លោក ហ៊ុន សែន ក្នុងពិធីសម្ពោធអគារមជ្ឈមណ្ឌលនៃមន្ទីរពេទ្យព្រះអង្គឌួង ពីថ្ងៃទី ២៨ មីនា។ រូប SPM
ភ្នំពេញៈ ប្រមុខរាជរដ្ឋាភិបាល លោក ហ៊ុន សែន សម្តែងក្តីកង្វល់ពីការវិវឌ្ឍនៃមេរោគបំប្លែងថ្មី ក្រៅពីប្រភេទអូមីក្រុង ថាតើវានឹងមានការបំប្លែង ឬប្រែក្លាយទៅជាអ្វីទៀត ដែលវានៅតែជាបញ្ហា ដោយលោកបានជំរុញឱ្យស្ថាប័នពាក់ព័ន្ធ ត្រូវបន្តធ្វើការតាមដានជាប់លាប់នូវការប្រែប្រួលទាំងឡាយនៃជំងឺនេះ។
ក្នុងពិធីសម្ពោធដាក់ឱ្យប្រើប្រាស់ជាផ្លូវការ អគារមជ្ឈមណ្ឌលត្រចៀក ច្រមុះ បំពង់កនៃមនី្ទរពេទ្យព្រះអង្គឌួង នាថ្ងៃទី ២៨ ខែមីនា លោកនាយករដ្ឋមន្ត្រី ហ៊ុន សែន ថ្លែងថា៖ «យើងត្រូវតាមដានឱ្យជាប់នូវការប្រែប្រួលទាំងឡាយនៃការវិវឌ្ឍនៃជំងឺនេះនៅក្នុងពិភពលោក និងនៅក្នុងប្រទេសជុំវិញប្រទេសរបស់យើង។ នៅប្រទេសថៃ វៀតណាម និងឡាវ កំពុងតែកើត ហើយតួលេខនៃការឆ្លងក្នុងប្រទេសទាំងនេះកំពុងតែមានការកើនឡើងផងដែរ ខណៈដែលប្រទេសយើងកំពុងតែថយចុះ»។
លោក ហ៊ុន សែន ក៏បានជំរុញឱ្យមានការពិនិត្យឱ្យបានហ្មត់ចត់ផងដែរ ចំពោះពលករ ដែលធ្វើដំណើរមកពីប្រទេសថៃ។ អ្នកដែលមិនបានចាក់វ៉ាក់សាំងត្រូវធ្វើចត្តាឡីស័កចំនួន ១៤ ថ្ងៃ ហើយមកដល់ពេលនេះមានពលករខ្មែរដែលកំពុងធ្វើចត្តាឡីស័កជាង ១ ពាន់នាក់ផងដែរនៅតាមព្រំដែនកម្ពុជា-ថៃ។
លោកបន្ថែមថា ស្ថានភាពនៃការឆ្លងរីករាលដាលនៃមេរោគកូវីដ ១៩ នៅឆ្នាំ ២០២២ នេះ មានសភាពធូរស្រាលច្រើន បើធៀបនឹងឆ្នាំមុនៗ។ ប៉ុន្តែលោក ហ៊ុន សែន មិនទាន់ឱ្យមានភាពអត្តនោម័តជាមួយនឹងកូវីដ ១៩ នេះទេ ដោយសារមេរោគនេះនៅតែឆ្លងដោយមិនរើសមុខនៅឡើយ។ លោកនាយករដ្ឋមន្ត្រីលើកឡើងទៀតថា ចំនួនអ្នកឆ្លងដែលកំពុងសម្រាកព្យាបាលជំងឺកូវីដ ១៩ ក្នុង បន្ទប់សង្គ្រោះបន្ទាន់ មានចំនួនតែជាង ៤០ នាក់ប៉ុណ្ណោះ ខណៈអ្នកសម្រាកព្យាបាលកម្រិតស្រាលក៏មានតែប៉ុន្មានរយនាក់ប៉ុណ្ណោះដែរ។
លោក ហ៊ុន សែន មានប្រសាសន៍ថា៖ «ខ្ញុំសូមថ្លែងនូវការកោតសរសើរចំពោះក្រសួងសុខាភិបាល ក្រុមគ្រូពេទ្យទាំងអស់នៅទូទាំងប្រទេសកម្ពុជា ដែលក្នុងរយៈពេលជាង ២ ឆ្នាំកន្លងទៅនេះបានប្រឹងប្រែងយ៉ាងខ្លាំង ដើម្បីជម្នះនូវការលំបាកទាំងឡាយដែលបង្កឡើងដោយជំងឺរាតត្បាតសកលកូវីដ ១៩»។
ឆ្នាំមុន ពេលនេះ ម៉ោងនេះ ជាពេលវេលាដ៏លំបាក ក្រោយពេលដែលព្រឹត្តិការណ៍ ២០ កុម្ភៈបានចាប់ផ្តើម ដែលពេលវេលានោះ កម្ពុជាចាប់ផ្តើមមានមនុស្សស្លាប់ និងរាប់រយនាក់បានឆ្លងជំងឺកូវីដ ១៩ ក្នុង ១ ថ្ងៃៗ ហើយនិងមានអ្នកដែលសម្រាកក្នុងមន្ទីរពេទ្យយ៉ាងកកកុញផងដែរ។
លោកនាយករដ្ឋមន្ត្រីថ្លែងថា៖ «យើងមិនដែលបណ្តែតបណ្តោយឱ្យប្រជាពលរដ្ឋរបស់យើងណាម្នាក់ស្លាប់ ដោយគ្មានការពិនិត្យ និងព្យាបាលនោះឡើយ ហើយក៏គ្មានប្រជាពលរដ្ឋយើងដេកឈឺតាមចិញ្ចើមថ្នល់នោះដែរ»។
បើតាមលោក ហ៊ុន សែន អ្នកជំងឺកូវីដ ១៩ ដែលកំពុងសម្រាកព្យាបាលក្នុងមន្ទីរពេទ្យ មានប្រមាណ ៦០០ នាក់ហើយជាអ្នកជំងឺស្រាល។ ឯអ្នកដែលកំពុងសម្រាកព្យាបាលក្នុងបន្ទប់សង្គ្រោះបន្ទាន់មានចំនួន ៤៤ នាក់។
លោក ហ៊ុន សែន បញ្ជាក់ថា៖ «ប្រៀបធៀបស្ថានភាពឆ្នាំទៅ និងឆ្នាំនេះ មានភាពខុសគ្នា ប៉ុន្តែខ្ញុំនៅតែបញ្ជាក់ថា យើងមិនត្រូវអត្តនោម័តជាមួយនឹងកូវីដ ១៩ ទេ ព្រោះថា វាមិនរើសមុខនោះទេ។ ប៉ុន្តែពេលនេះយើងមានវ៉ាក់សាំង និងបានចាក់ជូនប្រជាពលរដ្ឋបានជាង ៩២% ហើយដែរ ដែលធ្វើឱ្យមានភាពស៊ាំសហគមន៍ក្នុងការកាត់បន្ថយនូវការឆ្លង ឬឆ្លងហើយ តែវាមិននាំមកនូវភាពធ្ងន់ធ្ងរនោះទេ»។
លោកនាយករដ្ឋមន្ត្រីក៏បានប្រកាសដោយមោទនភាពថា ក្នុងពិធីបុណ្យចូលឆ្នាំថ្មីប្រពៃណីជាតិឆ្នាំនេះប្រជាពលរដ្ឋនឹងមានឱកាសសម្រាប់ដើរកម្សាន្តដែលកម្ពុជាបានខកខានប្រារព្ធពិធីបុណ្យចូលឆ្នាំថ្មី ២ ឆ្នាំរួចមកហើយ។ ទោះយ៉ាងណា លោកនៅតែបន្តអំពាវនាវឱ្យប្រជាពលរដ្ឋអនុវត្តវិធានការសុខាភិបាល ៣ កុំ និង ៣ ការពារ ដោយមិនត្រូវមានការភ្លេចខ្លួនក្នុងការការពារខ្លួននោះទេ។
លោក ហ៊ុន សែន ថ្លែងថា៖ «ការកសាងមន្ទីរពេទ្យដែលអាចដាក់អ្នកជំងឺបានជាង ១ ម៉ឺននាក់ នៅតែបន្តកសាងដដែល ហើយប្រសិនបើពេលណាមួយអស់កូវីដ យើងនឹងប្រើប្រាស់អគារទាំងនោះទៅជាអគារពិនិត្យ ព្យាបាលជំងឺធម្មតាវិញ ដោយសារមន្ទីរពេទ្យនោះ មានកន្លែងវះកាត់ សម្ភព និងជំងឺដទៃទៀត ដោយមានការបំពាក់បរិក្ខារទំនើបផងដែរ»។
ទាក់ទងនឹងព័ត៌មានដែលបានផ្សព្វផ្សាយថា អ្នកដែលចាក់វ៉ាក់សាំងកូវីដ ១៩ របស់សាធារណរដ្ឋប្រមានិត-ចិននឹងកើតជំងឺមហារីក លោកនាយករដ្ឋមន្ត្រី ហ៊ុន សែន បានបង្ហាញពីការហួសចិត្តចំពោះអ្នកដែលបង្កើតព័ត៌មានមិនពិតនេះឡើង។
លោកថ្លែងថា៖ «ខ្ញុំមិននឹកស្មានថា នៅមានមនុស្សប្រភេទនេះ ដែលនិយាយដូចនេះ។ វ៉ាក់សាំងត្រូវបានគេចាក់រាប់ពាន់លាននាក់រួចហើយ។ ក្នុងនោះមិនមែនមានតែប្រទេសកម្ពុជាយើងជាង ១៤ លាននាក់នោះទេ ដែលបានចាក់វ៉ាក់សាំងបង្ការកូវីដ ១៩»។
លោកស្រី ឱ វណ្ណឌីន ប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស លើកឡើងដែរថា ការបង្កើតពាក្យប្រឌិត បំផុសចលនា មិនឱ្យមានការចាក់វ៉ាក់សាំង គឺជាការខុសឆ្គងធំណាស់ ដែលអាចបង្កឱ្យមានគ្រោះមហន្តរាយដល់ពលរដ្ឋផង សុខភាពសាធារណៈផង និងសង្គមជាតិផងដែរ។
លោកស្រីបានថ្លែងថា៖ «អ្នកដែលបង្កើតពាក្យប្រឌិតទាំងនេះ មិនមែនគាត់មិនយល់ទេ តែខ្ញុំគិតថា ពួកគាត់មានបំណងផ្សេង។ គឺគាត់នឹងទះដៃសាទរ នៅពេលដែលមានការឆ្លងឡើងវិញម្តងទៀត បើបងប្អូនមិនបានចាក់ដូសជំរុញដើម្បីបង្កើតកងការពារពីកូវីដ ១៩ នេះ»។
លោកស្រីបន្ថែមថា វ៉ាក់សាំងបានជួយសង្គ្រោះអាយុជីវិតរបស់ប្រជាពលរដ្ឋបានយ៉ាងធំធេងណាស់ ដោយមិនត្រូវមើលរំលងឡើយ។ វ៉ាក់សាំងកូវីដ ១៩ ទាំងអស់ ដែលកំពុងប្រើប្រាស់នៅប្រទេសកម្ពុជា សុទ្ធតែជាវ៉ាក់សាំងដែលត្រូវបានទទួលស្គាល់ដោយអង្គការសុខភាពពិភពលោក។
យោងតាមក្រសួងសុខាភិបាលឱ្យដឹងថា រហូតដល់ចុងខែកញ្ញា ឆ្នាំ ២០២២ ខាងមុខ កម្ពុជានឹងទទួលបានវ៉ាក់សាំងសរុបរហូតដល់ជិត ៥០ លានដូស ដែលបច្ចុប្បន្ន កម្ពុជាទទួលបានវ៉ាក់សាំងប្រឆាំងកូវីដ ១៩ ទាំងការបញ្ជាទិញ និងជំនួយជាង ៤៣ លានដូសហើយ៕
