លោកនាយករដ្ឋមន្ត្រី ហ៊ុន សែន សំណេះសំណាលជាមួយពលរដ្ឋខ្មែរ នៅប្រទេសស្វីស។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានឱ្យដឹងថា ថ្មីៗនេះ កម្ពុជា-វៀតណាម បានឯកភាពគ្នាលើខ្សែបន្ទាន់ព្រំដែនចំនួន៦ភាគរយទៀត ដែលធ្វើឱ្យការបោះបង្គោលព្រំដែននឹងសម្រេចបាន ៩០ភាគរយ នាពេលខាងមុខនេះស្របពេលកម្ពុជាកំពុងពន្លឿនបញ្ចប់ការបោះបង្គោលព្រំដែនដែលនៅសេសសល់។
ក្នុងជំនួបសំណេះសំណាលជាមួយសហគមន៍ខ្មែររស់នៅទ្វីបអឺរ៉ុប នាទីក្រុងហ្សូរិក ប្រទេសស្វីស កាលពីថ្ងៃទី២១ខែឧសភានេះ លោកនាយករដ្ឋមន្ត្រី ហ៊ុន សែន បានបង្ហើបឱ្យដឹងថា បច្ចុប្បន្នការបោះបង្គោលព្រំដែនរវាងកម្ពុជា និងវៀតណាមសម្រេចបាន ៨៤ ភាគរយ ខណៈ ៦ ភាគរយទៀត ភាគីទាំង ២ បានឯកភាពរួចហើយ។
លោកគូសបញ្ជាក់ថា៖« ថ្ងៃមុនខ្ញុំបាននិយាយជាមួយ បងប្អូនខ្មែរនៅអាមេរិក ព្រោះពេលហ្នឹងជួបនាយករដ្ឋមន្ត្រីវៀតណាម នៅវ៉ាស៊ីនតោន ថាយើងបានបោះបង្គោលព្រំដែនបាន៨៤ភាគរយ នៅសល់១៦ភាគរយទៀត ប៉ុន្ដែថ្មីៗនេះគណៈកម្មការព្រំដែននៃប្រទេសទាំងពីរ បានព្រមព្រៀងគ្នាលើ៦ភាគរយទៀត ។ ខាងវៀតណាមគេសុំយោបល់ខាងវៀតណាម ខាងកម្ពុជាសុំយោលបល់កម្ពុជា ខាងកម្ពុជាងាយនោះទេដោយសារបញ្ហាស្ថិតនៅក្នុងការគ្រប់គ្រង ព្រោះខ្ញុំជាប្រធានអាជ្ញាធរព្រំដែនតែម្តង»។
លោកឱ្យដឹងទៀតថា ពាក់ព័ន្ធកិច្ចការព្រំដែននេះ លោកក៏អញ្ជើញនាយករដ្ឋមន្ដ្រីវៀតណាមមកទស្សនកិច្ចនៅកម្ពុជា ហើយអាចនឹងចុះហត្ថលេខាលើ៦ភាគរយនេះផងដែរ។
លោកដាក់ជាចម្ងល់ថា« បងប្អូនសួរមើល បើគង់តែឱ្យដីគេដដែល ចាំទៅចរចាធ្វើនាំហត់ធ្វើអី យកម្តងប៉ុន្មានភាគរយៗ ម៉េចក៏មិនឱ្យគេតែម្តងទៅ គេទារប៉ុន្មានឱ្យគេប៉ុណ្ណឹងទៅចាំបាច់ទៅចរចាធ្វើអី និយាយឱ្យយុត្តិធម៌»។
លោកក៏បានសង្កត់ធ្ងន់ថា ៖« ខ្ញុំគ្មានសិទ្ធិយកដីខ្មែរសូម្បីមួយមីលីម៉ែត្រ ឱ្យប្រទេសណាទេ បើដីនៅស្រុកខ្មែរជាដីចំការរបស់ខ្ញុំ ខ្ញុំអាចកាត់ឱ្យបានព្រោះជាកម្មសិទ្ធិរបស់ខ្ញុំ ប៉ុន្តែសម្រាប់ប្រទេសនឹងប្រទេសគឺអត់ទេ»។
លោក ហ៊ុន សែន ក៏បានរម្លឹកថា កម្ពុជា និងវៀតណាមបានឯកភាពគ្នាស្នើសុំអ្នកជំនាញការបារាំងឱ្យទៅជួយផ្ទេរផែនទី ពីផែនទីខ្នាត១/១០០ ០០០មកផែនទី UTM ខ្នាត១/៥០ ០០០ ដើម្បីឱ្យច្បាស់លាស់ងាយស្រួលក្នុងការបោះបង្គោលព្រំដែន។
ស្របពលជាមួយគ្នានេះ លោកបានបញ្ជាក់ថា ក្រោយបញ្ចប់សង្គ្រាមឆ្នាំ ១៩៩៨ រាជរដ្ឋាភិបាលកម្ពុជាបានដាក់ចេញនូវគោលដៅ២សំខាន់ ទី១ ប្រែក្លាយដីអតីតសមរភូមិសង្គ្រាម ទៅជាតំបន់ការអភិវឌ្ឍ និងទី២ ប្រែក្លាយខ្សែព្រំដែនជាមួយប្រទេសជិតខាងទាំងអស់ ឱ្យទៅជាមួយព្រំដែនសន្ដិភាព មិត្តភាព សហប្រតិបត្តិការ និងការអភិវឌ្ឍ។
លោកថា៖« បច្ចុប្បន្ននេះគោលដៅទី១ បានសម្រេចរហូតទៅដល់៩៥ភាគរយ ដែលប្រែក្លាយពីតំបន់អតីតសមរភូមិ ឱ្យទៅជាតំបន់អភិវឌ្ឍន៍ ហើយ៥ភាគរយដែលនៅសល់ គឺជាតំបន់ដែលមានមីន និងគ្រាប់មិនទាន់ផ្ទុះ មិនហ៊ានឱ្យប្រជាពលរដ្ឋទៅបង្កបង្កើនផលទេ ដែលយើងកំពុងដោះមីនសព្វថ្ងៃនេះ ប្រទេសស្វីសក៏ជួយយើងក្នុងការដោះមីន»។
លោកនាយករដ្ឋមន្រី្តបន្តទៀតថា ពិតមែនការដោះស្រាយ នៅតាមព្រំដែនកម្ពុជា-វៀតណាម កម្ពុជា-ថៃ កម្ពុជា-ឡាវ មិនទាន់ដាច់ស្រេចអស់ ប៉ុន្តែយើងដោះស្រាយជាមួយឡាវ បាន ៨៦ភាគយ សល់ ១៤ភាគរយ ដោះស្រាយជាមួយវៀណាមបាន ៨៤ភាគរយ សល់ ១៦ភាគរយ ហើយឥឡូវឯកភាពគ្នាបាន ៦ភាគរយទៀត។ រីឯនៅថៃភាគីទាំងពីរ បានបង្កើតគណៈកម្មការចម្រុះដើម្បីបន្តលើរឿងនេះ។
យ៉ាងនេះក្តីលោកគូសបញ្ជាក់ថា៖« យើងមិនទុកឱ្យបញ្ហានេះក្លាយទៅជាចំណាប់ខ្មាំងនៃការធ្វើពាណិជ្ជកម្ម និងទំនាក់ទំនងរវាងប្រទេស ប្រជាជននិងប្រជាជននោះទេ»។
អនុប្រធានគណៈកម្មាធិការព្រំដែនលោកស្រី កុយ ពិសី ប្រាប់ភ្នំពេញនៅថ្ងៃទី ២២ ខែឧសភានេះថា ភាគីទាំងពីរបានឯកភាពគ្នាលើការបោះបង្គោលព្រំដែន៦ភាគរយរួច ហើយរង់ចាំតែឯកសារជាផ្លូវការពីភាគីវៀតណាមប៉ុណ្ណោះ។
លោកស្រីថា៖« ៦ភាគរយនេះមានន័យថាយើងឯកភាពគ្នាលើខ្សែព្រំដែនហើយ ប៉ុន្តែយើងត្រូវទៅបោះបង្គោលខ័ណសីមាលើ ៦ភាគរយនោះ។ យើងមិនទាន់កំណត់កាលបរិច្ឆេទចុះបោះបង្គោលពេលណាទេ ដោយសារកម្ពុជា បានដាក់ស្នើទៅខាងភាគីវៀតណាមថា បើសិនជាឯកភាពគ្នាចឹងហើយ សូមបញ្ជូនក្រុមជំនាញចំណុះទាំងពីរទៅបោះបង្គោល ប៉ុន្តែគេមិនទាន់ឆ្លើយតបយើងពេលវេលាជាក់ស្តែង»។
លោកស្រីបន្តថា៖«អ្វីដែលយើងពិបាកត្រង់ថាយើងមិនទាន់ឯកភាពគ្នាលើខ្សែព្រំដែន ប៉ុន្តែបើយើងឯកភាពគ្នាហើយ ការអនុវត្តវាមិនយូរទេ បើសិនជាអាការធាតុល្អ ព្រោះយើងដឹងហើយនៅខេត្តរតនគិរីនិងមណ្ឌលគិរី ភាគច្រើនតំបន់ភ្នំហើយការធ្វើវាពិបាកដែរ បើតាមប្រទេសខ្លះនៅខែវស្សាគេអត់ធ្វើទេ»។
លោកស្រីបន្តថា ការបោះបង្គោលព្រំដែន ៦ភាគរយទៀតនោះស្ថិនៅ ខេត្តស្វាយរៀង ខេត្តតាកែវ រតនគិរី និងខេត្តមណ្ឌលគិរី។
លោកស្រី កុយ ពិសី បានពន្យល់ថា ៖«នៅសល់ ១០ភាគរយទៀតនោះជាតំបន់ស្មុគស្មាញ បើនិយាយថាកំណត់ពេលវេលាបញ្ចប់បោះបង្គោល ១០០ ភាគរយនោះ មិនទាន់បានទេពីព្រោះសូម្បីតែយើងចុះហត្ថលេខាសន្ធិសញ្ញាបំពេញបន្ថែមឆ្នាំ ២០០៥ សម្តេចតេជោ ជាមួយនាយករដ្ឋមន្ត្រីវៀតណាម បានឯកភាពគ្នាបញ្ចប់នៅឆ្នាំ ២០០៨ រហូតដល់ ២០១២ ដល់ ២០១៨ ឥឡូវនេះឆ្នាំ ២០២២ហើយមិនទាន់ចប់ទេ។ អ៊ីចឹងយើងធ្វើម្តងបន្តិចៗ យើងអត់អាចកំណត់ថាលឿនកម្រិតណាទេ ដោយសារតែយើងដឹងស្រាប់ហើយបូរណភាពទឹកដីវាមិនអាចធ្វើលឿនៗដូចយើងចង់បានទេ ត្រូវការជជែកទៅជជែកមកពេលខ្លះ រឿងដដែលយើងជជែកគ្នា៥ដងមិនទាន់ចប់ផង»៕
វីដេអូ៖
