កំពតៈ គណៈប្រតិភូអាជ្ញាធរសវនកម្មជាតិគ្រោងនឹងចុះធ្វើសវនកម្មនៅខេត្តកំពតសម្រាប់ការិយបរិច្ឆេទ ២០២១ និងឆ្នាំពាក់ព័ន្ធទាក់ទងទៅនឹងការអនុលោមតាមច្បាប់ និងបទប្បញ្ញាត្តិស្តីពីការគ្រប់គ្រងចំណូល ចំណាយថវិកា និងការគ្រប់គ្រងទ្រព្យសម្បត្តិរដ្ឋរបស់ខេត្តកំពត។
គម្រោងចុះធ្វើសវនកម្មនៅខេត្តកំពតនេះត្រូវបានប្រាប់ឱ្យដឹងនៅក្នុងកិច្ចប្រជុំពីចម្ងាយមួយរវាងលោក ឡុង អាទិច្ចបូរា អគ្គលេខាធិការនៃអាជ្ញាធរសវនកម្មជាតិ និងលោក ចាន់ ថា អភិបាលរងខេត្តកំពតដែលជាតំណាងលោក ម៉ៅ ធនិន អភិបាលខេត្តកំពតកាលពីថ្ងៃព្រហស្បតិ៍ទី ១៧ ខែមីនា ឆ្នាំ ២០២២ នេះ។
កិច្ចប្រជុំនេះក៏មានការចូលរួមពីសំណាក់លោកនាយករដ្ឋបាលស្តីទីសាលាខេត្ត លោក លោកស្រីប្រធានមន្ទីរ អង្គភាពពាក់ព័ន្ធជុំវិញខេត្ត លោក លោកស្រីនាយកទីចាត់ការ ប្រធានអង្គភាពចំណុះសាលាខេត្តកំពតផងដែរ។
លោក ចាន់ ថាបានមានប្រសាសន៍ស្វាគមន៍ចំពោះគណៈប្រតិភូអាជ្ញាធរសវនកម្មជាតិដែលគ្រោងនឹងចុះធ្វើសវនកម្មនៅខេត្តកំពតសម្រាប់ការិយបរិច្ឆេទ ២០២១ និងឆ្នាំពាក់ព័ន្ធ។ លោកបានថ្លែងថារដ្ឋបាលខេត្ត និងមន្ទីរជំនាញពាក់ព័ន្ធនឹងចូលរួមសហការល្អជាមួយប្រតិភូអាជ្ញាធរសវនកម្មជាតិ ដើម្បីឱ្យបេសកកម្មរបស់អាជ្ញាធរសវនកម្មជាតិសម្រេចតាមផែនការ និងគោលបំណងដែលបានគ្រោងទុក។
លោក ឡុង អាទិច្ចបូរា អគ្គលេខាធិការបានថ្លែងថា អាជ្ញាធរសវនកម្មជាតិមានកាតព្វកិច្ចធ្វើសវនកម្មលើគ្រប់ក្រសួង ស្ថាប័ន ខេត្ត ក្រុង និងរដ្ឋបាលមូលដ្ឋាន ដើម្បីធ្វើរបាយការណ៍ជូនទៅរដ្ឋសភា ព្រឹទ្ធសភា និងផ្តល់ព័ត៌មានដល់រាជរដ្ឋាភិបាល។
លោកបានបញ្ជាក់ថា៖ «អាជ្ញាធរសវនកម្មជាតិនឹងធ្វើសវនកម្មលើការអនុលោមតាមច្បាប់ និងបទប្បញ្ញាត្តិស្តីពីការគ្រប់គ្រងចំណូល ចំណាយថវិកា និងការគ្រប់គ្រងទ្រព្យសម្បត្តិរដ្ឋរបស់ខេត្តកំពត និងមន្ទីរជំនាញសម្រាប់ការិយបរិច្ឆេទ ២០២១ និងឆ្នាំពាក់ព័ន្ធ ព្រមទាំងធ្វើការតាមដានអនុសាសន៍សវនកម្មដែលអាជ្ញាធរសវនកម្មជាតិបានផ្តល់ជូនក្នុងរបាយការណ៍សវនកម្មកន្លងមក ដោយប្រើប្រាស់យន្តការនៃការធ្វើសវនកម្មពីចម្ងាយតាមប្រព័ន្ធព័ត៌មានវិទ្យា និងការចុះអនុវត្តជាក់ស្តែងក្នុងករណីចាំបាច់»៕