សត្វស្លាបនៅតំបន់អភិរក្សបឹងស្នេហ៍ទួលពាន់តាឡីដែលងាប់ពីថ្ងៃទី ២៤ មីនា។ រូបថត ហ្វេសប៊ុក
ព្រៃវែងៈ សត្វស្លាបរាប់រយក្បាលត្រូវបានប្រទះឃើញឈឺងាប់នៅតំបន់អភិរក្សបឹងស្នេហ៍ទួលពាន់តាឡី ស្ថិតនៅក្នុងស្រុកបាភ្នំ ខេត្តព្រៃវែង ដោយសារកត្តាអាកាសធាតុក្តៅ ខណៈមន្ត្រីជំនាញបានដើរប្រមូលសត្វងាប់ទាំងនោះទៅកប់ចោលដើម្បីបញ្ចៀសក្លិនស្អុយរាលដាលទៅសត្វផ្សេងទៀត។
នេះបើតាមការអះអាងរបស់មន្ត្រីជំនាញនៅតំបន់នោះ។
លោក តូច វ៉ារដ្ឋា ប្រធានមន្ទីរបរិស្ថានខេត្តព្រៃវែងបានប្រាប់ភ្នំពេញប៉ុស្តិ៍នៅថ្ងៃទី ២៩ ខែមីនាថា សត្វស្លាបទាំងនោះបានចាប់ផ្តើមងាប់ជាបន្តបន្ទាប់ចាប់ពីដើមខែមីនាមក ដោយក្នុង ១ ថ្ងៃងាប់ចន្លោះពី ២០ ទៅជាង ៣០ ក្បាល។ លោកថា៖ «វាអត់មានអីប្លែកទេ ព្រោះឆ្នាំមុនកើតឡើងអ៊ីចឹងដែរក្នុងអំឡុងខែមីនា និងមេសា ព្រោះអំឡុងខែនេះអាកាសធាតុគឺក្តៅ អ៊ីចឹងធ្វើឱ្យសត្វឈឺហើយស្លាប់»។
លោកបន្តថា វិធានការចំពោះមុខគឺមន្ត្រីជំនាញក៏ដូចជាប្រជាសហគមន៍បានដើរប្រមូលសត្វងាប់ទាំងនោះទៅកប់ចោលជារៀងរាល់ថ្ងៃ។ លោកថា នេះជាដំណោះស្រាយដ៏ល្អ និងទទួលបានផលដែលតែងតែធ្វើកន្លងមក រីឯសំណាកសត្វងាប់ទាំងនោះក៏ត្រូវបានយកទៅមន្ទីរពិសោធន៍ផងដែរ។
លោកបានបញ្ជាក់ថា៖ «នៅពេលសត្វងាប់យើងក៏យកសំណាកទៅមន្ទីរពិសោធន៍ដែរ ប៉ុន្តែចំពោះលទ្ធផលមិនទាន់ចេញនៅឡើយទេ។ ប៉ុន្តែអ្វីដែលយើងធ្វើគឺតាមជំនាញប្រមូលទៅកប់ដើម្បីកុំឱ្យសត្វដែលងាប់នោះនៅស្អុយពាសវាលពាសកាលជះក្លិនទៅសត្វផ្សេង អ៊ីចឹងយើងព្យាយាមប្រមូលវាឱ្យអស់ទៅកប់ ដូច្នេះវាមិនរាលដាលទៀតទេ បើយើងមិនធ្វើអ៊ីចឹងទេវានឹងរាលដាលដល់សត្វផ្សេង បើមានក្លិនស្អុយមនុស្សក៏ទ្រាំមិនបានដែរ»។
ទោះជាយ៉ាងណា លោកថាតាមការសង្កេតនាប៉ុន្មានថ្ងៃចុងក្រោយនេះ សត្វងាប់មានការថយចុះវិញ ដោយសារអាកាសធាតុចុះត្រជាក់ ខណៈលោកសង្ឃឹមថា ស្ថានភាពសត្វស្លាបនៅតំបន់អភិរក្សនឹងវិលទៅរកភាពប្រក្រតីវិញនាពេលឆាប់ៗខាងមុខនេះ។
លោកថា៖ «ប៉ុន្មានថ្ងៃចុងក្រោយនេះអាកាសធាតុត្រជាក់ មិនសូវក្តៅដូចប៉ុន្មានថ្ងៃមុន សត្វងាប់ថយច្រើន បើប្រៀបធៀបទៅថយពាក់កណ្តាលនៃចំនួនសត្វងាប់ក្នុង ១ ថ្ងៃ ២០ ទៅជាង ៣០ ក្បាល ប៉ុន្តែប៉ុន្មានថ្ងៃចុងក្រោយនេះងាប់ចន្លោះពី ១០ ទៅ ២០ ក្បាលប៉ុណ្ណោះ»។
លោក នួន សារ៉េត អនុប្រធានសហគមន៍អភិរក្សបឹងស្នេហ៍ទួលពាន់តាឡី បានឱ្យដឹងថា ក្នុងអំឡុងពេលដើរល្បាតនោះមានការសង្កេតឃើញថា សត្វចាប់ផ្តើមងាប់ច្រើនពីថ្ងៃទី ៦ ខែមីនា មក ដោយសារអាកាសធាតុក្តៅ ខណៈសត្វខ្លះឈឺ សត្វខ្លះអាយុចាស់ ហើយមួយចំនួនទៀតអាច ពុលអាចម៍របស់វា។
លោកបានបន្តថា តួលេខបឋមគិតត្រឹមថ្ងៃទី ២៩ ខែមីនា មានសត្វស្លាបងាប់ជាង ៣០០ ក្បាល ហើយសត្វស្លាបដែលងាប់ទាំងនោះមានដូចជា សត្វចង្កៀលខ្យង ក្អែកទឹក កុកគ្រោង ខ្វែក ត្រយងខ្លួនរលោងជាដើម។
លោកបន្តថា ទោះបីមានសត្វស្លាបងាប់ច្រើនក្តី ប៉ុន្តែប្រជាសហគមន៍នៅតែបន្តចុះល្បាតរៀងរាល់ថ្ងៃ តាំងពីព្រឹករហូតដល់ព្រលប់ ដើម្បីប្រមូលសត្វងាប់មកកប់ចោលផង និងការពារផង។ លោកថា ករណីសត្វងាប់នេះមិនប៉ះពាល់ដល់លំហូរភ្ញៀវទេសចរនោះទេ ខណៈតំបន់នោះទទួលបានភ្ញៀវទេសចរជារៀងរាល់ថ្ងៃ។ លោកថា៖ «ព្រោះភ្ញៀវទេសចរអញ្ជើញមកលេងជារៀងរាល់ថ្ងៃ ចន្លោះពី ៥០ ទៅ ១០០ នាក់។
បើតាមលោក នួន សារ៉េត ចំនួនសត្វស្លាបនៅតំបន់អភិរក្សបឹងស្នេហ៍ទួលពាន់តាឡីបានកើនឡើងជាបន្តបន្ទាប់ ទោះបីមានករណីសត្វងាប់ក្តី។ លោកថា៖ «ពីមុន សត្វស្លាបមានពី ២ ទៅ ៣ លានក្បាល ហើយឥឡូវនេះមានប្រហែលពី ៣ ទៅ ៤ លានក្បាល៕
វីដេអូ៖
