ពិធីប្រគល់ទទួលបទចម្រៀងនៅក្រសួងការបរទេសនៅថ្ងៃទី ៣០ ឧសភា។ រូប BTV
ភ្នំពេញៈ ជប៉ុនប្រគល់បទចម្រៀងមានចំណងជើងថា «ឥន្ទធនូ សម្រាប់ថ្ងៃស្អែក» ដែលនិពន្ធ និងច្រៀងដោយតារាចម្រៀង និងតារាសម្ដែងដ៏ល្បីរបស់ជប៉ុន គឺលោកស្រី មីណាមីណុ យ៉ូកុ(Minamino Yoko) ដល់កម្ពុជាដែលពិធីប្រគល់-ទទួលធ្វើឡើងរវាងលោកស្រី ទួត បញ្ញា រដ្ឋលេខាធិការក្រសួងការបរទេស និងលោក Mikami Masahiro ឯកអគ្គរាជទូតជប៉ុនប្រចាំកម្ពុជានៅថ្ងៃទី ៣០ ឧសភា។
លោកស្រី Minamino គឺជាតារាចម្រៀង និងជាតារាសម្ដែងជប៉ុនដ៏ល្បីដែលមានទំនាក់ទំនងជិតស្និទ្ធជាមួយប្រទេសកម្ពុជា។ លោកស្រីបានមកកម្ពុជាជាលើកដំបូងក្នុងឆ្នាំ ១៩៨៩ មុនពេលស្ថានទូតជប៉ុន បានបើកដំណើរការឡើងវិញក្នុងទីក្រុងភ្នំពេញ ដែលជាផ្នែកមួយនៃគម្រោងទូរទស្សន៍ ហើយលោកស្រីបានមកទស្សនកិច្ចនៅកម្ពុជាម្តងទៀតក្នុងឆ្នាំ ២០១៣។
លោកស្រី ទួត បញ្ញា ថ្លែងក្នុងពិធីប្រគល់-ទទួលនាថ្ងៃទី ៣០ ខែឧសភា នៅឯទីស្តីការក្រសួងការបរទេសថា «បទចម្រៀងដ៏ពីរោះនេះ» បានចាក់ចំបេះដូងរបស់លោកនាយករដ្ឋមន្ត្រី ហ៊ុន សែន នៅពេលដែលបទចម្រៀងនេះត្រូវបានបង្ហាញជូនលោកនៅក្នុងពិធីពិសាអាហារពេលល្ងាចដែលរៀបចំដោយលោក គីស៊ីដា ហ្វូមីអូ (Kishida Fumio) នាយករដ្ឋមន្ត្រីជប៉ុននៅថ្ងៃទី ២៣ ខែមេសានៅទីក្រុង Kumamoto ប្រទេសជប៉ុនក្នុងឱកាសចូលរួមកិច្ចប្រជុំកំពូលលើកទី៤ ស្តីពីបញ្ហាទឹកនៅអាស៊ីប៉ាស៊ីហ្វិក។
លោកស្រីថ្លែងថា ជាការឆ្លើយតបលោក ហ៊ុន សែន បានផ្ញើលិខិតថ្លែងអំណរគុណដល់លោកស្រី ណាមីណុ យ៉ូកុ ចំពោះបទចម្រៀង «ដែលមានអត្ថន័យបំផុត» របស់លោកស្រី។ លោក Mikami និងសហការីរបស់លោកបានខិតខំប្រឹងប្រែងក្នុងការទទួលបានសិទ្ធិចម្លងបទចម្រៀងនេះ។
បើតាមលោកស្រី ទួត បញ្ញា លោកស្រី Minamino និងក្រុមហ៊ុនទូរទស្សន៍ជប៉ុន បានអនុញ្ញាតឱ្យវីដេអូឃ្លីបបទចម្រៀងនេះបង្ហោះលើបណ្តាញទំនាក់ទំនងសង្គមរបស់រាជរដ្ឋាភិបាលកម្ពុជា និងចាក់ផ្សាយតាមស្ថានីយទូរទស្សន៍ដែលបានចុះបញ្ជីជាមួយរាជរដ្ឋាភិបាល។
លោកស្រីបញ្ជាក់ថា បទចម្រៀងនេះពិតជាឆ្លុះបញ្ចាំងពីតថភាពពិតនៃប្រទេសកម្ពុជា នៅចុងទសវត្សរ៍ឆ្នាំ ១៩៨០ និងការផ្លាស់ប្តូរបន្តិចម្តងៗចំពោះការអភិវឌ្ឍប្រទេស ក៏ដូចជាទំនាក់ទំនងជិតស្និទ្ធរវាងប្រជាជន និងប្រជាជននៃប្រទេសទាំង ២។
លោកស្រី ទួត បញ្ញា ថ្លែងថា៖ «ខ្ញុំជឿជាក់ថា ប្រជាជនកម្ពុជាជាច្រើនក៏នឹងមានការរំជួលចិត្តយ៉ាងខ្លាំង ចំពោះបទចម្រៀងដ៏អស្ចារ្យមួយនេះ ដែលនឹងជួយលើកកម្ពស់ ចំណងមិត្តភាពដ៏យូរអង្វែងរវាងប្រជាជនកម្ពុជា និងជប៉ុនផងដែរ»។
លោក Mikami Masahiro ឯកអគ្គរាជទូតជប៉ុនប្រចាំកម្ពុជាថ្លែងក្នុងពិធីនេះថា បទចម្រៀងនេះត្រូវបានចាក់បញ្ចាំងជាលើកដំបូងនៅក្នុងពិធីបើកព្រឹត្តិការណ៍វប្បធម៌ជប៉ុនប្រចាំឆ្នាំ ដែលរៀបចំដោយស្ថានទូតជប៉ុននៅក្នុងខែកុម្ភៈឆ្នាំនេះ គឺពិធី Kizuna។
លោកបន្តថា ជាច្រើនឆ្នាំមកនេះ លោកស្រី Minamino បានគិតអំពីការធ្វើអ្វីមួយដោយផ្អែកលើការចងចាំដ៏មានតម្លៃរបស់លោកស្រីចំពោះកម្ពុជា ដើម្បីលើកកម្ពស់ មិត្តភាពរវាងកម្ពុជា និងជប៉ុន ហើយរួមជាមួយមិត្តភក្តិមួយចំនួនដែលយល់ស្របនឹងគំនិតរបស់លោកស្រី។
លោកថា៖ «លោកស្រី Minamino បានស្ម័គ្រចិត្ដផលិតបទចម្រៀងនេះ ហើយផ្ញើមកកាន់ពួកយើង។ បទ ឥន្ទធនូសម្រាប់ថ្ងៃស្អែក រំឭកយើងអំពីមិត្តភាពរបស់យើង និងរបៀបដែលមិត្តភាពនេះនឹងបន្តទៅអនាគត។ ដូច្នេះហើយ ខ្ញុំសង្ឃឹមថា ប្រជាជនកម្ពុជាជាច្រើន នាក់នឹងទស្សនា និងស្តាប់ ហើយរីករាយជាមួយនឹងវីដេអូចម្រៀងនេះ»។
លោក Mikami ថ្លែងថា នៅឆ្នាំក្រោយ កម្ពុជា និងជប៉ុន នឹងប្រារព្ធខួបលើកទី ៧០ នៃការបង្កើតទំនាក់ទំនងការទូត។ លោកជឿជាក់ថា ប្រវត្តិសាស្ត្រនៃទំនាក់ទំនងរវាងប្រទេសទាំង ២ គឺផ្អែកលើការផ្លាស់ប្តូររវាងប្រជាជន និងប្រជាជន និងអារម្មណ៍នៃការគោរពគ្នាទៅវិញទៅមក។
តាមរយៈសារផ្ញើទៅលោក ហ៊ុន សែន លោកស្រី Minamino ថ្លែងថា៖ «ខ្ញុំបានមកប្រទេសកម្ពុជា ២ ដង ក្នុងឆ្នាំ ១៩៨៩ និងឆ្នាំ ២០១៣។ វាជាកម្មវិធីទូរទស្សន៍។ ឆ្នាំ ១៩៨៩ មិនមានស្ថានទូតជប៉ុននៅភ្នំពេញទេ។ ខ្ញុំបានទៅសាលាបឋមសិក្សា មណ្ឌលកុមារកំព្រា មន្ទីរពេទ្យជាដើមក្នុងប្រទេសកម្ពុជា។ ខ្ញុំបានរៀនច្រើន ហើយមានអារម្មណ៍ផ្សេងៗ។ ខ្ញុំបានទទួលថាមពលយ៉ាងច្រើនពីប្រជាជនកម្ពុជា»។
លោកស្រីបន្តថា៖ «ខ្ញុំសង្ឃឹមថា ប្រជាជនកម្ពុជាជាច្រើននឹងបានស្ដាប់បទនេះ។ ខ្ញុំឮថា ឆ្នាំក្រោយជាខួបលើកទី ៧០ នៃការបង្កើតទំនាក់ទំនងការទូត។ ដូច្នេះខ្ញុំសង្ឃឹមថា ខ្ញុំអាចមកប្រទេសកម្ពុជា ហើយច្រៀងបទឥន្ទធនូសម្រាប់ថ្ងៃស្អែកជាមួយប្រជាជនកម្ពុជា។ ខ្ញុំស្រលាញ់កម្ពុជា»៕
