ពលរដ្ឋរង់ចាំបោះឆ្នោតនៅការិយាល័យបោះឆ្នោតក្នុងសាលាបឋមសិក្សាសុធារស ខណ្ឌចំការមនកាលពីឆ្នាំ ២០១២។ ហុង មិនា
ភ្នំពេញៈ រាជរដ្ឋាភិបាលបានសម្រេចឱ្យកម្មករនិយោជិតឈប់សម្រាករយៈពេល ២ ថ្ងៃ ដើម្បីទៅចូលរួមបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី ៥ ដែលនឹងប្រព្រឹត្តទៅនាថ្ងៃទី ៥ ខែមិថុនា ឆ្នាំ ២០២២ ដោយម្ចាស់រោងចក្រ សហគ្រាសត្រូវរក្សាប្រាក់ឈ្នួល និងអត្ថប្រយោជន៍ផ្សេងៗដដែល។
លោក អ៊ីន វីរជាតិ រដ្ឋលេខាធិការនៃទីស្តីការគណៈរដ្ឋមន្ត្រីបានលើកឡើងដូចនេះ តាមរយៈលិខិតដែលលោកផ្ញើជូនរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង កាលពីថ្ងៃទី ២០ ខែឧសភា។ លោកបានឱ្យដឹងថា៖ «សម្តេចតេជោ នាយករដ្ឋមន្ត្រី ហ៊ុន សែន បានចំណារយល់ព្រមតាមសំណើសុំគោលការណ៍ ស្តីពីការឈប់សម្រាករបស់បងប្អូនកម្មករ និយោជិត ដើម្បីទៅបោះឆ្នោតជ្រើសរើសក្រុមប្រឹក្សាឃុំ សង្កាត់ ខាងមុខនេះ ១ ថ្ងៃមុនថ្ងៃបោះឆ្នោត និង ១ ថ្ងៃក្រោយថ្ងៃបោះឆ្នោត ដោយរក្សាប្រាក់ឈ្នួល និងអត្ថប្រយោជន៍ផ្សេងៗ»។
ជាមួយគ្នានេះដែរលោក អ៊ិត សំហេង នៅថ្ងៃទី ២៤ ខែឧសភាបានចេញសេចក្តីជូនដំណឹងដល់ម្ចាស់ ឬនាយករោងចក្រ សហគ្រាសទាំងអស់ ដែលស្ថិតក្នុងដែនអនុវត្តនៃច្បាប់ស្តីពីការងារពីសេចក្តីសម្រេចរបស់នាយករដ្ឋមន្ត្រីលើការឈប់សម្រាកនេះ។
លោក សំហេង បានលើកឡើងថា៖ «ដើម្បីបង្កលក្ខណៈងាយស្រួលដល់បងប្អូនកម្មករនិយោជិតក្នុងការចូលរួមបោះឆ្នោតជ្រើសរើសក្រុមប្រឹក្សាឃុំ សង្កាត់ នៅថ្ងៃអាទិត្យ ទី ៥ ខែមិថុនា ខាងមុខនេះ ម្ចាស់ ឬនាយករោងចក្រ សហគ្រាសត្រូវអនុញ្ញាតឱ្យកម្មករ និយោជិតបានឈប់សម្រាក ១ ថ្ងៃ មុនថ្ងៃបោះឆ្នោត និង ១ ថ្ងៃ ក្រោយថ្ងៃបោះឆ្នោត ដោយរក្សាប្រាក់ឈ្នួល និងអត្ថប្រយោជន៍ផ្សេងៗនៅដដែល»។
ទន្ទឹមនឹងនេះដែរ លោករដ្ឋមន្ត្រីក៏បានបញ្ជាក់ផងដែរថា រាល់ការឈប់សម្រាកសម្រាប់ការបោះឆ្នោតនេះម្ចាស់ ឬនាយករោងចក្រ សហគ្រាសពុំតម្រូវឱ្យកម្មករនិយោជិតបង្ហាញឯកសារពាក់ព័ន្ធផ្សេងៗនៅពេលត្រឡប់មកវិញឡើយ។
លោក អ៊ិត សំហេង បន្តថា៖ «ចំពោះកម្មករនិយោជិតដែលអវត្តមានហួសពីច្បាប់អនុញ្ញាតនេះ ត្រូវអនុវត្តតាមបទបញ្ជាផ្ទៃក្នុងរបស់រោងចក្រ សហគ្រាស និងបទប្បញ្ញត្តិជាធរមាន។ ជាមួយគ្នានេះដែរ និយោជកត្រូវខិតខំបើកប្រាក់ឈ្នួលជូនកម្មករនិយោជិតឱ្យបានមុនថ្ងៃទៅបោះឆ្នោត។ បើពុំមានលទ្ធភាពបើកប្រាក់ឈ្នួលទាន់ពេលទេ សូមអនុញ្ញាតឱ្យកម្មករនិយោជិតខ្ចីប្រាក់ឈ្នួលមួយភាគ (បុរេប្រទាន) ជាមុនសិន»។
លោក ខេន លូ អគ្គលេខាធិការសមាគមរោងចក្រកាត់ដេរនៅកម្ពុជា (GMAC) បានប្រាប់ភ្នំពេញប៉ុស្តិ៍យ៉ាងខ្លី នៅថ្ងៃទី ២៤ ខែឧសភាថា សមាគមនឹងទាក់ទងធ្វើកិច្ចការងារនេះជាមួយសមាជិករបស់ខ្លួន។
ចំណែកប្រធានសម្ព័ន្ធសហជីពជាតិលោក ហ្វា សាលី បានឯកភាព ចំពោះការសម្រេចចិត្តរបស់រាជរដ្ឋាភិបាលក្នុងការអនុញ្ញាតឱ្យកម្មករនិយោជិតសម្រាក ១ ថ្ងៃមុន និង ១ ថ្ងៃក្រោយថ្ងៃបោះឆ្នោតនេះ។
លោកបានប្រាប់ភ្នំពេញប៉ុស្តិ៍ថា៖ «ខ្ញុំយល់ថា វាជារឿងត្រឹមត្រូវ ដោយសារកន្លងមកធ្លាប់មានផលប៉ះពាល់ ហើយពេលនេះ រដ្ឋាភិបាលអនុញ្ញាតឱ្យឈប់មុន និងក្រោយបោះឆ្នោតនេះគឺជាការលួងចិត្តកម្មករ។ ម្យ៉ាងទៀត ប្រសិនបើកម្មករយើងអាចបោះឆ្នោតបាននៅកន្លែងណាក៏បាន វាកាន់តែចំណេញដល់បងប្អូនកម្មករនិយោជិតយើងទៀត»។
លោក ហ្វា សាលី បានបន្ថែមថា ការទៅបោះឆ្នោតនៅឃុំ សង្កាត់របស់ពួកគាត់ គឺពួកគាត់ត្រូវចំណាយលើការធ្វើដំណើរទៅបោះឆ្នោត តែវាបានឆ្លុះបញ្ចាំងពីការចង់បានរបស់ពួកគាត់នៅតាមភូមិ ឃុំដែលពួកគាត់រស់នៅ៕
វីដេអូ៖
