លោកនាយករដ្ឋមន្ត្រី ហ៊ុន សែន ថ្លែងក្នុងពិធីបិទសន្និបាតកាលពីម្សិលមិញ។ រូបថត SPM
ភ្នំពេញៈ លោក ហ៊ុន សែន នាយករដ្ឋមន្ដ្រីនៃកម្ពុជាផ្ដល់អនុសាសន៍ ៦ ចំណុចដល់ក្រសួងអប់រំ ដើម្បីលើកទឹកចិត្ដ និងយកចិត្ដទុកដាក់លើកិច្ចការអប់រំខណៈរាជរដ្ឋាភិបាលតែងតែផ្តល់អាទិភាពទី១ លើការអភិវឌ្ឍធនធានមនុស្សដើម្បីលើកស្ទួយ និងអភិវឌ្ឍវិស័យអប់រំកម្ពុជា។
លោកនាយករដ្ឋមន្ដ្រី ហ៊ុន សែន ថ្លែងបែបនេះក្នុងពេលអញ្ជើញជាអធិបតីបិទសន្និបាតបូកសរុបការងារឆ្នាំសិក្សា២០២០-២០២១ និងលើកទិសដៅការងារឆ្នាំសិក្សា២០២១-២០២២ នៅវិទ្យាស្ថានបច្ចេកវិទ្យាកម្ពុជា (តិចណូ) កាលពីថ្ងៃទី២៧ ខែមេសា ឆ្នាំ២០២២នេះ។
លោកបានថ្លែងកោតសរសើរ និងវាយតម្លៃខ្ពស់ចំពោះអង្គសន្និបាតអប់រំនេះ ដែលទទួលបានសមិទ្ធផលគួរជាទីមោទនៈលើការងារអប់រំ ការអភិវឌ្ឍយុវជន ការអប់រំកាយ និងកីឡាជាមួយនឹងកម្មវិធីកែទម្រង់អប់រំស៊ីជម្រៅ ៨ ចំណុចស្របតាមបរិការណ៍ថ្មីៗនៃការអភិវឌ្ឍសង្គម-សេដ្ឋកិច្ច ទាំងក្នុងតំបន់ និងពិភពលោក ជាពិសេសការរក្សាបាននូវសុខសន្តិភាព ស្ថិរភាពនយោបាយ និង ម៉ាក្រូសេដ្ឋកិច្ច ការជំរុញកំណើនសេដ្ឋកិច្ចកម្ពុជា តាមគន្លងប្រក្រតី-ភាពជាមួយនឹងការអភិវឌ្ឍប្រកបដោយចីរភាព ទាំងបច្ចុប្បន្ម និងអនាគត។
លោកបានបង្ហាញមោទនភាពចំពោះក្រសួងអប់រំ ដែលបានធ្វើកិច្ចសហការជិតស្អិតជាមួយថ្នាក់ដឹកនាំ បុគ្គលិកអប់រំគ្រប់លំដាប់ថ្នាក់ លោកគ្រូ អ្នកគ្រូ មាតាបិតា សហគមន៍ និងឤជ្ញាធរ-ដែនដី ក្នុងការស្តារ និងអភិវឌ្ឍវិស័យអប់រំឱ្យមានការរីកចម្រើនស្របតាមតួនាទីភារកិច្ចរៀងៗខ្លួនជាមួយនឹងស្មារតីទទួលខុសត្រូវខ្ពស់។
លោកថ្លែងថា៖«ជានិច្ចកាលរាជរដ្ឋាភិបាលតែងតែផ្តល់អាទិភាពទី១ លើការអភិវឌ្ឍធនធានមនុស្ស ដើម្បីលើកស្ទួយ និងអភិវឌ្ឍវិស័យអប់រំកម្ពុជា ដូច្នេះដើម្បីលើកទឹកចិត្ដ នឹងយកចិត្ដទុកដាក់លើកិច្ចការដ៏មានសារៈសំខាន់នេះ ខ្ញុំសូមផ្ដល់អនុសាសន៍បសំខាន់ៗសម្រាប់អនុវត្ដបន្តដូចខាងក្រោម»។
ទី១ បន្តពង្រឹងប្រព័ន្ធអប់រំឲ្យមានភាពធន់បុរេសកម្ម ឆ្លើយតបទៅ នឹងបរិការណ៏ជាតិអន្តរជាតិ ដែលកំពុងមានការប្រែប្រួល។ បន្តធានានូវសេវាអប់រំដែលមានគុណភាពប្រកបដោយសមធម៌ និងបរិយាបន្នព្រមទាំងលើកកម្ពស់ឱកាសការសិក្សាពេញមួយជីវិតសម្រាប់ទាំងអស់គ្នា និងដោះស្រាយការខាតបង់ការរៀនសូត្ររបស់សិស្សនិស្សិត និងយុវជនដែលរងផលប៉ះពាល់ដោយកូវីដ១៩។
ទី២ ណែនាំឱ្យកសាងប្រព័ន្ធ និងអភិវឌ្ឍសមត្ថភាពប្រព័ន្ធអប់រំ តាមរយៈធានាភាពជាអ្នកដឹកនាំ និងការគ្រប់គ្រងរបស់មន្ត្រីអប់រំគ្រប់លំដាប់ថ្នាក់ រួមមានការកែទម្រង់គ្រឹះស្ថានបណ្តុះបណ្តាលគ្រូ ការលើកកម្ពស់ប្រសិទ្ធភាពហិរញ្ញប្បទានសហប្រតិបត្តិការ ការកសាងគោលនយោបាយ និងផែនការអប់រំ ការអភិវឌ្ឍវិជ្ជាជីវៈជាប្រចាំ សម្រាប់បុគ្គលិកអប់រំ និងគ្រូបង្រៀន។
ទី៣ បន្តអភិវឌ្ឍការអប់រំឌីជីថលសម្រាប់ការបណ្តុះបណ្តាល ធនធានមនុស្ស ក្នុងបរិការណ៍បរិវត្តកម្មសង្គម និងសេដ្ឋកិច្ចឌីជីថល តាមរយៈការធ្វើសមាហរណកម្មបច្ចេកវិទ្យាឌីជីថល ទៅក្នុងគ្រប់កម្រិតកម្មវិធីសិក្សា បំពាក់បន្ទប់ពិសោធន៍ឌីជីថលនៅតាមគ្រឹះស្ថានសិក្សា លើកកម្ពស់សមត្ថភាពគ្រូបង្រៀនផ្នែកឌីជីថល ផលិត វីដេអូបង្រៀន និងមាតិកាឌីជីថលលើមុខវិជ្ជាគោលសម្រាប់ថ្នាក់ប្រឡង ព្រមទាំងផ្សព្វផ្សាយការងារទាំងនេះឱ្យកាន់តែទូលំទូលាយ។
ទី៤ បន្តអនុវត្តឱ្យកាន់តែសកម្មលើការងារកាយរឹទ្ធ និង យុវជន ដោយប្រកាន់ខ្ជាប់នូវទង្វើវិជ្ជមានក្នុងសង្គម តាមរយៈការបំផុសចលនា «កូនល្អ សិស្សល្អ មិត្តល្អ ពលរដ្ឋល្អ» កម្មវិធីយុវជនស្ម័គ្រចិត្តចុះជួយមូលដ្ឋាននៅតាមសហគមន៍ជាមួយនឹងការបណ្តុះបណ្តាលជំនាញបច្ចេកទេស និងជំនាញទន់ដល់យុវជន ដើម្បីឆ្លើយតបទាន់ពេលវេលាទៅនឹងឱកាសការងារនៅក្នុងសង្គម ។
ទី៥ បន្តត្រៀមលក្ខណៈឱ្យបានពេញលេញ ដើម្បីធ្វើជាម្ចាស់ផ្ទះប្រកួតកីឡា ស៊ីហ្គេម ឆ្នាំ ២០២៣ ដោយសហការជាមួយគ្រប់ភាគីពាក់ព័ន្ធ ក្នុងការអភិវឌ្ឍសមាគមកីឡាមហាជន សហព័ន្ធ-កីឡា បំប៉ន និងហ្វឹកហាក់កីឡាករជម្រើសជាតិ និងកីឡាករថ្នាលឱ្យបានដិតដល់ ជំរុញសកម្មភាពអប់រំកាយ និងកីឡានៅតាមគ្រឹះស្ថានសិក្សាឱ្យបានផុសផុល។
ទី៦ បន្តលើកកម្ពស់សុខភាពអនាម័យនៅតាមគ្រឹះស្ថានសិក្សា ដោយបន្តអនុវត្តអភិក្រម «៣កុំ និង ៣ការពារ» ហើយចូលរួមទប់ស្កាត់ការឆ្លងចូលគ្រឹះស្ថានសិក្សា រួមទាំងបង្កើនការអប់រំអំពីសុវត្ថិភាពសុខភាពសិក្សា ការរក្សាគម្លាតសុវត្ថិភាព និងសុវត្ថិភាព ចំណីអាហារដល់បុគ្គលិកអប់រំ និងសិស្សានុសិស្ស ។ បន្តយកចិត្តទុកដាក់គាំទ្រសុខភាពផ្លូវចិត្ត និងផ្លូវកាយសិស្សាសិស្ស ដែលទទួលរងផលប៉ះពាល់ដោយផ្ទាល់ ឬប្រយោល ដោយសារជំងឺ កូវីដ១៩។
លោក ហង់ជួន ណារ៉ុន រដ្ឋមន្ដ្រីក្រសួង អប់រំ យុវជន និងកីឡាថ្លែងក្នុងពិធីបទសន្និបាតបូកសរុបការងារអប់រំនេះថា សន្និបាតអប់រំឆ្នាំនេះបានដំណើរការអស់រយៈពេលបីថ្ងៃ ចាប់ពី ថ្ងៃទី២៥ ដល់ថ្ងៃទី២៧ ខែមេសា ឆ្នាំ២០២២ ក្នុងគោលបំណងធ្វើការបូកសរុប និងវាយតម្លៃ ការងារសម្រេចបានក្នុងឆ្នាំសិក្សាកន្លងមក និងលើកទិសដៅការងារសម្រាប់ឆ្នាំសិក្សាខាងមុខ។ អ្នកចូលរួមផ្ទាល់ក្នុងអង្គសន្និបាតមានប្រមាណ ២៥០នាក់ និងចូលរួមតាមប្រព័ន្ធអនឡាញមាន ប្រមាណ ១០០០នាក់ក្នុងក្របខណ្ឌទូទាំងប្រទេស។
លោកថ្លែងថា៖«តាងនាមឱ្យបុគ្គលិកអប់រំគ្រប់លំដាប់ថ្នាក់ ខ្ញុំបាទសូមសម្ដែងនូវកតញ្ញុតាធម៌យ៉ាង ជ្រាលជ្រៅបំផុតចំពោះ សម្តេចអគ្គមហាសេនាបតីតេជោ ដែលបានផ្ដល់អាទិភាពដល់ បុគ្គលិកអប់រំក្នុងការចាក់វ៉ាក់សាំងការពារជំងឺកូរីដ១៩ ហើយប្រទេសកម្ពុជា គឺជាប្រទេសមួយ ក្នុងចំណោមប្រទេសចំនួន ១៧ តែប៉ុណ្ណោះលើពិភពលោក ដែលបានផ្ដល់អាទិភាពដល់គ្រូបង្រៀន»។
លោកបន្តថា៖«យើងខ្ញុំទាំងអស់គ្នាចងចាំជានិច្ចនូវទឹកចិត្ត និងមនោសញ្ចេតនាដ៏ថ្លៃថ្លានេះ និង សូមអរគុណជាអនេកប្បកា និងសូមអបអរសាទរចំពោះ សម្តេចអគ្គមហាសេនាបតី តេជោ ដែលបានដឹកនាំយុទ្ធនាការប្រយុទ្ធប្រឆាំងនឹងជំងឺកូវីដប្រកបដោយជោគជ័យ និងបានជួយសង្គ្រោះអាយុជីវិតរបស់ប្រជាជនកម្ពុជា ព្រមទាំងអនុញ្ញាតឱ្យកម្ពុជាអាចបើក ដំណើរការសាលារៀនឡើងវិញ និងជាប្រទេសឈានមុខគេលើពិភពលោក ក្នុងការបើកដំណើរការសង្គម-សេដ្ឋកិច្ចឡើងវិញ»។
លោកបានលើកឡើងថាសន្និបាតអប់រំនៅឆ្នាំនេះ ជាឱកាសថ្មីមួយ ដើម្បីបង្កើនប្រសិទ្ធភាពនៃការបំពេញការងារ និងគណនេយ្យភាពរបស់អ្នកពាក់ព័ន្ធទាំងអស់ តាមរយៈការឆ្លុះបញ្ចាំង និងការពិភាក្សាអំពី វឌ្ឍនភាព, បញ្ហាប្រឈម និងដំណោះស្រាយនានា ពាក់ព័ន្ធនឹងការរៀននិងបង្រៀន ព្រមទាំង ការងារដឹកនាំនិងគ្រប់គ្រងអប់រំ ទាំងលើទិដ្ឋភាពគោលនយោបាយ, ទិដ្ឋភាពសម្របសម្រួល, និងការអនុវត្តផ្ទាល់ ជាពិសេសការពិភាក្សាផ្ដោតលើកំណែទម្រង់គ្រឹះស្ថានបណ្តុះបណ្តាលគ្រូ, កំណែទម្រង់ការគ្រប់គ្រងតាមសាលារៀន, ការលើកកម្ពស់វិធីសាស្ត្របង្រៀនស្របទៅនឹងបរិបទ រៀន និងបង្រៀនក្នុងសតវត្សរ៍ទី២១និងការអភិវឌ្ឍធនធានគ្រូបង្រៀន៕
