ភ្នំពេញៈ ឯកអគ្គរាជទូតកម្ពុជា ប្រចាំនៅ ចក្រភពអង់គ្លេស លោក កាន់ ផារិទ្ធ បានបំពាក់ មេដាយកិត្តិយសសហមេត្រីរបស់រាជរដ្ឋាភិបាលកម្ពុជាជូនលោក Lou McGrath សម្រាប់ការងារមនុស្សធម៌នៅកម្ពុជា ដែលបានជួយដល់ជនរងគ្រោះដោយសារសង្គ្រាម តាមរយៈមូលនិធិ Sir Bobby Charlton Foundation នៅកម្ពុជា។
លោក លី ធុជ ទេសរដ្ឋមន្ត្រី និង ជាអនុប្រធាន ទី១ អាជ្ញាធរមីន បានថ្លែងថា អាជ្ញាធរមីន បានសម្របសម្រួល និងធ្វើការជាមួយស្ថានទូតកម្ពុជា ប្រចាំនៅចក្រភពអង់គ្លេសរួចហើយក្នុង ការបំពាក់មេដាយ ជូនដល់ លោក Lou McGrath កាលថ្ងៃទី១៤ ខែមេសា។ នេះបើ យោងតាមសេចក្តីប្រកាសព័ត៌មានអាជ្ញាធរមីន ដែលភ្នំពេញប៉ុស្តិ៍ទទួលបាននាថ្ងៃទី១៥ ខែ មេសា។
លោក ថ្លែងថា ចាប់តាំងពីការបង្កើតឡើង កាលពី១១ឆ្នាំមុន មូលនិធិ Sir Bobby Charlton ក្រោមការដឹកនាំរបស់លោក Lou McGrath បានគាំទ្រការបោសសម្អាតមីន និងជាតិផ្ទុះសល់ពីសង្គ្រាមដ៏សំខាន់នៅក្នុងតំបន់ ក៏ដូចជាការបង្កើតកម្មវិធីអប់រំពីហានិភ័យដោយសារមីន និងកម្មវិធីបណ្តុះបណ្តាល អវៈយវៈសិប្បនិមិត្ត និងផ្តល់មូលនិធិដល់មជ្ឈមណ្ឌលបណ្តុះបណ្តាលវិជ្ជាជីវៈសម្រាប់ជនមានពិការភាពក្នុងខេត្តពោធិ៍សាត់។
បើតាមសេចក្តីប្រកាសព័ត៌មានដដែល មូលនិធិ Sir Bobby Charlton តាមរយៈអាជ្ញាធរមីន បានចូលរួមជួយសម្រាលបន្ទុកដល់ជីវភាពរស់នៅរបស់ប្រជាពលរដ្ឋ និងគ្រួសាររងផលប៉ះពាល់ដោយសារការរីករាលដាលជំងឺកូវីដ១៩។
បើតាមសេចក្តីប្រកាសព័ត៌មានដដែល បញ្ជាក់ថា៖ «ដោយសារជំងឺកូវីដ១៩ ពិធីបំពាក់ មេដាយ បានធ្វើឡើងនៅចក្រភពអង់គ្លេស សាល Booths, Knutsford និងមានការចូលរួមដោយអភិបាលក្រុង Knutsford លោក Cllr Stewart Gardner។
លោក Lou McGrath បានប្រាប់ លោក លី ធុជ តាមរយៈបណ្តាញទំនាក់ទំនង WhatApp ថា វាជាកិត្តិយសសម្រាប់ក្រុមប្រឹក្សាភិបាលនៃមូលនិធិ Sir Bobby Charlton ដែលបានទទួលនូវមេដាយកិត្តិយសនេះ ហើយលោក បានថ្លែងអំណរគុណដល់រាជរដ្ឋាភិបាលកម្ពុជា តាមរយៈអាជ្ញាធរមីន។
លោកថ្លែងថា អស់រយៈពេលជាច្រើនឆ្នាំមកហើយ ដែលលោកបានចូលរួមជាមួយសកម្មភាពមីននៅកម្ពុជា ហើយបានបង្កើតមិត្តយ៉ាងច្រើននៅកម្ពុជា។
លោក «សូម» ចែករំលែកកិត្តិយសនេះជូនដល់មិត្តភក្ដិកម្ពុជា ដែលបានចូលរួមជាមួយលោកក្នុងការប្រយុទ្ធប្រឆាំងនឹងផលប៉ះពាល់ដោយសារគ្រាប់មីន និងសំណល់ជាតិផ្ទុះពីសង្គ្រាមនៅកម្ពុជា។
សេចក្តីប្រកាសព័ត៌មានដដែលបញ្ជាក់ថា៖ «លោក Lou McGrath បានថ្លែងអំណរគុណដល់អាជ្ញាធរមីនចំពោះការប្តេជ្ញាចិត្ត និងការខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការសម្រេចបាននូវគោលបំណង និងគោលដៅនៃសន្ធិសញ្ញាហាមប្រាមគ្រាប់មីន ក្នុងនាមជាប្រទេសហត្ថលេខី»៕
វីដេអូ៖
