លោក កឹម សុខា អមដោយមន្ត្រីរបស់លោកពេលដើរចេញពីតុលាការរាជធានីភ្នំពេញ ពីថ្ងៃទី ២៥ មករា។ ហុង មិនា
ភ្នំពេញៈ ប្រធានក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញ លោក កូយ សៅ បានសម្រេចលើកពេលសវនាការលើសំណុំរឿងរបស់លោក កឹម សុខា អតីតប្រធាននៃអតីតគណបក្សសង្គ្រោះជាតិ ដែលត្រូវធ្វើនៅថ្ងៃទី ៤ ឧសភា ទៅថ្ងៃទី ១១ ខែឧសភា វិញ តាមការស្នើសុំរបស់លោក ចេង ប៉េងហាប់ មេធាវីតំណាងដោយអាណត្តិឱ្យដើមបណ្តឹងរដ្ឋប្បវេណី ដោយសារលោកមានធុរៈជាចាំបាច់។ នេះបើតាមចំណារលើលិខិតស្នើសុំចុះថ្ងៃទី ៣ ឧសភា ឆ្នាំ ២០២២។
តាមលិខិតស្នើសុំលើកពេលសវនាការរបស់លោក ចេង ប៉េងហាប់ បានសរសេរថា៖ «នៅព្រឹកថ្ងៃទី ៤ ខែឧសភា ឆ្នាំ ២០២២ វេលាម៉ោង ៨:៣០ នាទីព្រឹក សាលាដំបូងរាជធានីភ្នំពេញនឹងបើកសវនាការលើសំណុំរឿងព្រហ្មទណ្ឌ លេខ ៥៦៤២-I ចុះថ្ងៃ ទី ៣ ខែកញ្ញា ឆ្នាំ ២០១៧ ប៉ុន្តែ យើងខ្ញុំជាមេធាវីតំណាងដោយអាណត្តិឱ្យដើមបណ្តឹងរដ្ឋប្បវេណីក្នុងសំណុំរឿងខាងលើពុំអាចមកចូលរួមបានទេ ដោយសារមានធុរៈជាចាំបាច់មិនអាចខកខានបាន»។
លិខិតនេះបន្តថា៖ «ហេតុដូច្នេះ ដើម្បីកុំឱ្យមានការខូចខាតដល់ផលប្រយោជន៍របស់កូនក្តីយើងខ្ញុំ យើងខ្ញុំស្នើសុំលោកចៅក្រមលើកពេលសវនាការក្នុងសំណុំរឿងខាងលើនេះទៅថ្ងៃក្រោយវិញ»។
លោក ចាន់ ចេន សហមេធាវី លោក កឹម សុខា ថ្លែងថា ក្នុងនាមសហមេធាវី ក៏ដូចជាលោក កឹម សុខា ពិតជាមានការសោកស្តាយយ៉ាងខ្លាំងចំពោះការសម្រេចលើកពេលសវនាការរបស់សាលាដំបូងរាជធានីភ្នំពេញម្តងហើយម្តងទៀត។ មួយវិញទៀត សវនាការចាប់ផ្តើមនៅព្រឹកថ្ងៃទី ៤ ឧសភា ប៉ុន្តែទាំងលោក កឹម សុខា និងសហមេធាវីទទួលបានដំណឹងនៅព្រលប់ថ្ងៃទី ៣ ឧសភា ដែលខុសទៅនឹងច្បាប់រដ្ឋបាល។
លោកថ្លែងថា៖ «ចំណាររបស់ប្រធានចៅក្រមទៅលើពាក្យស្នើសុំរបស់សហមេធាវីដើមបណ្តឹងរដ្ឋប្បវេណី យើងឃើញចំណារឯកភាពនេះ យើងគួរឱ្យសោកស្តាយ និងមានការហួសចិត្តផងដែរ ពីព្រោះមែនទែន វាជាកិច្ចការរដ្ឋបាលយ៉ាងហោចណាស់ ៣ ថ្ងៃ មុនដែរ។ យើង និងភាគីពាក់ព័ន្ធក៏មានការរវល់ដែរ និងត្រៀមចូលសវនាការ ប៉ុន្តែវាផ្ទុយបែបហ្នឹង យើងមានការខកចិត្ត»។
បើតាមលោក ចាន់ ចេន ការដែលអូសបន្លាយពេលវេលាសវនាការកូនក្តីរបស់លោក គឺលោក កឹម សុខា ជិត ៥ ឆ្នាំមកនេះ និងលើកពេលម្តងហើយម្តងទៀតបែបនេះ វាធ្វើឱ្យប៉ះពាល់ទៅដល់សិទ្ធិរបស់កូនក្តីលោកដែលមានចែងនៅក្នុងច្បាប់ជាតិ និងអន្តរជាតិ ដែលជនជាប់ចោទទទួលបាននូវការជំនុំជម្រះយ៉ាងឆាប់រហ័ស និងយុត្តិធម៌។
ពាក់ព័ន្ធនឹងករណីនេះ លោក ប្លង់ សុផល អ្នកនាំពាក្យអយ្យការអមសាលាដំបូងរាជធានី-ភ្នំពេញ នៅថ្ងៃទី ៤ ខែឧសភា បានសុំមិនធ្វើអត្ថាធិប្បាយទេ ដោយលោកបានរុញឱ្យទៅសួរអ្នកនាំពាក្យសាលាដំបូងរាជធានីភ្នំពេញវិញ។
អ្នកនាំពាក្យសាលាដំបូងរាជធានីភ្នំពេញ លោក អ៊ី រិន ប្រាប់ភ្នំពេញប៉ុស្តិ៍ថា តុលាការបានសម្រេចទៅតាមការស្នើសុំរបស់មេធាវីតំណាងដោយអាណត្តិឱ្យដើមបណ្តឹងរដ្ឋប្បវេណី ដែលមានកិច្ចការងារចាំបាច់មិនមានភាពលម្អៀងដូចការចោទនោះទេ។ ប៉ុន្តែ បើការសម្រេចនេះ វាមានភាពយឺតពេក សវនាការនឹងចាប់ផ្តើមបាត់ទៅហើយ។ ដូច្នេះតុលាការត្រូវតែសម្រេចឱ្យបានមុនសវនាការចាប់ផ្តើម៕
វីដេអូ៖
