មន្ត្រីកម្ពុជាពេលទៅទទួលវ៉ាក់សាំងជំនួយពីចិនកាលពីថ្ងៃទី ២៩ មីនា។ ហេង ជីវ័ន
ភ្នំពេញៈ វ៉ាក់សាំងកូវីដ ១៩ ប្រភេទស៊ីណូវ៉ាក់ប្រមាណ ៣,៥ លានដូសបន្ថែមទៀតដែលជាជំនួយពីរដ្ឋាភិបាលនៃសាធារណរដ្ឋប្រជាមានិត្យចិន ត្រូវបានដឹកមកដល់ព្រលានយន្តហោះអន្តរជាតិភ្នំពេញនៅព្រឹកថ្ងៃទី ៣០ ខែមីនា បន្ទាប់ពីវ៉ាក់សាំងចំនួនជាង ១,៥ លានដូសទើបបានដឹកមកដល់កាលពីថ្ងៃទី ២៩ ខែមីនា ឆ្នាំ ២០២២។
វ៉ាក់សាំងទាំង ៥ លានដូសនេះជាការផ្តល់ និងដឹកមកដល់ប្រទេសកម្ពុជាក្នុងចំណោមវ៉ាក់សាំង ២០ លានដូសដែលប្រធានាធិបតីចិន លោក ស៊ី ជីនភីង បានសន្យាផ្តល់ជូនរដ្ឋាភិបាល និងប្រជាជនកម្ពុជា។ ប្រទេសចិនគឺជាអ្នកដែលបានជួយវ៉ាក់សាំងបង្ការជំងឺកូវីដ ១៩ ដំបូងគេមកកាន់ប្រទេសកម្ពុជា។ ក្នុងនោះវ៉ាក់សាំងជំនួយចំនួន ៦០ ម៉ឺនដូសបានដឹកមកដល់ប្រទេសកម្ពុជាជាលើកដំបូងនៅថ្ងៃទី ៧ ខែកុម្ភៈ ឆ្នាំ ២០២១។
លោកស្រី យក់ សម្បត្តិ រដ្ឋលេខាធិការក្រសួងសុខាភិបាលបានថ្លែងប្រាប់អ្នកសារព័ត៌មាននៅព្រលានយន្តហោះអន្តរជាតិភ្នំពេញក្នុងពេលទទួលយកវ៉ាក់សាំងជាង ១,៥ លានដូសកាលពីថ្ងៃទី ២៩ ខែមីនាថាកម្ពុជាបានចាត់ទុកប្រទេសចិនគឺជាប្រទេសមួយដែលបានផ្តល់ជំនួយវ៉ាក់សាំងដល់កម្ពុជាជាយុទ្ធសាស្ត្រ ហើយកន្លងមកកម្ពុជាក៏បានទទួលនូវវ៉ាក់សាំងពីប្រទេសចិនជាច្រើនផងដែរ។
លោកស្រីបានឱ្យដឹងថា៖ «កម្ពុជាក៏មានដៃគូច្រើនក្នុងការជួយដល់ប្រទេសយើងក្រៅពីប្រទេសចិន ប៉ុន្តែក្នុងនោះប្រទេសចិនជាប្រទេសមួយដែលឈានមុខគេក្នុងការផ្តល់វ៉ាក់សាំងកូវីដ ១៩ មកដល់ប្រទេសកម្ពុជា»។
លោកស្រី យក់ សម្បត្តិ ក៏បានលើកឡើងដែរថា មន្ត្រីនៃធនាគារពិភពលោកបានកោតសរសើរដល់ប្រទេសកម្ពុជា និងបានស្នើមកកម្ពុជាឱ្យផ្តល់ជាបទពិសោធ និងជាមេរៀនសម្រាប់ប្រទេសជិតខាងផងដែរពីលទ្ធផលល្អនៃការចាក់វ៉ាក់សាំង និងការប្រយុទ្ធនឹងជំងឺកូវីដ ១៩ នេះ។
កាលពីថ្ងៃទី ២៨ ខែមីនា ឆ្នាំ ២០២២ កន្លងទៅនេះ លោកនាយករដ្ឋមន្ត្រី ហ៊ុន សែន បានលើកឡើងថា ឆ្នាំនេះកម្ពុជាមានស្ថានភាពល្អប្រសើរ ដែលទាំងនេះក៏ដោយសារតែយុទ្ធសាស្ត្រនៃការចាក់ស្រោចវ៉ាក់សាំងកូវីដ ១៩បានទាន់សភាពការណ៍ផងដែរ។
ប៉ុន្តែទោះជាយ៉ាងណាក៏ដោយ លោក ហ៊ុន សែន នៅតែបន្តអំពាវនាវឱ្យប្រជាពលរដ្ឋទាំងអស់មេត្តាយកចិត្តទុកដាក់ការពារការឆ្លងជំងឺកូវីដ ១៩ ជាពិសេសអនុវត្តនូវវិធានការ ៣ កុំ ៣ ការពារឱ្យបានខ្ជាប់ខ្ជួនជានិច្ច។
ដោយឡែកកាលពីថ្ងៃទី ២៨ ខែមីនា កន្លងទៅ លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសបានទទួលជួបជាមួយលោក W.Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជា, លោកស្រី Nancy Eslick ប្រធានបេសកកម្មរបស់ទីភ្នាក់ងារសហរដ្ឋអាមេរិក ដើម្បីអភិវឌ្ឍន៍អន្តរជាតិ (USAID) និងលោកស្រី Rachel Albalak ប្រធានមជ្ឈមណ្ឌលបង្ការ និងគ្រប់គ្រងជំងឺឆ្លងសហរដ្ឋអាមេរិក (US-CDC)។
បើតាមក្រសួងសុខាភិបាលជំនួបនេះធ្វើឡើងដើម្បីសិក្សាស្វែងយល់អំពីប្រព័ន្ធសុខាភិបាលកម្ពុជា ពិភាក្សាអំពីកិច្ចសហប្រតិបត្តិការពង្រឹងសុខាភិបាលក្នុងក្របខ័ណ្ឌនៃកិច្ចព្រមព្រៀង ៥ ឆ្នាំបន្ត (DOG)។
លោកស្រី ឱ វណ្ណឌីន បានលើកឡើងពីស្ថានភាពជំងឺកូវីដ-១៩ ព្រមទាំងយុទ្ធនាការចាំបាច់ និងសំខាន់ៗដែលត្រូវបានអនុវត្តនាពេលកន្លងមករហូតឈានទៅគ្រប់គ្រងការរាតត្បាត និងការបើកប្រទេសឡើងវិញក្នុងគន្លងប្រក្រតីភាពថ្មី។
លោកស្រីបញ្ជាក់ថា៖ «លទ្ធផលសម្រេចដ៏ជាទីមោទនៈនេះបានមកពីការដឹកនាំប្រកបដោយគតិបណ្ឌិតរបស់សម្តេចនាយករដ្ឋមន្ត្រីតាមរយៈការដាក់ចេញនូវផែនការយុទ្ធសាស្ត្រប្រយុទ្ធនឹងជំងឺកូវីដ ១៩ និងផែនការស្រោចស្រពចាក់វ៉ាក់សាំងកូវីដ-១៩ តាមយុទ្ធសាស្ត្រផ្ការីក»។
ថ្មីៗនេះក្រសួងសុខាភិបាលបានដាក់ចេញនូវផែនការជំរុញការថែទាំសុខភាពបឋម (Primary Healthcare Booster) ដោយផ្តោតលើតម្រូវការរបស់សហគមន៍ដែលទាមទារឱ្យមានការចូលរួមពីប្រជាជនជាមួយនឹងការគាំទ្រពីដៃគូអភិវឌ្ឍន៍។ នេះបើតាមការបញ្ជាក់ពីលោកស្រី ឱ វណ្ណឌីន។
នាឱកាសនោះដែរ លោក W. Patrick Murphy បានសាទរ និងកោតសរសើរនូវការខិតខំជាបន្តបន្ទាប់ និងជាប្រចាំរបស់ក្រសួងសុខាភិបាលក្នុងការពង្រឹងប្រព័ន្ធសុខាភិបាល ការលើកកម្ពស់គុណភាពសុខាភិបាល ជាពិសេសការគ្រប់គ្រងការរាតត្បាតជំងឺកូវីដ ១៩។
លោកក៏បានបញ្ជាក់នូវគោលជំហររបស់សហរដ្ឋអាមេរិកក្នុងការបន្តគាំទ្រពង្រឹងវិស័យសុខាភិបាលព្រមទាំងពិនិត្យលទ្ធភាពសហប្រតិបត្តិការក្នុងផែនការជំរុញការថែទាំសុខភាពបឋមដោយផ្តោតលើតម្រូវការរបស់សហគមន៍ដែលទើបនឹងផ្តួចផ្តើមអនុវត្តថ្មីៗនេះផងដែរ។
យោងតាមរបាយការណ៍របស់ក្រសួងសុខាភិបាលបានឱ្យដឹងថា គិតត្រឹមថ្ងៃទី ២៩ ខែមីនា ឆ្នាំ ២០២២ កម្ពុជាបានចាក់វ៉ាក់សាំងកូវីដ ១៩ ទៅដល់ប្រជាពលរដ្ឋសរុបចំនួន ៩២,៦២ ភាគរយធៀបនឹងចំនួនពលរដ្ឋ ១៦ លាននាក់។
របាយការណ៍បន្តថា សម្រាប់អ្នកដែលបានចាក់វ៉ាក់សាំងដូសជំរុញ ឬដូសទី ៣ មានចំនួនជិត ៨ លាននាក់ និងអ្នកដែលបានចាក់ដូសទី ៤ បានចំនួនជាង ១ លាននាក់ផងដែរ៕
