លោកចូ បៃដិន និងលោក ពេជ្រ មូន ក្នុងពិធីទទួលសញ្ញាបត្រនៅអាមេរិកពីថ្ងៃ២៧ ឧសភា ។ រូបថត Moon Pich FB
ភ្នំពេញៈ បន្ទាប់ពីទទួលបានដំណឹងអំពីលោក ពេជ្រ មូន ដែលជាអតីតកុមារឃ្វាលគោម្នាក់នៅខេត្តកំពង់ឆ្នាំង បានតស៊ូរៀនសូត្ររហូតបានបញ្ចប់ការសិក្សានៅសាលាបណ្ឌិតសភាយោធាអាមេរិក ជាមួយនឹងការទទួលបានកាដូពិសេសគឺ «ខ្សែគោ ១ ចង្វាយ និងក្រមាចាស់មួយ» ពីលោកយាយបង្កើតដែលនាំពីកម្ពុជាសម្រាប់ថ្ងៃទទួលបានសញ្ញាបត្រនោះ លោកនាយករដ្ឋមន្ត្រី ហ៊ុន សែន បានសម្ដែងការអបអរសាទរ និងបានបកស្រាយនូវអត្ថន័យនៃការដូនោះថា ជាការរំឭកដាស់តឿនមួយរបស់ជីដូនចំពោះចៅកុំភ្លេចកំណើតរបស់ខ្លួន ។
តាមរយៈការបញ្ចេញមតិនៅលើគណនីបណ្ដាញសង្គមរបស់លោក ឯម ច័ន្ទមករា រដ្ឋលេខាធិការក្រសួងសង្គមកិច្ចជុំវិញព័ត៌មាននៃការបញ្ចប់ការសិក្សារបស់លោក មូន ពេជ្រ នៅព្រឹកថ្ងៃទី ៣១ ឧសភា ២០២២ លោកនាយករដ្ឋមន្ត្រីបានសរសេរថា៖ «គាត់ [លោកយាយ] ធ្វើបែបនេះជាការរំឭកមួយសម្រាប់ចៅ កុំឲ្យភ្លេចប្រវត្តិដ៏លំបាករបស់យើង។ តាក៏សូមជូនពរឲ្យចៅជួបតែសេចក្តីសុខ និងចម្រើន»។
កាលពីថ្ងៃទី ៣០ ខែ ឧសភា ឆ្នាំ ២០២២ លោក មូន បានបង្ហោះរូបភាពនិងសារដ៏គួរឲ្យចាប់អារម្មណ៍មួយនៅលើហ្វេសប៊ុករបស់លោកថា ក្រមានិងខ្សែគោមួយចង្វាយនោះ ត្រូវបានជីដូនរបស់គាត់រក្សាទុកអស់ ១០ ឆ្នាំមកហើយ សម្រាប់ទុកមើលពេលនឹកដល់គាត់ និងសម្រាប់ប្រគល់ឲ្យគាត់នៅថ្ងៃទទួលបានសញ្ញាបត្រ ពីសាលាបណ្ឌិត្យសភាយោធាអាមេរិក។
លោកសរសេរថា៖ «១០ ឆ្នាំហើយដែលលោកយាយរក្សាទុកក្រមា និងខ្សែគោដែលខ្ញុំប្រើ ហើយរង់ចាំខ្ញុំត្រឡប់ទៅស្រុកវិញ។ ខ្ញុំតែងប្រើវាសម្រាប់ជាថ្នក់ដាក់បាយ ទឹក និងសៀវភៅនៅពេលទៅឃ្វាលគោពេលរស់នៅឯស្រុកកំណើត។ ភាគច្រើន នៅក្នុងថ្នក់បាយមានតែបាយនិងអំបិល ដែលលោកយាយខ្ចប់ឲ្យប៉ុណ្ណោះ។ ពេលនេះលោកយាយ បានយកខ្សែគោ និងក្រមាចាស់នេះធ្វើជាកាដូសម្រាប់ថ្ងៃបញ្ចប់ការសិក្សារបស់ខ្ញុំពីបណ្ឌិតសភាយោធាអាមេរិក»។
បើតាមសំណេររបស់លោក មូន នៅពេលលោកយាយរបស់គាត់គឺអ្នកស្រី សៅ អ៊ី បានប្រគល់នូវកាដូដល់គាត់នៅថ្ងៃទទួលបានសញ្ញាបត្រពីសាលាបណ្ដិតសភាយោធាអាមេរិកពីថ្ងៃទី ២៧ ខែឧសភា ឆ្នាំ ២០២២ ក្រោមអធិបតីភាពរបស់លោក ចូ បៃដិន ប្រធានាធិបតីអាមេរិកផងនោះ លោកយាយរបស់គាត់ បានប្រាប់គាត់ថា៖ «យាយរក្សាវាទុក ព្រោះពេលនឹកចៅម្ដងៗ យាយយកវាមកមើលដើម្បីកុំឲ្យនឹកចៅពេក។ពេលនេះយាយប្រគល់វាឲ្យចៅវិញហើយទោះទៅដល់ទីណាសូមចៅកុំភ្លេចកំណើតរបស់ខ្លួនដែលធ្លាប់ជាក្មេងឃ្វាលគោឲ្យសោះ»។
លោកបានរៀបរាប់ទៀតថា៖ «ខ្ញុំស្ទើរស្រក់ទឹកភ្នែកពេលឮអ្នកមានគុណដែលបីបាច់ថែរក្សាខ្ញុំតាំងពីទើបនឹងកើតរហូតធំពេញវ័យមានប្រសាសន៍បែបនេះ។ វាជាកាដូដ៏មានតម្លៃបំផុតក្នុងជីវិតរបស់ខ្ញុំ។ សូមអរគុណលោកយាយជាទីគោរពស្រឡាញ់របស់ចៅ»។
តាមរយៈរូបភាពនិងសារនៅលើបណ្ដាញសង្គមរបស់លោក ពេជ្រ មូន សាធារណជនបានសម្ដេងនូវការពេញចិត្ត និងអបអរសាទរដល់លោកជាច្រើនផងដែរ។ក្នុងនោះអ្នកប្រើប្រាសហ្វេសប៊ុកម្នាក់បានចូលសរសេរ Comment ថា «ជីដូនរបស់អ្នកពិតជាសប្បាយចិត្តណាស់ដែលឃើញចៅប្រុសរបស់គាត់ទទួលបានការអប់រំល្អ ពិតជាមានតែមួយគត់ក្នុងពិភពលោកជាមួយនឹងអំណោយដ៏ពិសេសនេះ»។
រីឯម្នាក់ទៀតបានបញ្ចេញមតិថា «អានប្រវត្តិពិតរបស់អ្នកហើយខ្ញុំពិតជារំភើបនិងអាណិតក្នុងចិត្ត។ ថ្ងៃនេះអ្នកអាចធ្វើបាន។ ការសម្រេចក្តីសុបិនដែលមិនមែនគ្រប់គ្នាអាចទៅដល់នោះទេ»។
ចំណែកអ្នកចូលComment ម្នាក់ទៀត បានសរសេរថា«ការងារនេះបង្ហាញយ៉ាងច្បាស់ថា កម្ពុជាអាចធ្វើបាន ហើយប្រទេសរបស់យើងពិតជាមិនចាញ់ប្រទេសដទៃទេ»។
នៅពេលទទួលបានការគាំទ្រពីជនរួមជាតិខ្មែរ លោក មូន សរសេរសារថ្លែងអំណរគុណដល់អ្នកគាំទ្រទាំងអស់ដោយបានរៀបរាប់ថា៖ «វាជាកិត្ដិយសរបស់ខ្ញុំបាទនិងគ្រួសារដែលបានទទួលសេចក្ដីស្រឡាញ់ពីបងប្អូន លោកពូ អ្នកមីង លោកយាយ លោកតា ដែលជាជនរួមជាតិខ្មែរ។ ខ្ញុំគ្មានអ្វីក្រៅពីលើកម្រាមដៃដប់ថ្លែងអំណរគុណចំពោះទឹកចិត្តដ៏ថ្លៃថ្លានេះឡើយ។ដោយឡែកខ្ញុំបាទក៏សូមអភ័យទោសដែលមិនបានឆ្លើយតបវិញទាន់ពេលព្រោលោកយាយមានសុខភាពមិនសូវល្អ ក្រោយធ្វើដំណើរវែងឆ្ងាយពីមាតុភូមិកម្ពុជា មកសហរដ្ឋអាមេរិក»៕
វីដេអូ៖
