កិច្ចប្រជុំឧត្ដមមន្ត្រីការពារជាតិអាស៊ានពីថ្ងៃ ២៨ មីនា។ រូបថត ក្រសួងការពារជាតិ
ភ្នំពេញៈ ក្រុមឧត្ដមមន្ត្រីការពារជាតិនៃបណ្តាប្រទេសអាស៊ាន និងប្រទេសអាស៊ានបូកដែលដឹកនាំដោយកម្ពុជាកំពុងពិភាក្សាពីការពង្រឹងសាមគ្គីភាពក្នុងតំបន់ ដើម្បីឆ្លើយតបជំងឺរាតត្បាតកូវីដ ១៩ ស្តារឡើងវិញ ក្រោយកូវីដ ១៩ និងដោះស្រាយបញ្ហាប្រឈមដែលកំពុងកើតមាន។
អគ្គនាយកដ្ឋាននយោបាយ និងកិច្ចការបរទេសក្រសួងការពារជាតិកម្ពុជាបានដឹកនាំកិច្ចប្រជុំក្រុមការងារឧត្តមមន្ត្រីការពារជាតិអាស៊ាន (ADSO-MWC) និងកិច្ចប្រជុំក្រុមការងារឧត្តមមន្ត្រីការពារជាតិអាស៊ាន-បូក (ADSOM-Plus WG) ជាលើកទី ២ ក្នុងរយៈពេល ២ ថ្ងៃ ចាប់ពីថ្ងៃ ២៨ ដល់ ២៩ ខែមីនា តាមប្រព័ន្ធវីដេអូ។
កិច្ចប្រជុំទាំង ២ នេះ ប្រព្រឹត្តទៅក្រោមមូលបទ «សាមគ្គីភាពដើម្បីសន្តិសុខប្រកបដោយភាពសុខដុម» និងមានការចូលរួមពីប្រធានក្រុមការងារឧត្តមមន្ត្រីការពារជាតិនៃរដ្ឋជាសមាជិកអាស៊ាន ប្រធានក្រុមការងារឧត្តមមន្ត្រីការពារជាតិនៃបណ្តាប្រទេសបូក និងអគ្គលេខាធិការដ្ឋានអាស៊ាន។
អគ្គនាយកដ្ឋាននេះបញ្ជាក់ក្នុងសេចក្តីប្រកាសព័ត៌មាននៅថ្ងៃទី ២៨ ខែមីនា ថា៖ «[មូលបទនេះ] ជាការឆ្លុះបញ្ចាំងពីសុច្ឆន្ទៈរបស់កម្ពុជា ក្នុងនាមប្រធានកិច្ចប្រជុំរដ្ឋមន្ត្រីការពារជាតិអាស៊ាន និងកិច្ចប្រជុំពាក់ព័ន្ធក្នុងឆ្នាំ ២០២២ ដើម្បីពង្រឹងសាមគ្គីភាពតំបន់ឆ្លើយតបបញ្ហាប្រឈមរួមក្នុងនោះរួមមាន ការឆ្លើយតបជំងឺរាតត្បាតកូវីដ ១៩ ប្រកបដោយប្រសិទ្ធភាព និងការចូលរួមស្តារឡើងវិញក្រោយកូវីដ ១៩ ប្រកបដោយបរិយាប័ន្ន ក៏ដូចជាការពង្រឹងភាពជាដៃគូក្នុងការដោះស្រាយរួមគ្នានូវបញ្ហាប្រឈមជាប្រពៃណី និងមិនប្រពៃណីផ្សេងទៀតកំពុងកើតមានដោយឈរលើគោលការណ៍មជ្ឈភាព បរិយាប័ន្ន និងតួនាទីនាំមុខរបស់អាស៊ាន»។
កិច្ចប្រជុំក្រុមការងារឧត្តមមន្ត្រីការពារជាតិអាស៊ានគឺធ្វើការពិនិត្យបញ្ចប់លើឯកសារទស្សនាទានចំនួន ៣ របស់កម្ពុជា និងលក្ខខណ្ឌប្រតិបត្តិមជ្ឈមណ្ឌលឧត្តមភាពព័ត៌មាន និងសន្តិសុខអ៊ីនធឺណិតនៃក្របខ័ណ្ឌកិច្ចប្រជុំរដ្ឋមន្ត្រីការពារជាតិអាស៊ាន ដែលបានឯកភាពជាបណ្តោះអាសន្នកាលពីកិច្ចប្រជុំនាខែកុម្ភៈ កន្លងមក។
តាមសេចក្តីប្រកាសព័ត៌មានដដែល កិច្ចប្រជុំនេះក៏ពិភាក្សាផងដែរលើឯកសារស្តីពីការបង្កើតទំនាក់ទំនងរវាងគំនិតផ្តួចផ្តើមអនុវត្តច្បាប់ដែនសមុទ្រអាស៊ីអាគ្នេយ៍ និងកិច្ចប្រជុំរដ្ឋមន្ត្រីការពារជាតិអាស៊ានបូកក្នុងវិស័យសន្តិសុខលម្ហសមុទ្រ និងឯកសារប្រវត្តិសាស្ត្រយោធា ដើម្បីលើកកម្ពស់សន្តិភាពប្រកបដោយចីរភាព។
កិច្ចប្រជុំនេះក៏បន្តពិចារណាលើឯកសារៈសំខាន់ៗចំនួន ៣ រួមមាន សេចក្តីព្រាងសេចក្តីប្រកាសរួមនៃចក្ខុវិស័យភ្នំពេញស្តីពីតួនាទីស្ថាប័នការពារជាតិក្នុងការគាំទ្រការស្តារឡើងវិញក្រោយកូវីដ ១៩ សេចក្តីព្រាងសេចក្តីថ្លែងការណ៍រួមរបស់កិច្ចប្រជុំរដ្ឋមន្ត្រីការពារជាតិអាស៊ាន និងសេចក្តីព្រាងសេចក្តីថ្លែងការណ៍រួមរបស់កិច្ចប្រជុំរដ្ឋមន្ត្រីការពារជាតិអាស៊ានបូក។
កិច្ចប្រជុំដដែលនេះក៏ពិភាក្សាលើការប្រុងប្រៀបសម្រាប់រៀបចំកិច្ចប្រជុំឧត្តមមន្ត្រីការពារជាតិអាស៊ាន (ADSOM) និងកិច្ចប្រជុំឧត្តមមន្ត្រីការពារជាតិអាស៊ានបូក (ADSOM-Plus) ដែលគ្រោងធ្វើនៅពាក់កណ្តាលខែឧសភា ដើម្បីឆ្ពោះទៅរកកិច្ចប្រជុំរដ្ឋមន្ត្រីការពារជាតិអាស៊ាន (ADMM) លើកទី ១៦ ក្នុងខែមិថុនា ខាងមុខ។
ដោយឡែកកិច្ចប្រជុំក្រុមការងារឧត្តមមន្ត្រីការពារជាតិអាស៊ានបូកគឺជាការធ្វើបច្ចុប្បន្នភាពផែនការការងាររបស់ក្រុមការងារជំនាញក្រោមក្របខ័ណ្ឌកិច្ចប្រជុំរដ្ឋមន្ត្រីការពារជាតិអាស៊ានបូកក៏ដូចជា ពិនិត្យបញ្ចប់លើសេចក្តីព្រាងសេចក្តីថ្លែងការណ៍រួមរបស់កិច្ចប្រជុំរដ្ឋមន្ត្រីការពារជាតិអាស៊ានបូក រួមទាំងការប្រុងប្រៀបរៀបចំកិច្ចប្រជុំឧត្តមមន្ត្រីការពារជាតិអាស៊ាន-បូកផងដែរ។
លោក ថុង ម៉េងដាវិត អ្នកសិក្សាស្រាវជ្រាវនៅមជ្ឈមណ្ឌលមេគង្គសម្រាប់ការសិក្សាយុទ្ធសាស្ត្រនៃវិទ្យាស្ថានចក្ខុវិស័យអាស៊ីប្រាប់ភ្នំពេញប៉ុស្តិ៍នៅថ្ងៃទី ២៨ ខែមីនាថា បញ្ហាសន្តិសុខនៅអាស៊ានគឺជាសសរស្តម្ភស្នូលមួយ តែវាកំពុងជួបប្រទះបញ្ហាជាច្រើនដូចជា វិបត្តិនៅមីយ៉ាន់ម៉ា សមុទ្រចិនខាងត្បូង សង្គ្រាមរុស្ស៊ី-អ៊ុយក្រែន ការប្រកួតប្រជែងភូមិសាស្ត្រនយោបាយរបស់មហាអំណាចក្នុងតំបន់ និងបញ្ហាសន្តិសុខមិនប្រពៃណីមួយចំនួនទៀតដូចជា បញ្ហាកូវីដ ១៩ ជនភៀសខ្លួន ការជួញដូរមនុស្ស និងគ្រឿងញៀនជាដើម។
លោកបន្តថា កត្តាទាំងនេះត្រូវការសហការគ្នាល្អរវាងប្រទេសនៅអាស៊ានក្នុងការចែករំលែកព័ត៌មាន ដោះដូរបទពិសោធ និងកិច្ចប្រជុំដោះដូរយោបល់ក៏ដូចជាការដាក់ចេញគោលនយោបាយរួមប្រកបដោយបរិយាប័ន្ន ដើម្បីរក្សាឱ្យបាននូវស្ថិរភាព សន្តិសុខល្អ និងវិបុលភាពក្នុងតំបន់សម្រាប់ការអភិវឌ្ឍ និងប្រជាជន។
លោក ម៉េង ដាវិត ថ្លែងថា៖ «អាស៊ានបានក្លាយជាទិសដៅស្នូលក្នុងការដោះដូរពាណិជ្ជកម្មពិភពលោក ផ្គត់ផ្គង់វត្ថុធាតុដើម ក៏ដូចជា ចង្វាក់ផលិតកម្មជាដើម។ ដូចនេះអាស៊ានត្រូវតែរក្សានូវជំហរអព្យាក្រឹត គោរពតាមច្បាប់អន្តរជាតិ និងជំរុញការដោះស្រាយបញ្ហាក្នុងតំបន់ក៏ដូចជាអន្តរជាតិតាមយន្តការសន្តិភាព និងការគោរពគ្នាទៅវិញទៅមក»៕
.jpg)
