ភ្នំពេញៈអតីតអគ្គមេបញ្ជាការអាជ្ញាធរបណ្តោះអាសន្នអង្គការសហប្រជាជាតិនៅកម្ពុជាឬហៅថាអ៊ុនតាក់ (UNTAC) លោក John Murray Sanderson AC និងលោកស្រី Lorraine Sanderson ជាភរិយាបានចាប់ផ្តើមបំពេញទស្សនកិច្ចនៅកម្ពុជារយៈពេល ១០ ថ្ងៃចាប់ពីថ្ងៃទី ២៣ ខែមេសាដល់ថ្ងៃទី ២ ខែឧសភា ដើម្បីអបអរខួបទី ៣០ ឆ្នាំនៃអ៊ុនតាក់និងក៏ជាផ្នែកមួយនៃការអបអរខួបទី ៧០ ឆ្នាំនៃទំនាក់ទំនងការទូតរវាង អូស្ត្រាលី និងកម្ពុជា។
សេចក្តីប្រកាសព័ត៌មាន ស្ថានទូតអូស្ត្រាលីប្រចាំកម្ពុជាបញ្ជាក់នៅថ្ងៃទី ២២ ខែមេសា ក្នុងដំណើរទស្សនកិច្ចនេះ លោកSanderson និងលោកស្រី Sanderson នឹងចូលគាល់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជានិងសម្តេចព្រះមហាក្សត្រី នរោត្តម មុនីនាថ សីហនុ នៃព្រះរាជាណាចក្រកម្ពុជា។
លោកនិងលោកស្រី Sanderson ក៏នឹងជួបជាមួយលោកនាយករដ្ឋមន្ត្រី ហ៊ុន សែន នាយករដ្ឋមន្ត្រី ព្រមទាំងជួបជាមួយឧបនាយករដ្ឋមន្ត្រី ទេសរដ្ឋមន្ត្រីអភិបាលខេត្តមន្ត្រីសំខាន់ៗ និងតំណាងសង្គមស៊ីវិលផងដែរ។
សេចក្តីប្រកាសព័ត៌មានដដែលបញ្ជាក់ថា៖ «កិច្ចប្រជុំទាំងនេះផ្តល់ឱកាសដើម្បីឆ្លុះបញ្ចាំងពីការរួមចំណែកផ្ទាល់ខ្លួន និងមិត្តភាពដែលបានកសាងទំនាក់ទំនងដ៏រឹងមាំរវាងអូស្ត្រាលី និងកម្ពុជាក្នុងរយៈពេល៧០ឆ្នាំកន្លងមកនេះ និងជួយបង្ហាញពីរបៀបដែលយើងអាចពង្រឹងទំនាក់ទំនងរបស់យើងបន្ថែមទៀតទៅអនាគត»។
លោក Sanderson នឹងបើកការតាំងពិព័រណ៍មួយដែលរៀបចំដោយស្ថានទូតអូស្ត្រាលីជាមួយមជ្ឈមណ្ឌលសិក្សាបណ្តុះបណ្តាលកសាងសន្តិភាព និងដោះស្រាយទំនាស់ និងវិទ្យាស្ថានចក្ខុវិស័យអាស៊ី (AVI) ដើម្បីរំឭកខួបលើកទី៣០ឆ្នាំ នៃអ៊ុនតាក់ នៅសណ្ឋាគារ RafflesHotel Le Royal។
ពិព័រណ៍អ៊ុនតាក់នឹងបើកជូនដោយសេរីដល់សាធារណជនចាប់ពីម៉ោង ៧ ព្រឹកដល់ ម៉ោង ៩ យប់ជារៀងរាល់ថ្ងៃ ចាប់ពីថ្ងៃទី ២៩ ខែមេសាដល់ថ្ងៃទី ២៨ ខែឧសភា។
ស្ថានទូតអូស្ត្រាប្រចាំកម្ពុជាចាត់ទុក អ៊ុនតាក់ជាសម័យកាលប្រវត្តិសាស្ត្រមួយសម្រាប់ប្រទេសកម្ពុជា និងជាគំរូដ៏ល្អនៃកិច្ចសហប្រតិបត្តិការនយោបាយនិងសន្តិសុខអន្តរជាតិប្រកបដោយប្រសិទ្ធភាពដែលប្រទេសជប៉ុន និងប្រទេសជាសមាជិកអាស៊ានមួយចំនួនបានរួមចំណែកសំខាន់ៗផងដែរ។
អ៊ុនតាក់ត្រូវបានបង្កើតឡើងដោយអង្គការសហប្រជាជាតិក្នុងឆ្នាំ ១៩៩២ ដើម្បីត្រួតពិនិត្យការអនុវត្តកិច្ចព្រមព្រៀងសន្តិភាពទីក្រុងប៉ារីស ការធ្វើមាតុភូមិនិវត្តន៍ប្រកបដោយសុវត្ថិភាពរបស់ប្រជាជនកម្ពុជា ដែលបានផ្លាស់លំនៅដោយសង្គ្រាមស៊ីវិល និងការបោះឆ្នោតជាតិឆ្នាំ ១៩៩៣។
លោក Sanderson បានបញ្ជាកងកម្លាំងពហុភាគីដ៏ធំរបស់ខ្លួន ដែលមានកងវរសេនាតូចថ្មើរជើង និងអង្គភាពគាំទ្រចំនួន ១២ អ្នកសង្កេតការណ៍យោធា និងនគរបាលស៊ីវិលសរុបចំនួន ២ ២ ០០០ នាក់មកពីប្រមាណ ៤០ ប្រទេសផ្សេងៗគ្នា។
បន្ថែមពីការផ្តល់បញ្ជាការផ្នែកយោធា អូស្ត្រាលីក៏បានផ្តល់បុគ្គលិកជាង ១ ២០០ នាក់ ដល់អ៊ុនតាក់ផងដែរ។
អូស្ត្រាលីបានផ្តល់ជំនួយដំបូងដែលជាអង្គភាពទំនាក់ទំនងកម្លាំងដែលមានបុគ្គលិក៤៨៨នាក់ ដោយភាគច្រើនមកពីកងវរសេនាធំសញ្ញាទី ២ របស់កងទ័ពអូស្ត្រាលី។
កងនាវាចរណ៍ទី ២ រួមមានកងទ័ពជើងទឹកភូមិន្ទអូស្ត្រាលី កងទ័ពអាកាសភូមិន្ទអូស្ត្រាលី និងកងទ័ពរបស់នូវែលសេឡង់។ អ្នកផ្តល់សញ្ញាអូស្ត្រាលី ឬហៅថា បុគ្គលិកទំនាក់ទំនងបានបំពេញការងារជាប់ជាមួយ នឹងអង្គភាពអ៊ុនតាក់ផ្សេងៗទៀតនៅទូទាំងប្រទេសកម្ពុជា ដើម្បីរក្សាទំនាក់ទំនងជាមួយទីបញ្ជាការ កងកម្លាំង។
សេចក្តីប្រកាសព័ត៌មានដដែលបានដកស្រង់សម្ដីលោក Sanderson ថា៖ «អ្នកផ្តល់សញ្ញាទាំងនោះគឺជា កាវដែលភ្ជាប់បេសកកម្មជាប់ជាមួយគ្នា»។
លោក ហ៊ុន សែន ថ្មីៗនេះ បានប្រកាសថា បន្ទាប់ពីលោកវិលត្រឡប់ពីដំណើរទស្សនកិច្ចនៅជប៉ុននាថ្ងៃទី ២៤ ខែមេសា លោកនឹងទទួលជួបពិភាក្សាការងារជាមួយលោក Sanderson ដែលគ្រោងនឹងទៅទស្សនកិច្ចនៅកន្លែងមួយចំនួនដែលលោកមិនដែលបានចូលទៅកាន់កាលពីអំឡុងទសវត្សរ៍ឆ្នាំ ១៩៩០។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា ប្រាប់ភ្នំពេញប៉ុស្តិ៍នាថ្ងៃទី ២៤ ខែមេសា ថា ប្រទេសអូស្ត្រាលីកន្លងមក បានដើរតួនាទីសំខាន់ក្នុងដំណើរការកសាងសន្តិភាពនៅកម្ពុជា ហើយដំណើរទស្សនកិច្ចរបស់លោក Sanderson នេះគឺជាការរំឭកឡើងវិញអំពីការរួមចំណែករបស់អូស្ត្រាលីនៅក្នុងក្នុងដំណើរការកសាងសន្តិភាពនៅកម្ពុជា ក៏ដូចជាការស្តារនិងអភវិឌ្ឍប្រទេសកម្ពុជាឡើងវិញ។
លោកបន្ថែមថា៖ «ហើយក៏បង្ហាញពីការប្តេជ្ញាចិត្តរបស់អូស្ត្រាលីក្នុងការអនុវត្តកិច្ចព្រមព្រៀងសន្តិភាពទីក្រុងបារីស និងបន្តការអនុវត្តបន្តស្មារតីកិច្ចព្រមព្រៀងសន្តិភាពទីក្រុងបារីស ហើយអ្វីដែលគេចង់សង្កត់ធ្ងន់នៅទីនេះគឺខ្ញុំគិតមើលទៅគឺពាក់ព័ន្ធជាមួយនឹងការអនុវត្តគោលការណ៍ប្រជាធិបតេយ្យ សិទ្ធិមនុស្ស នីតិរដ្ឋអីជាដើម អ៊ីចឹង»៕