លោក ហ៊ុន សែន និងមន្ត្រីជាន់ខ្ពស់ក្នុងជំនួបតាមប្រព័ន្ធវីដេអូជាមួយលោក មីន អ៊ុងឡាំង ថ្ងៃទី ២ ឧសភា។ រូប FN
កណ្តាលៈ លោកនាយករដ្ឋមន្ត្រី ហ៊ុន សែន នាថ្ងៃទី ២ ខែឧសភា បានជួបពិភាក្សាជាមួយមេដឹកនាំយោធាមីយ៉ាន់ម៉ា លោក មីន អ៊ុងឡាំង (Min Aung Hlaing) ប្រធានក្រុមប្រឹក្សារដ្ឋបាលរដ្ឋ មីយ៉ាន់ម៉ា តាមប្រព័ន្ធវីដេអូពីភូមិគ្រឹះរបស់លោកនៅក្រុងតាខ្មៅ ដោយបានជជែកគ្នាក្នុងការឆ្ពោះទៅរកការពន្លឿនការអនុវត្តកិច្ចព្រមព្រៀងជាឯកច្ឆន្ទ ៥ ចំណុចរបស់អាស៊ាន ឬហៅថា កុងសង់ស៊ីស។
យោងតាមសេចក្តីប្រកាសព័ត៌មាន ក្រសួងការបរទេសកម្ពុជានាថ្ងៃទី ២ ខែឧសភា បានឱ្យដឹងថា លោក ហ៊ុន សែន បានអរគុណលោក Min Aung Hlaing ដែលបានជួយសម្រួលដល់ដំណើរទស្សនកិច្ចលើកទី ១ ទៅកាន់ប្រទេសមីយ៉ាន់ម៉ារបស់ប្រេសិតពិសេសប្រធានអាស៊ានកាលពីខែមីនា ហើយបានគូសបញ្ជាក់នូវបំណងប្រាថ្នាចង់ឃើញការវិវឌ្ឍឱ្យបានកាន់តែលឿនក្នុងការសម្រេចបានភ្លាមៗ នូវអាទិភាពចំនួន ៣ នៃកុងសង់ស៊ីសនេះ។
លោក Min Aung Hlaing បានថ្លែងអំណរគុណចំពោះកិច្ចខិតខំប្រឹងប្រែងរបស់កម្ពុជាក្នុងការជួយមីយ៉ាន់ម៉ាក្នុងការស្វែងរកដំណោះស្រាយដោយសន្តិវិធី ចំពោះវិបត្តិបច្ចុប្បន្ន និងបានប្រាប់លោក ហ៊ុន សែន អំពីស្ថានភាពចុងក្រោយបំផុតរបស់មីយ៉ាន់ម៉ា។
លោក ហ៊ុន សែន បានគូសបញ្ជាក់ពីសារៈសំខាន់ក្នុងការចៀសវាងការប្រើកម្លាំងហួសហេតុក្នុងការអនុវត្តច្បាប់ និងរក្សាសណ្តាប់ធ្នាប់ ហើយលោកក៏បានលើកទឹកចិត្ត ដល់អាជ្ញាធរទីក្រុងណៃពិដោ (Naypyitaw) សម្របសម្រួលបន្ថែមទៀតនូវការផ្តល់ជំនួយមនុស្សធម៌ឱ្យមានប្រសិទ្ធភាព និងទាន់ពេលវេលា ជាពិសេសនៅក្នុងតំបន់ជម្លោះដែលមិនត្រឹមតែជួយសម្រាលទុក្ខលំបាករបស់ប្រជាជនប៉ុណ្ណោះទេ ប៉ុន្តែថែមទាំងគាំទ្រដល់កិច្ចខិតខំប្រឹងប្រែងដើម្បីកាត់បន្ថយអំពើហិង្សា និងការកសាងទំនុកចិត្ត ដើម្បីឈានទៅរកការសន្ទនាប្រកបដោយសន្តិវិធី និងបរិយាប័ន្ន។
លោក Min Aung Hlaing បានបញ្ជាក់ពីការត្រៀមខ្លួនរបស់ក្រុមប្រឹក្សារដ្ឋបាលរដ្ឋ (SAC) ក្នុងការសម្របសម្រួល ការចែកចាយជំនួយមនុស្សធម៌ ដែលដំបូងឡើយនៅក្នុងតំបន់សាកល្បងចំនួន ២ និងតំបន់ និងរដ្ឋចំនួន ៥ ផ្សេងទៀត ដែលត្រូវបានកំណត់ថា ជាតំបន់អាទិភាព។
សេចក្តីប្រកាសព័ត៌មានបានបញ្ជាក់ថា៖ «សម្តេចតេជោ ហ៊ុន សែន បានស្វាគមន៍ចំពោះកិច្ចសហប្រតិបត្តិការរបស់ SAC លើការផ្តល់ជំនួយមនុស្សធម៌ និងយុទ្ធនាការចាក់វ៉ាក់សាំងបង្ការនៅតំបន់សាកល្បង ដែលអាចពង្រីកជាជំហានៗទៅកាន់តំបន់ផ្សេង»។
សេចក្តីប្រកាសព័ត៌មានគូសបញ្ជាក់ថា៖ «សម្តេចតេជោ ហ៊ុន សែន ក៏បានស្វាគមន៍ចំពោះការដោះលែងអ្នកទោសជាង ១ ៦០០ នាក់ក្នុងឱកាសពិធីបុណ្យចូលឆ្នាំថ្មីប្រពៃណីរបស់ប្រទេសមីយ៉ាន់ម៉ាកាលពីខែមេសា និងបានរំឭកឡើងវិញនូវសំណើពីមុនរបស់សម្តេចសម្រាប់ការដោះលែងអ្នកជាប់ឃុំនយោបាយទាំងអស់រួមទាំងសាស្ត្រាចារ្យ Sean Turnell នៃប្រទេសអូស្ត្រាលីផងដែរ»។
លោកនាយករដ្ឋមន្ត្រីក៏បានស្វះស្វែងរកកិច្ចសហប្រតិបត្តិការបន្ថែមទៀតរបស់ SAC ក្នុងការសម្របសម្រួលដំណើរទស្សនកិច្ចលើកទី ២ ទៅកាន់ប្រទេសមីយ៉ាន់ម៉ារបស់ប្រេសិតពិសេសរបស់ប្រធានអាស៊ានដែលអាចធ្វើទៅបាននៅចុងខែឧសភា។
លោក ហ៊ុន សែន បានបញ្ជាក់សាជាថ្មីអំពីសារៈសំខាន់នៃកិច្ចប្រជុំរវាងប្រេសិតពិសេសប្រធានអាស៊ានជាមួយគ្រប់ភាគីពាក់ព័ន្ធក្នុងប្រទេសមីយ៉ាន់ម៉ារួមទាំងលោកស្រី Aung SaanSu Kyi និងអតីតប្រធានាធិបតី Win Myint ដើម្បីបង្កើតបរិយាកាសអំណោយផលក្នុងការចាប់ផ្តើមការសន្ទនានយោបាយប្រកបដោយបរិយាប័ន្ន។
សេចក្តីប្រកាសព័ត៌មានបញ្ជាក់ថា លោក Min Aung Hlaing បានសន្យាជួយសម្រួលដល់កិច្ចប្រជុំនេះជាមួយភាគីពាក់ព័ន្ធផ្សេងទៀត។ លោក ហ៊ុន សែន បានបញ្ជាក់ពីការប្តេជ្ញាចិត្តរបស់កម្ពុជាក្នុងការជួយមីយ៉ាន់ម៉ាឱ្យវិលទៅរកលទ្ធិប្រជាធិបតេយ្យ ស្របតាមគោលការណ៍កុងសង់ស៊ីស ៥ ចំណុច ការឯកភាព និងមជ្ឈភាពរបស់អាស៊ាន។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា ប្រាប់ភ្នំពេញប៉ុស្តិ៍នាថ្ងៃទី ២ ខែឧសភា ថា ជំនួបនេះបានបង្ហាញពីការប្តេជ្ញាចិត្ត និងចេតនារបស់កម្ពុជាក្នុងការរួមចំណែកដោះស្រាយបញ្ហាផ្ទៃក្នុងរបស់មីយ៉ាន់ម៉ា។ កម្ពុជាជាប្រធានអាស៊ាន តាមរយៈលោក ហ៊ុន សែន ចង់មើលឃើញសមាជិកអាស៊ានទាំងអស់ ស្ថិតនៅក្នុងគ្រួសារអាស៊ាន ដោយមិនចង់ឱ្យមានការ «បែកខ្ញែក» ដូចកន្លងមកនោះទេ។
លោកថ្លែងថា៖ «កិច្ចខិតខំប្រឹងប្រែងរបស់កម្ពុជាហ្នឹង គឺវាចំណុះឱ្យការរួមចំណែក ការចូលរួមដោយសកម្មដោយស្មោះត្រង់ពីសំណាក់មេដឹកនាំយោធាភូមាដែរ ជាពិសេសគឺពាក់ព័ន្ធជាមួយនឹងការអនុវត្តកិច្ចព្រមព្រៀងកុងសង់ស៊ីស ៥ ចំណុចហ្នឹង ដែលចាំច់ត្រូវតែធ្វើ ហើយកម្ពុជាមានបំណងក្នុងការដោះស្រាយបញ្ហាមីយ៉ាន់ម៉ាហ្នឹង ដើម្បីឱ្យអាស៊ានវិលត្រឡប់ទៅរកប្រក្រតីភាពវិញ»។
ខណៈកិច្ចប្រជុំកំពូលពិសេស អាស៊ាន-សហរដ្ឋអាមេរិកនឹងប្រព្រឹត្តទៅនាថ្ងៃទី ១២-១៣ ខែឧសភា ខាងមុខនេះ លោក គិន ភា បានថ្លែងថា ការជួបគ្នារវាងមេដឹកនាំទាំង ២ នេះក៏អាចជាការបញ្ជាក់ពីជំហរច្បាស់លាស់របស់កម្ពុជា ក្នុងនាមជាប្រធានអាស៊ាន ហើយក៏ធ្វើឱ្យមេដឹកនាំយោធាមីយ៉ាន់ម៉ាយល់អំពីអ្វីដែលជាសុច្ឆន្ទៈ និងអ្វីដែលជាការប្តេជ្ញាចិត្តរបស់កម្ពុជាជុំវិញបញ្ហាវិបត្តិនៅប្រទេសមីយ៉ាន់ម៉ា៕
វីដេអូ៖
