កិច្ចប្រជុំរដ្ឋមន្ត្រីសុខាភិបាលអាស៊ានលើកទី១៥នៅឥណ្ឌូនេស៊ី ។ រូបថត ក្រសួងសុខាភិបាល
ភ្នំពេញៈកិច្ចប្រជុំរដ្ឋមន្ត្រីសុខាភិបាលអាស៊ានលើកទី១៥នាទីក្រុងបាលីប្រទេសឥណ្ឌូនេស៊ីដែលបានប្រព្រឹត្តឡើងរយៈពេល៥ថ្ងៃក្រោមមូលបទ«ជំរុញសមិទ្ធផលនៃការអភិវឌ្ឍសុខភាពនៅអាស៊ាន (Advancing the Achievement of ASEAN Health Development)» បានទទួលលទ្ធផលសម្រេចចំនួន ៥ ចំណុច ក្នុងនោះក៏មានយន្តការទទួលស្គាល់គ្នាទៅវិញទៅមកវិញ្ញាបនបត្រចាក់វ៉ាក់សាំងឌីជីថលផងដែរ។
ទាក់ទងនឹងយន្តការទទួលស្គាល់វិញ្ញាបនបត្រចាក់វ៉ាក់សាំងកូវីដ១៩នេះ មន្ត្រីជាន់ខ្ពស់នៃក្រសួងសុខាភិបាលកម្ពុជាថាវាជាការចាំបាច់សម្រាប់សម្រួលដល់ការធ្វើដំណើររបស់ប្រជាជនទូទៅនៅក្នុងតំបន់។
យោងតាមសេចក្តីជូនព័ត៌មានកាលពីថ្ងៃទី១៨ ខែឧសភា របស់ក្រសួងសុខាភិបាលស្តីពីលទ្ធផលនៃកិច្ចប្រជុំថ្នាក់រដ្ឋមន្ត្រីសុខាភិបាលអាស៊ានបានឱ្យដឹងថា លទ្ធផលទី១គឺបង្កើតមជ្ឈមណ្ឌលអាស៊ាន សម្រាប់ឆ្លើយតបបញ្ហាសុខភាពសាធារណៈនិងជំងឺឆ្លងកាចសាហាវផ្សេងទៀតចំនួន៣គឺនៅប្រទេសឥណ្ឌូនេស៊ី ប្រទេសថៃ និងប្រទេសវៀតណាម ដែលមានលេខាធិការដ្ឋាន មួយនៅប្រទេសថៃ។
ក្រសួងបានបន្តថា «ទី២ គឺរៀបចំយន្តការទទួលស្គាល់គ្នាទៅវិញទៅមកវិញ្ញាបនបត្រចាក់វ៉ាក់សាំងឌីជីថលដែលបានផ្តួចផ្តើមដោយប្រទេសឥណ្ឌូនេស៊ីនិងទី៣ គឺពង្រឹងកិច្ចសហប្រតិបត្តិការលើការការពារ ការត្រៀមឆ្លើយតបជាបន្ទាន់ នឹងរកឱ្យឃើញបានលឿនចំពោះបញ្ហាសុខភាពសាធារណៈបន្ទាន់»។
ចំណែកលទ្ធផលទី៤ គឺធានាការទទួលបានវ៉ាក់សាំង ឱសថព្យាបាល ការធ្វើរោគវិនិច្ឆ័យ និងការផ្គត់ផ្គង់វេជ្ជសាស្ត្រសំខាន់ៗសម្រាប់ត្រៀមទប់ទល់ឆ្លើយតបចំពោះការរាតត្បាតនានាដែលអាចកើតមាននិងចំណុចទី៥ ចុងក្រោយគឺពង្រឹងកិច្ចសហការពហុភាគីក្នុងការអនុវត្តផែនការយុទ្ធសាស្ត្រអាស៊ាន២០២១-២០២៥ពិសេសជាមួយនឹងដៃគូសន្ទនាអាស៊ានឱ្យបានសម្រេចទៅតាមទិសដៅដែលបានដាក់ចេញ។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានប្រាប់ភ្នំពេញប៉ុស្តិ៍កាលពីថ្ងៃទី១៨ ខែឧសភា ថា ការទទួលស្គាល់វិញ្ញាបនបត្រចាក់វ៉ាក់សាំងកូវីដ១៩ ជាការចាំបាច់ណាស់ដើម្បីសម្រួលដល់ការធ្វើដំណើររបស់ប្រជាជនទូទៅនៅក្នុងតំបន់។
លោកស្រីបានបន្ថែមថា៖«វាក៏ជួយជំរុញនូវកំណើនទេសចរតាមបណ្តាប្រទេសសមាជិកនិងតំបន់ ព្រមទាំងរួមចំណែកក្នុងការជំរុញកំណើនសេដ្ឋកិច្ចសង្គមឡើងវិញផងដែរ។កន្លងមកកម្ពុជាក៏បាននិងកំពុងធ្វើកិច្ចការទទួលស្គាល់នេះជាហូរហែមកហើយដែរ»។
នៅឯកិច្ចប្រជុំនោះក៏មានកិច្ចប្រជុំពាក់ព័ន្ធផងដែរដែលក្នុងនោះមានកិច្ចប្រជុំថ្នាក់រដ្ឋមន្ត្រីសុខាភិបាលអាស៊ាន-បូក៣ លើកទី៩ ដែលមានសាធារណរដ្ឋប្រជាមានិតចិន ជប៉ុន និងសាធារណរដ្ឋកូរ៉េ, កិច្ចប្រជុំថ្នាក់រដ្ឋមន្ត្រីសុខាភិបាលអាស៊ាន-ចិនលើកទី៨,កិច្ចប្រជុំថ្នាក់រដ្ឋមន្ត្រីសុខាភិបាលអាស៊ាន-កូរ៉េ លើកទី១ និងកិច្ចប្រជុំពិសេសថ្នាក់រដ្ឋមន្ត្រីសុខាភិបាលអាស៊ាន-សហរដ្ឋអាមេរិក។
កិច្ចប្រជុំពាក់ព័ន្ធទាំងនេះបានចេញសេចក្តីថ្លែងការណ៍រួមផ្សេងៗគ្នាដោយសំដៅលើគោលដៅនៃការការពារសុខភាពសាធារណៈ, ការពង្រឹងប្រព័ន្ធសុខាភិបាល, ការទប់ស្កាត់ឱសថក្លែងក្លាយ, ការឆ្លើយតបបន្ទាន់នូវបញ្ហាសុខភាពសាធារណៈ, ការពង្រឹងសមត្ថភាពធនធានមនុស្ស និងពង្រឹងប្រព័ន្ធសុខាភិបាលតាមរយៈការគ្របដណ្តប់សុខាភិបាលជាសកលផងដែរ ពិសេសការថែទាំសុខភាពបឋម…។
យោងតាមសេចក្តីជូនព័ត៌មានរបស់ក្រសួងសុខាភិបាលកម្ពុជាដដែលបានបញ្ជាក់ថា«កិច្ចប្រជុំថ្នាក់រដ្ឋមន្ត្រីសុខាភិបាលអាស៊ានលើកទី១៥និងកិច្ចប្រជុំពាក់ព័ន្ធបានបញ្ចប់ដោយជោគជ័យក្នុងស្មារតីសាមគ្គីភាពមិត្តភាពនិងកិច្ចសហប្រតិបត្តិការក្នុងចំណោមប្រទេសសមាជិកអាស៊ានទាំងអស់និងរវាងអាស៊ានជាមួយប្រទេសជាដៃគូសន្ទនាទាំងអស់ផងដែរ»។
ឥណ្ឌូនេស៊ីក្នុងនាមជាប្រធានប្តូរវេនចប់អាណត្តិបានថ្លែងអំណរគុណប្រទេសសមាជិកនិងដៃគូសន្ទនាដែលបានសហការយ៉ាងជិតស្និទ្ធនិងគាំទ្រយ៉ាងពេញទំហឹងក្នុងរយៈពេល២ឆ្នាំកន្លងមកព្រមទាំងប្រគល់តួនាទីជាប្រធានប្តូរវេនបន្តទៅឱ្យសាធារណរដ្ឋប្រជាធិបតេយប្រជាមានិតឡាវដែលនឹងត្រូវរៀបចំកិច្ចប្រជុំថ្នាក់រដ្ឋមន្ត្រីសុខាភិបាលអាស៊ានលើកទី១៦និងកិច្ចប្រជុំពាក់ព័ន្ធនៅទីក្រុងវៀងចន្ទន៍នៅក្នុងឆ្នាំ២០២៤ខាងមុខ៕
