សមាជិកគណបក្សនយោបាយចូលរួមយុទ្ធនាការឃោសនាបោះឆ្នោតក្រុមប្រឹក្សាឃុំសង្កាត់ អាណត្តិទី ៥ កាលពីថ្ងៃចុងសប្ដាហ៍។ រូបថត សហការី
ភ្នំពេញៈ ក្នុងយុទ្ធនាការឃោសនាបោះឆ្នោត ជ្រើសរើសក្រុមប្រឹក្សាឃុំ សង្កាត់អាណត្តិទី ៥ ឆ្នាំ ២០២២ ដែលបានចាប់ផ្តើមកាលពីថ្ងៃទី ២១ ខែឧសភា គណបក្សនយោបាយនានាបានធ្វើការផ្សព្វផ្សាយពីគោលនយោបាយក្នុងការផ្តល់សេវាជូនពលរដ្ឋ និងការអភិវឌ្ឍឃុំ សង្កាត់ ដើម្បីទាក់ទាញការគាំទ្រ ខណៈដែលការឃោសនានៅថ្ងៃដំបូងប្រព្រឹត្តទៅដោយរលូន គ្មានអំពើហិង្សា មានសន្តិសុខ សុវត្ថិភាព និងសណ្តាប់ធ្នាប់ល្អ។
តាមរយៈសារជាលិខិតនៅថ្ងៃទី ២១ ខែឧសភា ដែលជាថ្ងៃបើកយុទ្ធនាការឃោសនាបោះឆ្នោត លោកនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជាថ្លែងថា គណបក្សប្រជាជនកម្ពុជាប្តេជ្ញានឹងជួយជនក្រីក្រ និងងាយរងគ្រោះ និងអភិវឌ្ឍឃុំ សង្កាត់ឱ្យកាន់តែរីកចម្រើន ដើម្បីឆ្លើយតបផលប្រយោជន៍របស់ប្រជាជននៅមូលដ្ឋាន ហើយអំពាវនាវដល់ប្រជាជនឱ្យបោះឆ្នោតជូនគណបក្សប្រជាជននៅថ្ងៃទី ៥ ខែមិថុនា ឆ្នាំ ២០២២។
លោកមានប្រសាសន៍ថា៖ «គណបក្សប្រជាជនកម្ពុជាក៏ដូចខ្លួនខ្ញុំផ្ទាល់ សូមប្តេជ្ញាចំពោះមុខប្រជាជនថា គណបក្សនឹងអនុវត្តគោលនយោបាយរបស់ខ្លួនឱ្យបានជោគជ័យ ដើម្បីរក្សាសន្តិភាព ស្ថិរភាព សន្តិសុខ សណ្តាប់ធ្នាប់ សុវត្ថិភាពសង្គមឱ្យបានរឹងមាំ លើកកម្ពស់ការផ្តល់សេវាសាធារណៈ បង្កើនកិច្ចគាំពារសង្គមជួយជនក្រីក្រ និងងាយរងគ្រោះ និងអភិវឌ្ឍឃុំ សង្កាត់លើគ្រប់វិស័យឱ្យកាន់តែរីកចម្រើនឡើង ដែលឆ្លើយតបទៅនឹងបំណងប្រាថ្នា និងផលប្រយោជន៍ដ៏ឧត្តុង្គឧត្តមរបស់ប្រជាជនគ្រប់ៗរូបនៅគ្រប់មូលដ្ឋាន»។
លោកបន្តថា៖ «សូមបងប្អូន ជនរួមជាតិ ដែលបានឃើញច្បាស់រួចហើយនូវសកម្មភាព សមិទ្ធផល និងគោលនយោបាយដ៏ត្រឹមត្រូវរបស់គណបក្សប្រជាជនកម្ពុជា អញ្ជើញទៅបោះឆ្នោត និងបោះឆ្នោតគាំទ្រគណបក្សប្រជាជនកម្ពុជា ដែលមានរូបទេវតាបាចផ្កា ជាសញ្ញាសម្គាល់ឱ្យបានគ្រប់គ្នាកុំបីខាននៅតាមការិយាល័យបោះឆ្នោតក្នុងឃុំ សង្កាត់ របស់បងប្អូន»។
លោក ហ៊ុន សែន លើកឡើងថា ការអនុវត្តគោលនយោបាយ ដើម្បីអភិវឌ្ឍឃុំ សង្កាត់ ឆ្នាំ ២០១៧-២០២២ បានទទួលលទ្ធផលដ៏ល្អប្រសើរដែលធ្វើឱ្យគ្រប់ឃុំ សង្កាត់ សុទ្ធតែមានការប្រែប្រួលថ្មី។ ភូមិ ឃុំ សង្កាត់កាន់តែមានសុវត្ថិភាពជីវភាពប្រជាជនកាន់តែបានលើកកម្ពស់លទ្ធិប្រជាធិបតេយ្យបានចាក់ឫសកាន់តែជ្រៅក្នុងមូលដ្ឋាន ហើយសិទ្ធិសេរីភាពរបស់ប្រជាជនត្រូវបានគោរព និងការពារយ៉ាងម៉ឺងម៉ាត់។
លោកថា៖ «ប្រជាជនគ្រប់ៗរូបបានទទួលផលប្រយោជន៍ពីគោលនយោបាយអភិវឌ្ឍន៍ ឃុំ សង្កាត់ទាំងក្នុងការបង្កើត និងពង្រីកមុខរបរ និងការងារ ការជំរុញវិស័យកសិកម្ម ការមិនយកពន្ធលើជីកសិកម្មដែលបង្កបង្កើនផលជាលក្ខណៈគ្រួសារ ការកសាងហេដ្ឋារចនាសម្ព័ន្ធគមនាគមន៍ក្នុងឃុំសង្កាត់ ការពង្រឹងសន្តិសុខស្បៀង និងអាហារូបត្ថម្ភ ការប្រើប្រាស់ទឹកស្អាត និងថាមពលអគ្គិសនី»។
លោកបន្តថា ក្នុងពេលប្រទេសកម្ពុជាត្រូវរងគ្រោះដោយការឆ្លងរាតត្បាតនៃជំងឺកូវីដ ១៩ ប្រជាជននៅគ្រប់មូលដ្ឋានបានទទួលការចាក់វ៉ាក់សាំងការពារដោយឥតគិតថ្លៃ និងបានទទួលការជួយគាំពារ និងឧបត្ថម្ភពីរាជរដ្ឋាភិបាលទាន់ពេលវេលា ដែលបានការពារអាយុជីវិតប្រជាជន និងធ្វើឱ្យជីវភាពប្រជាជនមានលំនឹង និងប្រកបមុខរបរបានជាធម្មតា។
លោក ហ៊ុន សែន បញ្ជាក់ថា៖ «បច្ចុប្បន្នប្រជាជនកម្ពុជាកំពុងរស់នៅយ៉ាងសុខសាន្តក្រោមម្លប់នៃសន្តិភាព និងការឯកភាពជាតិ ហើយរួមសាមគ្គីគ្នាជាធ្លុងមួយខិតខំអស់ពីកម្លាំងកាយ កម្លាំងចិត្ត ដើម្បីអភិវឌ្ឍសង្គមជាតិ និងលើកស្ទួយជីវភាពរស់នៅរបស់ខ្លួន»។
ក្នុងពិធីសំណេះសំណាលជាមួយពលរដ្ឋខ្មែរដែលរស់នៅទ្វីបអឺរ៉ុបក្នុងទីក្រុងហ្ស៊ូរិច (Zurich) ប្រទេសស្វ៊ីស នាយប់រំលងអធ្រាត្រឈានចូលថ្ងៃទី ២១ ខែឧសភា ក្នុងឱកាសលោកទៅចូលរួមកិច្ចប្រជុំប្រចាំឆ្នាំ ២០២២ របស់វេទិកាសេដ្ឋកិច្ចពិភពលោក លោក ហ៊ុន សែន ថ្លែងថា យុទ្ធនាការឃោសនារកសំឡេងឆ្នោតនៅថ្ងៃទី ១ បានប្រព្រឹត្តទៅដោយសន្តិវិធី។
លោកបន្តថា នេះគឺជាផ្នែកដែលកម្ពុជាធ្វើការបោះឆ្នោតជាទៀងទាត់ដោយមិនចាំបាច់មានប្រទេសណា ឬអ្នកណាមកប្រដៅកម្ពុជានោះទេ ព្រោះច្បាប់កម្ពុជាបានកំណត់រួចទៅហើយ។ ចំពោះការសម្រេចចិត្តបោះឆ្នោតឱ្យគណបក្សនយោបាយណានោះគឺជាសិទ្ធិរបស់ពលរដ្ឋ។
គណបក្សហ៊្វុនស៊ិនប៉ិចក្នុងថ្ងៃយុទ្ធនាការឃោសនាបោះឆ្នោត។ រូប សហការី
លោកបញ្ជាក់ថា៖ «ក្នុងឋានៈខ្ញុំជានាយករដ្ឋមន្ត្រី និងជាប្រធានគណបក្ស ខ្ញុំក៏ចង់ឈ្នះដែរ ក៏ប៉ុន្តែឈ្នះយ៉ាងណាក៏ដោយ សុំអំពាវនាវចំពោះប្រជាពលរដ្ឋរបស់យើង គឺរក្សានូវភាពថ្លៃថ្នូរ កុំធ្វើអ្វីដែលមានចរិតជាហិង្សា ឬការគំរាមកំហែងឱ្យសោះ។ ប្រទេសរបស់យើងវាលំបាកពេកហើយ ល្មមប៉ុណ្ណឹងបានហើយ។ យកគោលនយោបាយទៅធ្វើការប្រកួតប្រជែងគ្នាជាជាងជេរគ្នា។ ខ្ញុំក៏ចេះជេរដែរ សាកល្បងមើល! ជេរដូចរន្ទះបាញ់អ៊ីចឹង! សំឡេងហ្ន! តែអារឿងដែលខ្ញុំត្រូវជេរអាហ្នឹងវារឿងផ្សេង»។
ជាមួយគ្នានេះ នៅក្នុងការហែក្បួនរបស់គណបក្សភ្លើងទៀននៅថ្ងៃដំបូងនៃយុទ្ធនាការឃោសនាបោះឆ្នោតនេះដែរ គណបក្សនេះបានផ្សព្វផ្សាយនូវគោលនយោបាយ ៧ ចំណុច ដល់ប្រជាពលរដ្ឋនៅតាមមូលដ្ឋានដោយទី ១ គោរពសិទ្ធិអំណាចពលរដ្ឋ, ២ ការផ្តល់ សេវាសាធារណៈ មិនរើសអើងពីនិន្នាការ, ៣ ការពង្រឹងសេវាសន្តិសុខ, ៤ ការអភិវឌ្ឍមូលដ្ឋាន, ៥ ផ្តល់សេវាប្រឹក្សាយោបល់លើការខ្ចីប្រាក់, ៦ ការផ្តល់សេវាសុខាភិបាល និងទី ៧ ការសិក្សាអប់រំ។ លោក សុន ឆ័យ អនុប្រធានគណបក្សភ្លើងទៀន ថ្លែងទៅកាន់អ្នកគាំទ្ររបស់លោកកាលពីថ្ងៃទី ២១ ខែឧសភាថា ការហែក្បួនឃោសនារបស់គណបក្សនឹងត្រូវធ្វើជាគំរូដល់គណបក្សផ្សេងទៀត និងប្រកបដោយសន្តិវិធី បើទោះបីមានគេអុចអាល់ឱ្យមានជម្លោះនៅក្នុងពេលហែក្បួនក៏ដោយក៏គណបក្សភ្លើងទៀនត្រូវតែអំណត់ និងទទួលខុសត្រូវ។
លោកបញ្ជាក់ថា៖ «យើងនឹងទទួលបានជោគជ័យ ហើយជោគជ័យរបស់គណបក្សភ្លើងទៀន គឺជាជោគជ័យរបស់ខ្មែរទាំងអស់គ្នា។ ឈ្នះខ្មែរទាំងអស់គ្នា ទាល់តែគណបក្សនយោបាយដូចគណបក្សភ្លើងទៀនយកការគាំទ្រពីប្រជាពលរដ្ឋ ដើម្បីបម្រើខ្មែរទាំងអស់គ្នា ទើបកម្ពុជារបស់យើងទទួលបានសុខសន្តិភាពពិតប្រាកដ»។
លោក ឡឹក សុធារអ្នកនាំពាក្យគណបក្សប្រជាធិបតេយ្យមូលដ្ឋានប្រាប់ភ្នំពេញប៉ុស្តិ៍នៅថ្ងៃទី ២២ ខែឧសភាថា នៅថ្ងៃទី ១ នៃយុទ្ធនាការឃោសនាបោះឆ្នោតឃុំសង្កាត់គណបក្សប្រជាធិបតេយ្យមូលដ្ឋានបានចាប់ផ្តើមឃោសនាតាមរូបភាពផ្សេងៗដូចជាការហែក្បួនការឃោសនាជាក្រុមតូចៗ ការចែកខិត្តប័ណ្ណស្តីពីគោលនយោបាយ ស ៥ (សេដ្ឋកិច្ច សុខាភិបាល សិក្សាធិការ សង្គមកិច្ច និងសេវាសាធារណៈ) និងការចងបដាផ្សព្វផ្សាយ។
លោកថ្លែងថា៖ «យើងនឹងបង្កើនសកម្មភាពឃោសនាបន្ថែមទៀត ជាពិសេសការជួបជាក្រុមតូចៗក្នុងការពន្យល់ពីគោលនយោបាយ ស ៥ ដើម្បីដោះស្រាយបញ្ហាសំខាន់ជូនប្រជាពលរដ្ឋថា តាមមូលដ្ឋាន។ បោះឆ្នោតជូនគណបក្សប្រជាធិបតេយ្យមូលដ្ឋាននឹងទទួលបានមេឃុំ/ចៅសង្កាត់ជាមនុស្សដែលមាន ស ៣ សមត្ថភាព សកម្មភាព និងសុចរិតភាព»។
ចំណែកលោក ពេជ្យ ស្រស់ ប្រធានគណបក្សយុវជនកម្ពុជាថ្លែងតាមរយៈហ្វេសប៊ុកក្នុងជំនួបជាមួយអ្នកគាំទ្រនៅថ្ងៃទី ២២ ឧសភា ថា គោលនយោបាយគណបក្សយុវជនកម្ពុជាក្នុងចំណោមគោលនយោបាយផ្សេងទៀត គឺ បើកវេទិកាសាធារណៈរៀងរាល់ ១ ខែម្តងជាមួយប្រជាពលរដ្ឋ ដើម្បីដោះស្រាយបញ្ហានានានៅក្នុងមូលដ្ឋាន ឃុំ សង្កាត់។ ការរៀបចំឱ្យវេទិកាសាធារណៈនេះ ដើម្បីឱ្យប្រជាពលរដ្ឋ និងមេឃុំ/ចៅសង្កាត់ យល់ពីគ្នាទៅវិញទៅមក ដើម្បីឈានទៅរកការអភិវឌ្ឍ ខណៈបច្ចុប្បន្នប្រជាពលរដ្ឋបានតែរអ៊ូនៅតាមផ្ទះ និងនៅតាមមូលដ្ឋានដោយមិនដឹងទៅប្រាប់អ្នកណា និងពេលខ្លះ ប្រជាពលរដ្ឋរៃអង្គាសលុយ ដើម្បីអភិវឌ្ឍផ្លូវ ប៉ុន្តែគេមិនឱ្យធ្វើថែមទៀត។
លោកថ្លែងថា៖ «ដូច្នេះ ខ្ញុំគិតថា បើម្ចាស់ឆ្នោត និងមេឃុំអត់ជួបគ្នាក្នុង ១ ខែម្តងទេអត់អាចស្វែងយល់ពីគ្នាបានទេ បងប្អូនជួបមេឃុំនៅក្នុងវេទិកា បងប្អូន អាចលើកយកបញ្ហាដែលបងប្អូនកើតមាន និងបងប្អូនចង់បាន ស្នើសុំមេឃុំផ្ទាល់ ហ៊ាននិយាយជាមួយមេឃុំប្រចាំខែ ហ៊ានថា ឱ្យមេឃុំ ដែលនេះ គឺជាគោលការណ៍សំខាន់»។
លោក ហង់ ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គជប) ប្រាប់ភ្នំពេញ- ប៉ុស្តិ៍ថា ថ្ងៃដំបូងនៃយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ សង្កាត់ គណបក្សនយោបាយទាំង ១៧ ដែលបានចុះបញ្ជីបេក្ខជនឈរឈ្មោះបោះឆ្នោតបានធ្វើសកម្មភាពឃោសនាបោះឆ្នោតទៅតាមលទ្ធភាព និងសមត្ថភាពរបស់ខ្លួននៅតាមឃុំ សង្កាត់ ដែលខ្លួនឈរឈ្មោះបោះឆ្នោត។
លោកថា៖ «ជារួមដោយសារមានកិច្ចសហការល្អពីសំណាក់អាជ្ញាធរដែនដីជាមួយគណៈកម្មការរៀបចំការបោះឆ្នោតតាមលំដាប់ថ្នាក់ និងគណបក្សនយោបាយផងនោះដំណើរការឃោសនាបោះឆ្នោតរបស់គណបក្សនយោបាយនៅថ្ងៃដំបូងនេះបានប្រព្រឹត្តទៅដោយរលូនគ្មានអំពើហិង្សាមានសន្តិសុខ សុវត្ថិភាព សណ្តាប់ធ្នាប់ល្អ និងពុំមានបាតុភាពណាមួយកើតឡើងគួរឱ្យកត់សម្គាល់ឡើយ»៕
វីដេអូ៖
