សិស្សសាលាឡើងជិះរថយន្តក្រុងពីថ្ងៃទី ១៥ មីនា។ ហេង ជីវ័ន
ភ្នំពេញៈ សាលារាជធានីភ្នំពេញអំពាវនាវឱ្យពលរដ្ឋចូលរួមប្រើប្រាស់សេវារថយន្តក្រុងសាធារណៈឡើងវិញដើម្បីកាត់បន្ថយថ្លៃចំណាយ ស្របពេលតម្លៃសាំងលើទីផ្សារមានការកើនឡើងខ្ពស់ ហើយការប្រើប្រាស់តាមមធ្យោបាយមួយនេះក៏ផ្តល់សុវត្ថិភាពដល់អ្នកធ្វើដំណើរផងដែរ។
លោក កើត ឆែ អភិបាលរងរាជធានីភ្នំពេញបានប្រាប់ ភ្នំពេញ ប៉ុស្តិ៍ នៅថ្ងៃទី ១៥ មីនាថា រាជរដ្ឋាភិបាលបានបើកប្រទេស និងបានដាក់ដំណើរការសេវារថយន្តក្រុងនេះឡើងវិញផងដែរក្រោយប្រកាសបញ្ចប់ព្រឹត្តិការណ៍ ២០ កុម្ភៈ។
លោកបានបន្តថា កាលពីមុនអ្នកចូលរួមប្រើប្រាស់រថយន្តក្រុងរបស់រដ្ឋគឺមានទៅដល់ជិត ៣ ម៉ឺននាក់ ក្នុង ១ ថ្ងៃ ប៉ុន្តែលោកអះអាងថា ក្នុងពេលនេះចំនួនអ្នកប្រើប្រាស់គឺមានការធ្លាក់ចុះខ្លាំងមែនទែនដោយក្នុង ១ ថ្ងៃ មានប្រមាណ ៧ ០០០ នាក់ប៉ុណ្ណោះ។
លោក កើត ឆែ បានបញ្ជាក់ថា៖ «ដោយសារតែបែបនេះហើយ បានជាយើងអំពាវនាវឱ្យបងប្អូនប្រជាពលរដ្ឋប្រើប្រាស់រថយន្តក្រុងវិញកុំឱ្យខ្លាចនឹងការឆ្លងកូវីដ ១៩ ព្រោះយើងបានរក្សា ៣ កុំ ៣ ការពារ តាមវិធានសុខាភិបាលបានល្អប្រសើរណាស់។ មួយទៀតក្នុងស្ថានភាពពេលនេះ ពិភពលោកឡើងថ្លៃប្រេង បើកាលណាយើងជិះរថយន្តក្រុងគឺជួយសម្រាលបន្ទុកបងប្អូនយើង»។
បន្ថែមពីនេះ លោកក៏បានអះអាងដែរថា ការងាកមកគាំទ្រសេវារថយន្តក្រុងរបស់រដ្ឋក៏បានចូលរួមចំណែកកាត់បន្ថយគ្រោះថ្នាក់ចរាចរណ៍ និងធានាសុវត្ថិភាពដល់ការធ្វើដំណើរផងដែរ ខណៈសាលារាជធានី-ភ្នំពេញបន្តខិតខំប្រឹងប្រែងដោយធ្វើយ៉ាងណា បង្ខិតសេវាទាំងនេះឱ្យកៀកជាមួយពលរដ្ឋ។
លោកបានបន្តថា៖ «ការចូលរួមប្រើប្រាស់រថយន្តក្រុងគឺចូលរួមថែរក្សាបរិស្ថានទីក្រុងយើងដោយយើងបានចូលរួមកាត់បន្ថយការប្រើប្រាស់មធ្យោបាយច្រើន ហើយមួយទៀតយើងក៏ជាបុគ្គលម្នាក់បានចូលរួមកាត់បន្ថយការកកស្ទះចរាចរណ៍ ព្រោះយើងគិតមើលបើមនុស្សជាង ៣ ម៉ឺននាក់ ធ្វើចរាចរណ៍លើដងផ្លូវ តើយើងគិតថា មានមធ្យោបាយលើដងផ្លូវប៉ុន្មាន? ដូច្នេះយើងសុំឱ្យគាត់ប្រើប្រាស់ដើម្បីចូលរួមទាំងអស់គ្នា»។
សូមជម្រាបថា សេវាដឹកជញ្ជូនសាធារណៈរថយន្តក្រុង (City Bus) រាជធានីភ្នំពេញ គឺចាប់ផ្តើមដំណើរការពីម៉ោង ៥ កន្លះព្រឹកដល់ម៉ោង ៨ កន្លះយប់ដោយតម្លៃសំបុត្រ ១ ៥០០ រៀល ក្នុងម្នាក់ ឬ ១ លើក ហើយតម្លៃនេះត្រូវបានលើកលែងចំពោះព្រះសង្ឃ ចាស់ជរា ជនពិការ កម្មករ កម្មការិនី សិស្ស និស្សិត និងកុមារកម្ពស់ក្រោម ១ ម៉ែត្រ។
លោក ឃ្លី នរៈ ប្រធានការិយាល័យរដ្ឋបាលរដ្ឋាករស្វយ័តដឹកជញ្ជូនសាធារណៈរថយន្តក្រុងបានប្រាប់ភ្នំពេញប៉ុស្តិ៍នៅថ្ងៃទី ១៥ មីនាថា ក្រោយប្រកាសដាក់ដំណើរការសេវារថយន្តក្រុងនេះឡើងវិញ ក្រោយផ្អាកសកម្មភាពមួយរយៈដោយសារតែជំងឺកូវីដ ១៩ រដ្ឋាករស្វយ័តដឹកជញ្ជូនសាធារណៈរថយន្តក្រុងបានដំណើរការរថយន្តក្រុងចំនួន ៦០ គ្រៀង ដើម្បីបម្រើសេវេកម្មដល់អតិថិជនលើផ្លូវសំខាន់ៗមួយចំនួនវិញ។
លោកបានបញ្ជាក់ថា៖ «ពេលនេះ យើងដាក់ដំណើរការផ្លូវរថយន្តក្រុងចំនួន ៤ ខ្សែ ឬប្រមាណ ៣០ ភាគរយ គឺមានផ្លូវខ្សែ លេខ ១ រហូតដល់ខ្សែលេខ ៤ ដែលជាផ្លូវសំខាន់។ យើងក៏កំពុងប្រជុំគិតគូរដែរហើយ ដើម្បីគិតគូរបើកខ្សែថ្មីៗបន្តទៀតឱ្យបានគ្រប់ ១៣ ខ្សែឡើងវិញ ហើយកិច្ចការងារនេះ ពេលចូលឆ្នាំខ្មែរហើយ យើងនឹងប្រជុំពិភាក្សាគ្នាម្តងទៀត»។
បើតាមលោក ឃ្លី នរៈ ក្នុងពេលបច្ចុប្បន្ននេះ រដ្ឋាករស្វយ័តដឹកជញ្ជូនសាធារណៈរថយន្តក្រុងមានអ្នកបើកបរជាង ២០០ នាក់ ដើម្បីរង់ចាំបម្រើសេវាដល់អតិថិជន ខណៈរដ្ឋាករស្វយ័តក៏កំពុងធ្វើការជួសជុលចំណតរថយន្តមួយចំនួនដែលរងការខូចខាតឡើងវិញផងដែរ៕
វីដេអូ៖
