លោក ប្រាក់ សុខុន ក្នុងកិច្ចប្រជុំពីថ្ងៃទី ៦ ឧសភា។ រូបថត ក្រសួងការបរទេស
ភ្នំពេញៈ លោក ប្រាក់ សុខុន រដ្ឋមន្ត្រីក្រសួងការបរទេសកម្ពុជាថ្លែងថា ក្រុមការងារមីយ៉ាន់ម៉ា សម្រាប់ការសម្របសម្រួលជំនួយមនុស្សធម៌នឹងធ្វើការជាមួយគណៈកម្មាធិការសាមគ្គីជាតិ និងកសាងសន្តិភាពរបស់មីយ៉ាន់ម៉ា ដើម្បីធានាថា ជំនួយមនុស្សធម៌នឹងចែកចាយទៅដល់តំបន់នានា ដែលស្ថិតក្រោមការគ្រប់គ្រងរបស់អង្គការប្រដាប់អាវុធជនជាតិភាគតិចប្រកបដោយសុវត្ថិភាព និងប្រសិទ្ធភាព។
លោកថ្លែងដូច្នេះ ក្នុងសន្និសីទកាសែត បន្ទាប់ពីបិទបញ្ចប់កិច្ចប្រជុំពិគ្រោះយោបល់ស្តីពីជំនួយមនុស្សធម៌របស់អាស៊ាន សម្រាប់មីយ៉ាន់ម៉ាដែលលោក និងលោក លឹម ចុកហ៊ុយ (Lim Jock Hoi) អគ្គលេខាធិការអាស៊ានធ្វើជាសហប្រធាន នៅថ្ងៃទី ៦ ខែឧសភា នៅរាជធានីភ្នំពេញ និងតាមប្រព័ន្ធវីដេអូ។
លោក ប្រាក់ សុខុន ដែលជាប្រេសិតពិសេសរបស់ប្រធានអាស៊ានថ្លែងបន្តថា៖ «មជ្ឈមណ្ឌលសម្របសម្រួលអាស៊ាន សម្រាប់ជំនួយមនុស្សធម៌ស្តីពីការគ្រប់គ្រងគ្រោះមហន្តរាយ (AHA Centre) ដោយមានការពិគ្រោះយោបល់យ៉ាងជិតស្និទ្ធ ជាមួយក្រុមការងារមីយ៉ាន់ម៉ាសម្រាប់ការសម្របសម្រួលជំនួយមនុស្សធម៌នឹងកំណត់ទីតាំង ដើម្បីដឹកជញ្ជូនការផ្តល់ជំនួយមនុស្សធម៌អាស៊ាននេះ»។ លោកថ្លែងថា ក្រុមការងារមីយ៉ាន់ម៉ា សម្រាប់ការសម្របសម្រួលជំនួយមនុស្សធម៌នឹងពិចារណាទៅលើទីតាំងចំនួន ២ ឬ ៣ ក្នុងចំណោមតំបន់ទាំង ៥ ដែលបានឯកភាពគ្នា ក្នុងនោះតំបន់ដែលមានជនភៀសខ្លួនក្នុងស្រុក និងសហគមន៍រងគ្រោះ។ លោក ប្រាក់ សុខុន ថ្លែងថា៖ «ដោយមានការឯកភាពពីក្រុមការងារមីយ៉ាន់ម៉ាសម្រាប់ការសម្របសម្រួលជំនួយមនុស្សធម៌ មជ្ឈមណ្ឌល AHA ក្នុងនាមជាអ្នកសម្របសម្រួលចម្បងនឹងសម្របសម្រួលរាល់សំណើនានាពីសំណាក់ប្រទេសសមាជិកអាស៊ាន ដៃគូខាងក្រៅ និងអង្គការអន្តរជាតិលើការសុំចូលតំបន់ណាមួយដោយប្រើប្រាស់យន្តការនេះ»។
នៅក្នុងកិច្ចប្រជុំនេះក្រុមការងារមីយ៉ាន់ម៉ាបានសន្យាថា នឹងខិតខំឱ្យអស់ពីសមត្ថភាពដើម្បីធានាថា ជំនួយមនុស្សធម៌ និងវ៉ាក់សាំងដែលផ្ដល់ពីអាស៊ាន និងដៃគូផ្សេងទៀត នឹងបានទៅដល់សហគមន៍នៅមីយ៉ាន់ម៉ា រួមទាំងតំបន់របស់អង្គការប្រដាប់អាវុធជនជាតិភាគតិច ដែលតំបន់ទាំងនេះ ក៏មានជំរំជនបាត់បង់លំនៅក្នុងស្រុក និងសហគមន៍រងផលប៉ះពាល់ផងដែរ ហើយការធ្វើដូចនេះនឹងប្រាកដថា គ្មាននរណាម្នាក់ និងគ្មានទីតាំងណាមួយត្រូវបានគេទុកចោលនោះឡើយ។
លោក ប្រាក់ សុខុន បានសរសេរនៅលើហ្វេសប៊ុកនាថ្ងៃទី ៦ ខែឧសភា ថា កិច្ចប្រជុំពិគ្រោះយោបល់នេះបានប្រព្រឹត្តទៅប្រកបដោយផ្លែផ្កាដើម្បីឆ្ពោះទៅរកគោលដៅរំពឹងទុក ខណៈដែលកិច្ចប្រជុំនេះបានបន្ថែមសម្ទុះថ្មីដល់ការអនុវត្តការព្រមព្រៀងជាឯកច្ឆន្ទ ៥ ចំណុចរបស់អាស៊ាន។ លោកសរសេរថា៖ «ថ្ងៃនេះយើងបានបោះជំហានទៅមុខមួយទៀតក្នុងកិច្ចខិតខំប្រឹងប្រែងរួមរបស់យើង ដើម្បីធានាថា ប្រជាជនមីយ៉ាន់ម៉ាទាំងអស់នឹងទទួលបានជំនួយមនុស្សធម៌ដោយគ្មានការរើសអើង»។ លោកបន្តថា៖ «ខ្ញុំបន្តមានសុទិដ្ឋិនិយមថា កិច្ចខិតខំប្រឹងប្រែងតស៊ូដ៏ស្មោះត្រង់របស់យើងនឹងផ្តល់ផលប្រយោជន៍ជាច្រើនជូនដល់ប្រជាជនមីយ៉ាន់ម៉ាគ្រប់រូប។ ខ្ញុំទន្ទឹងរង់ចាំដំណើរទស្សនកិច្ចលើកទី ២ របស់ខ្ញុំទៅកាន់ប្រទេសមីយ៉ាន់ម៉ានៅប៉ុន្មានសប្តាហ៍ខាងមុខនេះ»។
លោក ថុង ម៉េងដាវិត អ្នកសិក្សាស្រាវជ្រាវនៅមជ្ឈមណ្ឌលមេគង្គសម្រាប់ការសិក្សាយុទ្ធសាស្ត្រនៃវិទ្យាស្ថានចក្ខុវិស័យអាស៊ីប្រាប់ភ្នំពេញប៉ុស្តិ៍នៅថ្ងៃទី ៨ ខែឧសភាថា កម្ពុជាក្នុងនាមជាប្រធានអាស៊ានបានខិតខំយ៉ាងខ្លាំងក្នុងការធ្វើយ៉ាងណាបន្តកៀរគរសហគមន៍អន្តរជាតិ និងសមាជិកអាស៊ានដទៃទៀត ក្នុងការជួយមីយ៉ាន់ម៉ាឱ្យឆ្លងផុតពីវិបត្តិនយោបាយរបស់ខ្លួនដែលបង្កឱ្យមានវិបត្តិផ្ទៃក្នុង និងតំបន់ជាច្រើន ជាពិសេសអាយុជីវិតប្រជាជនមីយ៉ាន់ម៉ា។
លោកថ្លែងថា ការដោះស្រាយបញ្ហានៅមីយ៉ាន់ម៉ាទាមទារឱ្យមានការអត់ធ្មត់ខ្ពស់ជាពិសេសការកសាងទំនុកចិត្តជាមួយនឹង «ប្រមុខដឹកនាំមីយ៉ាន់ម៉ា» ធ្វើយ៉ាងណាឱ្យមានបទឈប់បាញ់ និងការជឿទុកចិត្តក្នុងការផ្តល់ជំនួយមនុស្សធម៌នេះ។
លោក ម៉េង ដាវិត ថ្លែង៖ «នេះគឺជាជោគជ័យថ្មីមួយទៀតរបស់កម្ពុជាក្នុងនាមជាប្រធានអាស៊ាននៅក្នុងការដោះស្រាយវិបត្តិមីយ៉ាន់ម៉ាជាជំហានៗក្នុងការផ្តល់ជំនួយដល់មីយ៉ាន់ម៉ាស្របពេលដែលកម្ពុជានៅតែបន្តពិភាក្សាជាមួយប្រមុខដឹកនាំមីយ៉ាន់ម៉ា និងសមាជិកអាស៊ានដទៃទៀតក្នុងការស្វែងរកដំណោះស្រាយ និងមតិស្ថាបនា ក្នុងការធ្វើយ៉ាងណាឱ្យទទួលបានសន្តិភាពនៅមីយ៉ាន់ម៉ាក្រោមយន្តការឈ្នះ-ឈ្នះ»៕
វីដេអូ៖
