លោក កឹម សុខា ពេលចេញពីតុលាការរាជធានី ក្រោយពីចូលរួមសវនាការពីថ្ងៃទី ១៦ មីនា។ ហុង មិនា
ភ្នំពេញៈ សាលាដំបូងរាជធានីភ្នំពេញនៅថ្ងៃទី ៣០ ខែមីនា បានបន្តសវនាការលើសំណុំរឿងលោក កឹម សុខា អតីតប្រធាននៃអតីតគណបក្សសង្គ្រោះជាតិ ដោយបានសួរដេញដោលលើការចាប់ផ្តើមបង្កើតគណបក្សសង្គ្រោះជាតិ និងអង្គហេតុនៅមុនការបោះឆ្នោត ប៉ុន្តែសហមេធាវីរបស់លោក កឹម សុខា បានជំទាស់ចំពោះអង្គហេតុទាំងអស់នេះ ព្រោះត្រូវបានសួរដេញដោលរួចម្តងមកហើយ កាលពីសវនាការលើកមុន។
លោក ផែង ហេង សហមេធាវី របស់លោក កឹម សុខា បានប្រាប់ក្រុមអ្នកសារព័ត៌មាននៅខាងមុខសាលាដំបូងរាជធានីភ្នំពេញថា តុលាការបានបន្តសវនាការសំណុំរឿងរបស់លោក កឹម សុខា ដូចសព្វដង ដោយបានកំណត់យកអង្គហេតុមកសួរដេញដោលពាក់ព័ន្ធនឹងការចាប់ផ្តើមបង្កើតគណបក្សសង្គ្រោះជាតិ និងអង្គហេតុនៅមុនបោះឆ្នោត។
លោកបន្តថា សវនាការលើកនេះ សំណួរភាគច្រើនត្រូវបានតាំងដោយតំណាងអយ្យការ ប៉ុន្តែសំណួរទាំងអស់នោះ ទាំងកូនក្តី និងសហមេធាវី កត់សម្គាល់ឃើញថាជាសំណួរដែលធ្លាប់សួរកាលពីពេលកន្លងមកហើយ និងបានស្នើតំណាងអយ្យការឱ្យទៅមើលកំណត់ហេតុដែលកត់ត្រា និងឆ្លើយរួចហើយ។ ជាមួយគ្នានេះតុលាការក៏បានឱ្យចាក់វីដេអូឃ្លីបចំនួន ៥ ដើម្បីឆ្លើយតបទៅនឹងសំណួររបស់តំណាងអយ្យការ ដែលចង់ដឹងពាក់ព័ន្ធនឹងគោលនយោបាយរបស់គណបក្សសង្គ្រោះជាតិ និងការបង្កើតគណបក្សសង្គ្រោះជាតិ។
លោកថ្លែងថា៖ «បើយើងពិនិត្យមើលចុងក្រោយថា ការសួរដេញដោល វាជានីតិវិធីចុងក្រោយដែលក្រុមប្រឹក្សាកំណត់។ ប៉ុន្តែបើយើងមើលសំណុំរឿង មានការកោះហៅសាក្សី និងភាគីពាក់ព័ន្ធ។ ដូច្នេះក្រុមសហមេធាវីក៏មិនអាចវាយតម្លៃថានឹងឆាប់ចប់ ឬក៏យឺតយ៉ាងណាទេ ដោយសារអាស្រ័យលើសំណួរ។ បើមានសំណួរច្រើន វាត្រូវចំណាយពេលក្នុងការឆ្លើយ។ មួយទៀត សាក្សីនោះ ហៅចំនួនប៉ុន្មាន។
បើតាមលោក ផែង ហេង តុលាការក៏បានកោះហៅសាក្សីមួយចំនួនរួចហើយ។ ប៉ុន្តែក្រុមសហមេធាវីក៏ដូចជា លោក កឹម សុខា ប្រហែលជាអាចនឹងស្នើសុំឱ្យតុលាការកោះហៅសាក្សី ដែលតុលាការបានចោទប្រកាន់ ដែលមានការពាក់ព័ន្ធនឹងសំណុំរឿង «សន្ទិដ្ឋភាពជាមួយបរទេស» ដែលមេធាវីដើមបណ្តឹងរដ្ឋប្បវេណីធ្វើការចោទប្រកាន់ មានដូចជា សហរដ្ឋអាមេរិក អាល្លឺម៉ង់ សហគមន៍អឺរ៉ុប អង្គការអន្តរជាតិ អង្គការ USAID និងអង្គការ konrad ជាដើម ដើម្បីមកបង្ហាញការពិតជូនតុលាការ។
លោក ផែង ហេង ថ្លែងថា៖ «យើងនឹងពិនិត្យមើល តើគួរឱ្យហៅសាក្សីណាខ្លះដែលចាំបាច់ ដើម្បីបង្ហាញការពិតទៅលើ សំណុំរឿងលោក កឹម សុខា នេះ។ សំណួរដែលសួររួចហើយ យើងនឹងជំទាស់កុំឱ្យសួរទៀត ដើម្បីកុំឱ្យខាតពេល ព្រោះយើងចង់ឱ្យដំណើរការនីតិវិធីដើរទៅលឿន ដើម្បីផ្តល់យុត្តិធម៌ឱ្យកូនក្តីរបស់យើង»។
លោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញថ្លែងថា ដំណើរការសវនាការលោក កឹម សុខា អតីតប្រធានគណបក្សសង្គ្រោះជាតិនៅថ្ងៃទី ៣០ ខែមេសា ឆ្នាំ ២០២២ បានសាកសួរចម្លើយជនជាប់ចោទដោយខាងតំណាងអយ្យការ ហើយសវនាការបន្តទៀតនោះនឹងត្រូវធ្វើនៅថ្ងៃទី ៦ ខែមេសា ឆ្នាំ ២០២២ វេលាម៉ោង ៨:៣០ នាទីព្រឹក។
លោក កឹម សុខា ត្រូវបានចាប់ខ្លួនកាលពីថ្ងៃទី ៣ ខែកញ្ញា ឆ្នាំ ២០១៧ នៅគេហដ្ឋានរបស់លោកដែលស្ថិតនៅសង្កាត់បឹងកក់ ២ ខណ្ឌទួលគោក និងត្រូវបានបញ្ជូនទៅដាក់ក្នុងពន្ធនាគារត្រពាំងផ្លុង ខេត្តត្បូងឃ្មុំ ដោយចោទពីបទ «សន្ទិដ្ឋភាពជាមួយបរទេស» ឬ «ឃុបឃិត ជាមួយបរទេសដើម្បីផ្តួលរំលំរដ្ឋាភិបាលកម្ពុជា» ដោយគិតមកដល់ពេលនេះ គឺមានរយៈពេលជាង ៤ ឆ្នាំ។ លោក កឹម សុខា ត្រូវបានដោះលែងឱ្យនៅក្រៅឃុំ កាលពីថ្ងៃទី ១០ ខែវិច្ឆិកា ឆ្នាំ ២០១៩ ប៉ុន្តែត្រូវបានដាក់ឱ្យស្ថិតក្រោមការត្រួតពិនិត្យរបស់តុលាការ៕
វីដេអូ៖
