ពលរដ្ឋនៅស្រុកខ្សាច់កណ្តាលលេងជះទឹក ប៉ាតម្សៅនៅថ្ងៃបុណ្យចូលឆ្នាំខ្មែរទី ១៦ មេសា។ ហេង ជីវ័ន
ភ្នំពេញៈ លោកនាយករដ្ឋមន្ត្រី ហ៊ុន សែន បានលើកឡើងថា ក្នុងរយៈពេល ១ ឬ ២ សប្តាហ៍ ក្រោយពីពិធីបុណ្យចូលឆ្នាំថ្មីប្រពៃណីជាតិខ្មែរ កម្រិតនៃការឆ្លងរីករាលដាលនៃវីរុសកូវីដ ១៩ ឬភាពស៊ាំនៃសហគមន៍នឹងអាចដឹង ហើយពេលនោះក្រសួង និងស្ថាប័នពាក់ព័ន្ធនឹងបន្តចាត់វិធានការចាំបាច់នានា ដើម្បីឆ្លើយតបទៅនឹងសភាពការណ៍ដែលកើតឡើងនៅពេលនោះ។
លោកនាយករដ្ឋមន្ត្រី បានថ្លែងបែបនេះ នាថ្ងៃទី ១៦ ខែមេសា ក្នុងពិធីអភិសេករូបសំណាក «ព្រះថោងនាងនាគ» នៅខេត្តព្រះសីហនុដែលជាថ្ងៃទី ៣ នៃពិធីបុណ្យចូលឆ្នាំខ្មែរ។ ជាមួយ គ្នានោះលោកក៏បានណែនាំដល់អាជ្ញាធរគ្រប់លំដាប់ថ្នាក់មិនត្រូវអនុវត្ដនូវច្បាប់ទាក់ទងនឹងការគ្រប់គ្រងកូវីដ ១៩ និងជំងឺឆ្លងដទៃទៀតក្នុងដំណាក់កាលនៃពិធីបុណ្យចូលឆ្នាំនេះទេលើកលែងតែមានស្ថានភាពឆ្លងធ្ងន់ធ្ងរណាមួយកើតមានឡើង។ លោក ហ៊ុន សែន ថា នៅតាមភូមិ ឃុំ តាមតំបន់ទេសចរណ៍នានា នៅតែដំណើរការធម្មតា ពិតមែនតែលោកនៅមានកង្វល់នៅឡើយ តែលោកក៏នឹងលើកទឹកចិត្តឱ្យប្រជាពលរដ្ឋអាចធ្វើដំណើរលេងកម្សាន្តនៅក្នុងក្របខ័ណ្ឌទូទាំងព្រះរាជាណាចក្រកម្ពុជា។
យ៉ាងណាក្តី លោកនាយករដ្ឋមន្ត្រីក៏បានអំពាវនាវដល់ប្រជាពលរដ្ឋឱ្យបន្តការអនុវត្តនូវវិធានការការពារនៃការឆ្លងវីរុសកូវីដ ១៩ ហើយប្រសិនបើមានការសង្ស័យត្រូវធ្វើតេស្តភ្លាម បើឃើញថា វិជ្ជមានត្រូវដាក់ខ្លួនដាច់ដោយឡែកនិងព្យាបាលជាបន្ទាន់ ដើម្បីទប់ស្កាត់ការរីករាលដាល។ បើទោះបីជារាជរដ្ឋាភិបាលបានបើកឱ្យខេត្តចំនួន ៤ អនុញ្ញាតឱ្យប្រជាពលរដ្ឋក្នុងខេត្ត ធ្វើការជ្រើសរើសពាក់ ឬមិនពាក់ម៉ាស់ក៏ដោយ ក៏ប៉ុន្តែក្នុងរយៈកាល ៣ ថ្ងៃកន្លងទៅនេះ មានប្រជាពលរដ្ឋជាច្រើន មិនបានពាក់ម៉ាស់នោះទេ។
ទាក់ទងនឹងចំណុចនេះលោក ហ៊ុន សែន បញ្ជាក់ថា៖ «ប្រជាពលរដ្ឋរបស់យើងត្រូវតែបន្តការពារកុំឱ្យមានការឆ្លងរាលដាល ក្រោយពេលរដូវចូលឆ្នាំ។ សុំទៅទទួលយកដូសជំរុញជា ដូសទី ៣ ឬដូសទី ៤ ឱ្យបានគ្រប់ៗគ្នា។ មុនពេលវិលត្រឡប់ទៅផ្ទះវិញ។ សុំទទួលយកវ៉ាក់សាំងនៅទីកន្លែងដែលបានរៀបចំជូននៅតាមបណ្តាខេត្ត វត្តអារាម និងកន្លែងខ្លះទៀត ដែលមានការរៀបចំដោយអាជ្ញាធរខេត្តទាំងឡាយ»។
លោកមានប្រសាសន៍បន្តថា៖ «យើងនឹងធ្វើកិច្ចការងារនេះ ដើម្បីធានាថា កម្ពុជាមានសុវត្ថិភាពគ្រប់គ្រាន់ បើទោះបីជាចូលឆ្នាំមនុស្សរាប់លាននាក់ ហើយកន្លែងខ្លះមានការពពាក់ពពូនយ៉ាងខ្លាំងក៏ដោយ ក៏ប៉ុន្តែស្ថានភាពឆ្លងមិនត្រូវបានមើលឃើញ។ ប៉ុន្តែយើងត្រូវរង់ចាំមើលក្រោយចូលឆ្នាំខ្មែររយៈពេល ១ សប្តាហ៍ទៅ ២ សប្តាហ៍ យើងអាចដឹងបានថា តើកម្រិតនៃការឆ្លងមានរហូតដល់ណា? ពេលនោះយើងនឹងបន្តចាត់វិធានការចាំបាច់នានា ដើម្បីឆ្លើយតបទៅនឹងសភាពការណ៍ដែលកើតឡើងនៅពេលនោះ»។ លោក ហ៊ុន សែន មានក្តីសង្ឃឹមថា ប្រជាពលរដ្ឋនឹងទទួលយកនូវសំណូមពរនេះ តាមរយៈនៃការខិតខំទទួលយកនូវវ៉ាក់សាំងដូសជំរុញដើម្បីធានាថា ប្រទេសកម្ពុជាមានសុវត្ថិភាពគ្រប់គ្រាន់ និងបន្តការសប្បាយរីករាយដោយបន្តការយកចិត្តទុកដាក់ ប្រុងប្រយ័ត្ននៃការរីករាលវីរុសកូវីដ ១៩។ លោកថា៖ «ត្រូវបន្តតាមដាននូវកិច្ចការងារនេះបន្តទៀត។ ផុតពីអាទិត្យក្រោយទៅ យើងនឹងអាចវាយតម្លៃបានតើភាពស៊ាំសហគមន៍របស់យើងដល់កម្រិតណា?»។
ទន្ទឹមនឹងនេះដែរលោកក៏បានសង្កេតឃើញផងដែរថា ពិតជាមានការសប្បាយរីករាយ និងមានសាមគ្គីភាពក្នុងចំណោមប្រជាជននៅតាម ភូមិ តាមឃុំ និងទីកន្លែងកម្សាន្តនានា បើទោះបីប្រទេសកម្ពុជាមាន ១៧ គណបក្សដែលត្រៀមប្រកួតប្រជែងនៅក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ នាពេលខាងមុខនេះក៏ដោយចុះ ក៏ប៉ុន្ដែមិនបានឃើញនូវសញ្ញានៃការបែងចែករើសអើងណាមួយ នៅក្នុងចំណោមប្រជាជននៅពេលវេលាដែលមកដល់សម្រាប់ការបោះឆ្នោតនោះទេ។
លោក ហ៊ុន សែនបញ្ជាក់ទៀតថា៖ «គេ [ពលរដ្ឋ] ចូលរាំសប្បាយរីករាយចូលលេងជាមួយគ្នា ដោយមិនគិតថា អ្នកណានៅខាងគណបក្សណានោះទេ។ ការទទួលបានវ៉ាក់សាំងក៏ដូចគ្នាកម្ពុជាគ្មានការរើសអើងណាមួយនៅក្នុងចំណោមប្រជាពលរដ្ឋរបស់ខ្លួនទោះបីជឿលើបក្សណាក៏ដោយ សុទ្ធតែទទួលបាននូវវ៉ាក់សាំងទាំងអស់ នេះហើយជាមោទនភាពរបស់កម្ពុជារបស់ខ្មែរយើង»។ លោកបន្តថា ថ្ងៃទី ១៦ ជាថ្ងៃចុងក្រោយនៃពិធីបុណ្យចូលឆ្នាំខ្មែរ ប៉ុន្ដែប្រជាពលរដ្ឋក៏នឹងលេងបន្តដោយសារថ្ងៃទី ១៦ នេះទើបតែថ្ងៃសៅរ៍ ពលរដ្ឋអាចលេងកម្សាន្តដល់ថ្ងៃអាទិត្យ ហើយភូមិ ឃុំ និងតំបន់រមណីយដ្ឋានខ្លះ អាចបន្តលេងកម្សាន្តទៅមុខទៀត ពីព្រោះទម្លាប់ប្រជាពលរដ្ឋ គឺលេងមុន ១ សប្ដាហ៍ និងក្រោយកន្លះខែថែមទៀត។
គួររំឭកផងដែរថា កម្ពុជាបានខកខានប្រារព្ធពិធីបុណ្យចូលឆ្នាំខ្មែរអស់រយៈពេល ២ ឆ្នាំមកហើយ ដោយសារការរាតត្បាតនៃមេរោគកូវីដ ១៩ គឺនៅឆ្នាំ ២០២០ និង ២០២១៕
វីដេអូ៖
