវីដ ១៩ ចាក់ឱ្យប្រជាពលរដ្ឋក៏ដោយ៕
វីដេអូ៖
