ទិដ្ឋភាពខ្ទមរបស់ពលរដ្ឋនៅក្នុងតំបន់ដែនជម្រកសត្វព្រៃភ្នំសំកុសកាលពីថ្ងៃទី១៥ ឧសភា ។ រូបថត FN
ពោធិ៍សាត់ៈរដ្ឋបាលខេត្តពោធិ៍សាត់បានព្រមានចាត់វិធានការរដ្ឋបាលដោយគ្មានការលើកលែង ចំពោះជនទាំងឡាយណាដែលបានចូលកាប់ទន្ទ្រាននិងកាន់កាប់ដីដោយខុសច្បាប់ក្នុងតំបន់ដែនជម្រកសត្វព្រៃភ្នំសំកុស។ ការព្រមាននេះបានធ្វើឡើងបន្ទាប់ពីសមត្ថកិច្ចចម្រុះនៃរដ្ឋបាលខេត្តពោធិ៍សាត់ បានចុះពិនិត្យឃើញមានប្រជាពលរដ្ឋប្រមាណ១០០គ្រួសារ បានលួចចូលសង់រោងនិងខ្ទមព្រមទាំងកាប់រុករានដីព្រៃក្នុងតំបន់ការពារធម្មជាតិមួយនេះដោយខុសច្បាប់។
នេះបើយោងតាមសេចក្ដីជូនដំណឹងស្តីពីការចាត់វិធានការបោសសម្អាតរោង ខ្ទមខុសច្បាប់ នៅក្នុងដែនជម្រកសត្វព្រៃភ្នំសំកុសនៃតំបន់ការពារធម្មជាតិ ក្នុងភូមិសាស្ត្រខេត្តពោធិ៍សាត់ចុះកាលបរិច្ចេទថ្ងៃទី១៣ខែឧសភាឆ្នាំ២០២២ដែលភ្នំពេញប៉ុស្តិ៍ទើបតែទទួលបានកាលពីថ្ងៃទី១៦ឧសភា ។
សេចក្ដីជូនដំណឹងដែលចុះហត្ថលេខាដោយ លោក ចេងឡៃ អភិបាលស្ដីទីខេត្តពោធិ៍សាត់នេះ បានចាត់ទុកសកម្មភាពនៃការកាប់គាស់រុករានទន្ទ្រានដីព្រៃ ដាំដំណាំ និងសង់រោង ខ្ទមប្រក់តង់កៅស៊ូស្នាក់នៅរបស់ប្រជាពលរដ្ឋទាំងនោះនៅចំណុចស្ទឹងខៀវចំណុចជើងភ្នំខ្មោចក្នុងភូមិសាស្ត្រ ភូមិចម្ការជ្រៃខាងត្បូងឃុំអន្លង់រាប ស្រុកវាលវែង ខេត្តពោធិ៍សាត់ ថា ជាអំពើ«ខុសច្បាប់»។
លោកបានបន្តថា ដើម្បីធានានូវការគ្រប់គ្រងធនធានធម្មជាតិ ការពារ ថែរក្សា អភិរក្សព្រៃឈើសត្វព្រៃឱ្យបានគង់វង្ស រដ្ឋបាលខេត្តពោធិ៍សាត់បានសម្រេចផ្ដល់ឱកាសឲ្យប្រជាពលរដ្ឋទាំងនោះរុះរើរោង ខ្ទម របស់ពួកគេដោយខ្លួនឯងនិងចាកចេញឲ្យអស់ពីក្នុងតំបន់ដែនជម្រកសត្វព្រៃភ្នំសំកុស ក្នុងរយៈពេល៧ថ្ងៃគិតចាប់ពីថ្ងៃជូនដំណឹង និងបញ្ឈប់រាល់សកម្មភាព កាប់គាស់ រុករានទន្ទ្រានដីព្រៃនៃតំបន់ការពារធម្មជាតិមួយនេះជាបន្ទាន់។
ទន្ទឹមនឹងនេះលោកបានព្រមានចាត់វិធានការតាមច្បាប់រដ្ឋបាល ដោយគ្មានការលើកលែង និងមិនទទួលខុសត្រូវចំពោះការខូចខាតទ្រព្យសម្បត្តិអ្វីឡើយ ក្នុងករណីមិនអនុវត្តតាមការណែនាំនៃសេចក្ដីជូនដំណឹងនេះ។
លោកបានបញ្ជាក់ថា៖«ផុតកំណត់រយៈពេលនៃការជូនដំណឹងនេះរដ្ឋបាលខេត្តនឹងចាត់វិធានការរដ្ឋបាល ចុះរុះរើរោង ខ្ទម ដោយមិនទទួលខុសត្រូវរាល់ការខូចខាតទ្រព្យសម្បត្តិនោះទេ។ក្នុងករណីបងប្អូនប្រជាពលរដ្ឋណារឹងរូស ឬប្រឆាំងតបតត្រូវផ្តន្ទាទោសតាមច្បាប់ជាធរមាន»។
ទោះយ៉ាងណាក៏ដោយ លោកបានអំពាវនាវដោយទទូចឲ្យពលរដ្ឋទាំងនោះ រុះរើរោង ខ្ទម របស់ពួកគេនិងចាកចេញពីទីតាំងនោះដោយសន្តិវិធី។ ក្នុងករណីប្រជាពលរដ្ឋណាមួយមិនមានដីសម្រាប់ធ្វើកសិកម្មពិតប្រាកដនោះ សូមទៅដាក់ពាក្យស្នើសុំដីប្រើប្រាស់ តាមរយៈអាជ្ញាធរភូមិឃុំ ស្រុក ខេត្តសាមីរបស់ខ្លួន ដើម្បីអាជ្ញាធរពិនិត្យរកដីសង្គមកិច្ចផ្ដល់ជូនទៅតាមស្ថានភាពជាក់ស្ដែង៕
វីដេអូ៖
