រដ្ឋបាលខេត្តឧត្តរមានជ័យ បង្ហាញបណ្ណព្រំដែនកម្ពុជា-ថៃ។ រូបថត រដ្ឋបាលខេត្តឧត្តរមានជ័យ
ឧត្តមានជ័យៈ រដ្ឋបាលខេត្តឧត្តរមានជ័យ បានបញ្ជាក់ថា ការធ្វើបណ្ណព្រំដែនកម្ពុជា-ថៃ អាចផ្តល់ជូនសម្រាប់តែប្រជាពលរដ្ឋដែលរស់នៅក្នុងខេត្តនេះប៉ុណ្ណោះ និងស្នើឱ្យពលរដ្ឋដែលរស់នៅខេត្តផ្សេងមិនជាប់ព្រំដែន ឈប់ចាញ់បោកជនខិលខូចដែលឆ្លៀតឱកាសរត់ការធ្វើបណ្ណនេះ។
សេចក្តីជូនដំណឹងរបស់រដ្ឋបាលខេត្តឧត្តរមានជ័យ ចុះថ្ងៃទី១១ ខែឧសភា នេះបានឱ្យដឹងថា បណ្ណព្រំដែនកម្ពុជា-ថៃ អាចផ្តល់ជូនបានតែប្រជាពលរដ្ឋខ្មែរគ្រប់រូបដែលមានលំនៅឋានអចិន្ត្រៃយ៍ នៅក្នុងខេត្តដែលសាមីខ្លួនស្នើសុំបណ្ណព្រំដែនប៉ុណ្ណោះ ក្នុងតម្លៃ ២ម៉ឺនរៀល ដោយសាមីខ្លួនត្រូវបង្ហាញមុខដោយផ្ទាល់ជាមួយមន្ត្រីមានសមត្ថកិច្ចនៅទីតាំងផ្តល់សេវា រៀងរាល់ ម៉ោងធ្វើការ និងភ្ជាប់ជាមួយនូវឯកសារពាក់ព័ន្ធ។
ឯកសារពាក់ព័ន្ធទាំងនោះរួមមាន ពាក្យស្នើសុំបណ្ណព្រំដែនចំនួន ១ច្បាប់ដោយមានបិទរូបថត ចុះហត្ថលេខា ឬផ្តិត មេដៃស្តាំរបស់សាមីខ្លួននៅលើពាក្យស្នើសុំ ហើយ ពាក្យស្នើសុំមានផ្តល់ជូននៅទីតាំងផ្តល់សេវាដោយ ឥតគិតថ្លៃ។ ភ្ជាប់រូបថតសាមីខ្លួនបច្ចុប្បន្ន ទំហំ ៤x៦ ថតចំពីមុខគ្មានពាក់មួក ឬវ៉ែនតា ចំនួន ២ សន្លឹក ហើយត្រូវភ្ជាប់មកនូវអត្តសញ្ញាណបណ្ណសញ្ជាតិខ្មែរ ឬសំបុត្រកំណើត ឬសំបុត្របញ្ជាក់កំណើតដែលជាច្បាប់ដើម ឬថតចម្លងត្រឹមត្រូវតាមច្បាប់ដើម និងសៀវភៅគ្រួសារ ឬសៀវភៅស្នាក់នៅជាដើម។
រដ្ឋបាលខេត្ត បញ្ជាក់ជូនថា កន្លងមកនៅមានបងប្អូនប្រជាពលរដ្ឋមួយចំនួនមានការភ័ន្តច្រឡំ ហើយក៏មានជនឆ្លៀតឱកាសមួយចំនួនដើម្បីផលប្រយោជន៍បុគ្គលផ្ទាល់ ខ្លួនបានបំផុសចលនាឱ្យ បងប្អូនប្រជាពលរដ្ឋដែលមានទីលំនៅ ឬអាសយដ្ឋានស្នាក់នៅក្រៅខេត្តឧត្តរមានជ័យ ថាអាចធ្វើបណ្ណព្រំដែនកម្ពុជា-ថៃ នៅអង្គភាពច្រកចេញចូលតែមួយខេត្ត ឬនៅ ទីស្នាក់ការត្រួតពិនិត្យច្រកទ្វារព្រំដែនអន្តរជាតិអូរស្មាច់បាន តាមរយៈការធានាជួយរត់ការ ឬជូនមក ដល់ទីតាំងផ្តល់សេវាផ្ទាល់។
ពាក់ព័ន្ធបញ្ហានេះ រដ្ឋបាលខេត្តបានគូសបញ្ជាក់យ៉ាងដូច្នេះថា៖ «ករណីនេះ សូមបងប្អូនកុំចាញ់បោកការឃោសនា បោកបញ្ឆោតអំពីការឱ្យអញ្ជើញមកទទួល សេវា ឬការធានារៀបចំរត់ការធ្វើបណ្ណព្រំដែនកម្ពុជា-ថៃជូន ជៀសវាងខាតបង់ពេលវេលា និងថវិកា ដោយអសារបង់»។
ទន្ទឹមនេះដែរ អ្នកនាំពាក្យសាលាខេត្តបន្ទាយមានជ័យលោក សេក សុខុម ប្រាប់ ភ្នំពេញ ប៉ុស្តិ៍ថា អាជ្ញាធរខេត្តរបស់លោកក៏មានគោលការណ៍ដូចគ្នាទៅនឹងខេត្តឧត្តមមានជ័យដែរ គឺធ្វើបណ្ណព្រំដែនជូនតែពលរដ្ឋដែលរស់នៅក្នុងខេត្ត និងអាជីវករដែលក់ដូរនៅផ្សារជាប់ព្រំដែនប៉ុណ្ណោះ។
លោកថា៖«តាមពិត MOU រវាងកម្ពុជានិងថៃអនុញ្ញាតឱ្យធ្វើបណ្ណព្រំដែន សម្រាប់ពលរដ្ឋរស់នៅក្នុងខេត្តជាប់ព្រំដែនមិនអនុញ្ញាតធ្វើឱ្យពលរដ្ឋដែលរស់នៅខេត្តផ្សេងទេ ប៉ុន្តែបើគាត់ជាអាជីវករលក់ដូរនៅព្រំដែន ហើយផ្ទះគាត់នៅកំពង់ចាម នៅភ្នំពេញ ហើយគាត់មានសៀវភៅស្នាក់បញ្ជាក់ដោយអាជ្ញាធរមូលដ្ឋានខេត្តយើង គឺគាត់អាចធ្វើបណ្ណព្រំដែនបាន»។
ស្ថានទូតព្រះរាជាណាចក្រកម្ពុជាប្រចាំព្រះរាជាណាចក្រថៃឡងដ៍ បានឱ្យដឹងដែរថា ច្រកព្រំដែនកម្ពុជា-ថៃ ចាប់ផ្ដើមបើកដំណើរការឡើងវិញចាប់ពីថ្ងៃទី ១ ខែ ឧសភា ២០២២ ប៉ុន្តែវិធានការសុខាភិបាលត្រូវបានអនុវត្តយ៉ាងតឹងរ៉ឹង។
ស្ថានទូត បន្តថា ចំពោះអ្នកដំណើរចូលប្រទេសថៃ ត្រូវបែងចែកជា ៣ ប្រភេទ គឺ ១ អ្នកដំណើរដែលបានចាក់វ៉ាក់សាំងពេញលេញ ២ អ្នកដំណើរដែលមិនចាក់វ៉ាក់សាំង ឬចាក់វ៉ាក់សាំងមិនពេញលេញ និង ៣ អ្នកដំណើរដែលជាប្រជាជនក្នុងខេត្តជាប់ព្រំដែនដែលកាន់បណ្ណព្រំដែន។
សម្រាប់ពលរដ្ឋដែលកាន់បណ្ណព្រំដែន គឺមិនតម្រូវឱ្យចុះឈ្មោះ Thailand Pass ទេ មិនតម្រូវឱ្យមានការធានារ៉ាបរង ប៉ុន្តែត្រូវតែជាអ្នកបានចាក់វ៉ាក់សាំងពេញ។ រីឯការធ្វើដំណើរត្រូវបានអនុញ្ញាតតែក្នុងតំបន់ដែលមានចែងក្នុងកិច្ចព្រមព្រៀងរវាងប្រទេសទាំង ២ ប៉ុណ្ណោះ និងអាចស្នាក់នៅប្រទេសថៃមិនត្រូវលើសពី ៣ ថ្ងៃ ឡើយ។
សម្រាប់អ្នកមិនមានបណ្ណព្រំដែនកម្ពុជា-ថៃ វិញ ពោលមានលិខិតឆ្លងដែន (Passport) និងជាអ្នកចាក់វ៉ាក់សាំងពេញលេញ តម្រូវឱ្យចុះឈ្មោះ Thailand Pass មុនពេលធ្វើដំណើរនៅ (tp.consular.go.th) ចំណាយពេលមិនលើស ៤៨ ម៉ោង មុនធ្វើដំណើរទៅថៃ។ ត្រូវមានបណ្ណធានារ៉ាប់រងក្នុងរង្វង់ទឹកប្រាក់ ១ ម៉ឺនដុល្លារ (ទិញក្នុងតម្លៃប្រហែល៣០ដុល្លារ) មិនត្រូវឱ្យធ្វើតេស្ត RT-PCR ប៉ុន្តែនាំឱ្យធ្វើតេស្តរហ័ស (ATK) ដោយខ្លួនឯងអំ ឡុងពេលស្នាក់នៅប្រទេសថៃ។ខេត្តថៃជាប់ច្រកព្រំដែនអន្តរជាតិកម្ពុជា-ថៃ ដែលធ្វើដំណើរចូលបានរួមមាន ខេត្តសះកែវ ខេត្តសុរិន ខេត្តត្រាត និងខេត្តចាន់ថៈប៊ុរី៕
វីដេអូ៖
