សមត្ថកិច្ចចុះបង្ក្រាបបទល្មើសនេសាទនៅបឹងទន្លេសាប កាលពីថ្ងៃទី ២២ ខែមីនា ឆ្នាំ ២០២២។ រូបថត ក្រសួងកសិកម្ម
ភ្នំពេញៈ លោកនាយករដ្ឋមន្ត្រី ហ៊ុន សែន បានបញ្ជាឱ្យត្រៀមប្រើឧទ្ធម្ភាគចក្រ កងទ័ពជើងទឹកកម្ចាត់ក្រុមឈ្មួញទុច្ចរិត ដែលប្រព្រឹត្តបទល្មើសនេសាទ បំផ្លាញត្រីនៅលើផ្ទៃបឹងទន្លេសាបឱ្យអស់ ដោយចាប់ក្រុមប្រព្រឹត្តបទល្មើសជលផលខ្នាតធំមកផ្ដន្ទាទោសតាមផ្លូវច្បាប់ ដើម្បីធានាឱ្យបាននូវនិរន្តរភាពធនធានជលផលនៅកម្ពុជា។
បទបញ្ជានេះត្រូវបានដាក់ចេញនៅល្ងាចថ្ងៃទី ២៣ ខែមីនា ឆ្នាំ ២០២២ ក្នុងពិធីបិទសន្និបាតបូកសរុបលទ្ធផលការងារឆ្នាំ ២០២១ និងលើកទិសដៅអនុវត្តការងារឆ្នាំ ២០២២ របស់ក្រសួងកសិកម្ម រុក្ខាប្រមាញ់ និងនេសាទ។
លោកនាយករដ្ឋមន្ត្រីបានថ្លែងនៅក្នុងឱកាសនោះថា បទល្មើសជលផល ដែលរដ្ឋបាលជលផលបង្ក្រាបបាននាពេលកន្លងមកគឺបង្ក្រាបបានតែប្រជានេសាទដែលចែវទូក ឬ កាណូតដែលប្រើម៉ាស៊ីនកូលែរតូចៗរាយមង ២-៣ ត្បូងប៉ុណ្ណោះ ប៉ុន្តែក្រុមឈ្មួញទុច្ចរិតដែលប្រើកាណូតម៉ាស៊ីនធំៗមិនទាន់ឃើញបង្ក្រាបបាននៅឡើយទេ។ ចំណែកការបង្ក្រាបបទល្មើសព្រៃឈើ ក៏ដូចគ្នាដែរ គឺបង្ក្រាបបានតែអ្នកកាប់អុស រីឯឈ្មួញទុច្ចរិតរកស៊ីកាប់ឈើធំៗនៅមិនទាន់ឃើញចាប់បាននៅឡើយដែរ។ លោកបានចោទសួរថា៖ «តើបង្ក្រាបក្រុមឈ្មួញទុច្ចរិតមិនបាន ឬមកពីមន្ត្រីយើងស៊ីសំណូកគេ?»។
លោកបានបន្តថា មានមន្ត្រីខ្លះរាយការណ៍ថា មានករណីចុះបង្ក្រាបខ្លះត្រូវបានបែកការណ៍ហើយក្រុមប្រព្រឹត្តបទល្មើសដែលវាយរហ័ស ដករហ័ស បានដឹងខ្លួនជាមុន បានបើកកាណូតរត់គេចខ្លួនអស់ ព្រោះកាណូតរបស់ពួកគេលឿនពេក តាមមិនទាន់។
លោក ហ៊ុន សែន បានដាក់បញ្ជាឱ្យកម្ចាត់ក្រុមឈ្មួញទុច្ចរិត ដែលប្រព្រឹត្តបទល្មើសនេសាទ បំផ្លាញត្រីលើផ្ទៃបឹងទន្លេសាបឱ្យអស់ ព្រោះពួកគេមិនមែនជាប្រជាជនក្រីក្រនោះទេ។ ម្យ៉ាងទៀតកិច្ចខិតខំប្រឹងប្រែង ក្នុងការបង្ក្រាបបទល្មើស ដើម្បីការពារធនធានជលផលក្នុងបឹងទន្លេសាបឱ្យមាននិរន្តរភាពយូរអង្វែងរបស់ប្រជាជន មន្ត្រី និងកងកម្លាំងត្រូវបានកប់លុបដោយក្រុមឈ្មួញទុច្ចរិត ដែលប្រព្រឹត្តបទល្មើសទាំងនោះ។
លោកបញ្ជាក់ថា៖ «តើកាណូតរបស់ក្រុមឈ្មួញទុច្ចរិតទាំងនោះ វាលឿនប៉ុនណាទៅ? ខ្ញុំបញ្ជាឱ្យត្រៀមឧទ្ធម្ភាគចក្រ កងទ័ពជើងទឹក ដើម្បីចុះបង្ក្រាបចាប់ពួកហ្នឹង យកមកញាត់គុកឱ្យអស់។ កុំបាច់មានគោលនយោបាយជាមួយពួកប្រព្រឹត្តបទល្មើស»។ លោកបានបន្ថែមថា៖ «រឿងសំខាន់ថា តើអស់លោកធ្វើបាន ឬមិនបាន? បើបង្ក្រាបពួកប្រព្រឹត្តបទល្មើសនេសាទមិនបាន មិនបាច់ធ្វើអភិបាលខេត្ត ធ្វើរដ្ឋមន្ត្រី និងធ្វើមេនគរបាល មេយោធានោះទេ»។
ដោយភ្ជាប់ជាមួយបទបញ្ជាបង្ក្រាបបទល្មើសកាប់ទន្ទ្រានដីព្រៃលិចទឹកជុំវិញបឹងទន្លេសាប លោកនាយករដ្ឋមន្ត្រីបានណែនាំឱ្យគ្រប់ក្រសួង ស្ថាប័នពាក់ព័ន្ធ ជាពិសេសអាជ្ញាធរខេត្ត ជុំវិញបឹងទន្លេសាប ធ្វើការរៀបចំដាំកូនឈើលើផ្ទៃដីជាង ៦ ម៉ឺនហិកតា ដែលប្រជាពលរដ្ឋបានប្រគល់មកវិញនោះឡើងវិញ និងធ្វើការថែទាំជាប្រចាំ ធ្វើយ៉ាងណា ហាមផ្តាច់មិនឱ្យមានសកម្មភាពទន្ទ្រានដីព្រៃលិចទឹកបឹងទន្លេសាបកើតឡើងវិញ ដើម្បីឱ្យកូនឈើទាំងនោះធំលូតលាស់ ក្លាយជាព្រៃលិចទឹក សម្រាប់ជាទីជម្រកមច្ឆជាតិក្នុងអំឡុងពេល ៣ ឆ្នាំខាងមុខ។
លោក សុខ ទូច ប្រធានរាជបណ្ឌិត្យសភាកម្ពុជា ដែលបានចុះសិក្សាស្រាវជ្រាវពីការកាប់រុករានដីព្រៃលិចទឹក និងបទល្មើសនេសាទនៅបឹងទន្លេសាប កាលពីពេលថ្មីៗនេះ ដែលលោកថា វាដល់ដំណាក់កាលដែលត្រូវប្រកាសអាសន្ននោះបានថ្លែងថា បទល្មើសនេសាទនៅបឹងទន្លេសាបនេះ គឺមានច្រើនប្រភេទ។
លោកបានថ្លែងប្រាប់ភ្នំពេញ-ប៉ុស្តិ៍តាមរយៈបទសម្ភាសន៍ថា៖ «វាសឹងតែការនេសាទនៅបឹងទន្លេសាប គឺល្មើសទាំងអស់ទាំងអ្នកនេសាទក្នុងស្រុក និងអ្នកនេសាទមកពីក្រៅស្រុក (ជនជាតិវៀតណាម) គឺល្មើសទាំងអស់ គ្រាន់តែបទល្មើសនោះ មានខ្លះធ្ងន់ ខ្លះស្រាល ទៅតាមឧបករណ៍នេសាទរបស់ពួកគេ»។
លោកបន្តថា៖ «ចំណុចនេះ យើងកុំបន្ទោសជលផល គឺយើងត្រូវដឹងទាំងអស់គ្នាថា ពីមុន អំណាចបានផ្ដល់វិមជ្ឈការទៅថ្នាក់ក្រោមជាតិ អ៊ីចឹង ខេត្ដគឺជាអំណាចធំណាស់។ ខ្ញុំចង់ឃើញលោកអភិបាលខេត្ដ ខ្ញុំមិនដឹងខេត្ដណា ខ្ញុំអត់និយាយទេ ប៉ុន្ដែបើនិយាយពីបឹងទន្លេសាបនេះ បើធ្វើកន្លែងហ្នឹងមិនកើតសូមលាលែងទៅ មិនមែនដូរពីខេត្តមួយទៅខេត្តមួយអ៊ីចឹងទេ។ អត់ចេះខ្មាសអៀនសោះ»។
លោក សុខ ទូច បានលើកឡើងថា ដើម្បីអភិវឌ្ឍធនធានត្រីនៅបឹងទន្លេសាប ដែលមានផ្ទៃដីរហូតទៅដល់ ៦៤ ម៉ឺនហិកតាឱ្យបានគង់វង្ស តកូនតចៅ គឺត្រូវមានការចូលរួមអភិរក្សទាំងអស់គ្នា ដោយត្រូវពន្យល់ប្រាប់ប្រជាពលរដ្ឋឱ្យយល់ពីតម្លៃនៃការអភិរក្សធនធានត្រីឱ្យបានគង់វង្ស ដោយត្រូវហាមដាច់ខាតការប្រើឧបករណ៍នេសាទខុសច្បាប់។ លោកបញ្ជាក់ថា៖ «យើងត្រូវពន្យល់ប្រជាជនឱ្យពួកគាត់យល់ នេះជាចំណុចទី ១ ចំណែកទី ២ គឺការអនុវត្ដច្បាប់ ក្រោយពីការពន្យល់រួចហើយគឺយើងត្រូវអនុវត្ដច្បាប់»៕
វីដេអូ៖
