លោក កឹម សុខា ពេលចេញពីសវនាការនាពេលកន្លងមក។ ហុង មិនា
ភ្នំពេញៈ សវនាការលើលោក កឹម សុខា ប្រធានអតីតគណបក្សសង្គ្រោះជាតិលើកទី៤៣ ពាក់ព័ន្ធនឹងការចោទប្រកាន់ពីបទ «សន្ទិដ្ឋភាពជាមួយរដ្ឋបរទេស ឬឃុបឃិតជាមួយបរទេស» ដើម្បីផ្តួលរំលំរាជរដ្ឋាភិបាលស្របច្បាប់» នៅព្រឹកថ្ងៃទី ៨ ខែមិថុនា គឺមានភាពតានតឹង ខណៈមេធាវីដើមបណ្តឹងការពារឱ្យរាជរដ្ឋាភិបាល និងតំណាងអយ្យការបានបន្តសួរដេញដោលលោក កឹម សុខា លើការធ្វើបាតុកម្ម នៅក្រោយការបោះឆ្នោតឆ្នាំ ២០១៣។
លោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញប្រាប់ ភ្នំពេញ ប៉ុស្តិ៍ ក្រោយបញ្ចប់សវនាការនៅថ្ងៃទី ៨ ខែមិថុនាថា ក្នុងសវនាការលើកនេះ មេធាវីដើមបណ្តឹង ការពារឱ្យរាជរដ្ឋាភិបាល និងតំណាងអយ្យការបានសួរដេញដោលជនជាប់ចោទ លោក កឹម សុខា ពីការដឹកនាំធ្វើបាតុកម្មប្រឆាំងទៅនឹងការបោះឆ្នោតឆ្នាំ ២០១៣។ ក្នុងសវនាការ លោក កឹម សុខា បានឆ្លើយតបទៅនឹងសំណួរដែលបានចោទសួរពាក់ព័ន្ធទៅនឹងការដឹកនាំធ្វើបាតុកម្ម ប៉ុន្តែលោកថា លោកមិនចាំអស់នោះទេ។ លោក ប្លង់ សុផល បានដកស្រង់សម្តីលោក កឹម សុខា ថា៖ «ច្រើនណាស់ ខ្ញុំ (កឹម សុខា) ចាំមិនបានទេ»។
លោក ចាន់ ចេន សហមេធាវី លោក កឹម សុខា ប្រាប់ភ្នំពេញប៉ុស្តិ៍តាមទូរស័ព្ទនៅថ្ងៃទី ៨ មិថុនាថា នៅក្នុងសវនាការ លើកទី ៤៣ នេះ សំណួររបស់អយ្យការ និងដើមបណ្តឹងរដ្ឋប្បវេណី គឺតែងតែសួរភ្ជាប់លោក កឹម សុខា ជាមួយនឹងលោក សម រង្ស៊ី ដែលមាននៅក្នុងវីដេអូ និងរូបភាព។
សំណួរទាំងអស់នេះបានឈានដល់របៀបវារៈថ្មី ដែលនិយាយពីប្រទូសរ៉ាយដែលមានការធ្វើបាតុកម្មនៅផ្លូវវេងស្រេងជាដើម។ លោកបន្តថា ទាំងលោក កឹម សុខា និងសហមេធាវី ក៏បញ្ជាក់ដែរថា សំណុំរឿងនេះ ត្រូវបានបំបែកចេញជា ២ រួចហើយ ប៉ុន្តែបើសិនតំណាងអយ្យការ និងមេធាវីដើមបណ្តឹងរដ្ឋប្បវេណីចង់សួរពាក់ព័ន្ធជាមួយនឹងលោក សម រង្ស៊ី អាចសួរទៅលោក សម រង្ស៊ី ទៅ។
លោកកត់សម្គាល់ថា ក្នុងសវនាការលើកនេះមានភាពតានតឹងរវាងលោក កឹម សុខា និងតំណាងអយ្យការ និងមេធាវីដើមបណ្តឹងរដ្ឋប្បវេណី។ លោកបញ្ជាក់ថា៖ «ឯកឧត្តម កឹម សុខា បានឆ្លើយសំណួរយ៉ាងច្រើនទៅនឹងតំណាងអយ្យការ និងមេធាវីដើមបណ្តឹងរដ្ឋប្បវេណី ប៉ុន្តែអ្វីជាការឆ្លើយរួម គឺឯកឧត្តម កឹម សុខា ឆ្លើយថា មិនគុំកួន មិនសងសឹក មិនយកខ្មែរណាធ្វើជាសត្រូវទាំងគណបក្សសិទ្ធិមនុស្ស និងគណបក្សសង្គ្រោះជាតិ គឺឱ្យប្រជាពលរដ្ឋចូលរួមបោះឆ្នោតជាក់ស្តែង គឺប្រជាពលរដ្ឋទៅបោះឆ្នោតច្រើនមែន»។
លោកបញ្ជាក់ថា ចុងក្រោយ លោក កឹម សុខា បានឱ្យចាក់វីដេអូមួយដែលនៅក្នុងខ្លឹមសារ ក្នុងវីដេអូនោះបញ្ជាក់ពីគោលជំហររបស់លោក កឹម សុខា គឺមិនគុំកួន មិនសងសឹក និងមិនយកខ្មែរណាជាសត្រូវរួបរួមគ្នា ដើម្បីអភិវឌ្ឍជាតិទាំងអស់គ្នា។
លោកថ្លែងថា៖ «តំណាងអយ្យការ និងមេធាវីដើមបណ្តឹងរដ្ឋប្បវេណី នៅតែព្យាយាមសួរនូវរូបភាព និងវីដេអូ ដែលឯកឧត្តម កឹម សុខា និងលោក សម រង្ស៊ី នៅក្បែរគ្នា ប៉ុន្តែឯកឧត្តម កឹម សុខា បានបញ្ជាក់យ៉ាងច្បាស់ហើយថា មិនមែនឈរក្បែរគ្នាជាការបង្ហាញពីទស្សនៈគាំទ្រទេ ព្រោះលោក សម រង្ស៊ី បានដើរចេញពីគោលការណ៍របស់គណបក្សសង្គ្រោះជាតិ»។
បើតាមលោក ចាន់ ចេន ក្រោយបញ្ចប់សវនាការ លោក កឹម សុខាបានទៅជួប អ្នកគាំទ្រលោក ដែលបានប្រមូលផ្តុំគ្នានៅឯគេហដ្ឋានរបស់លោកក្នុងខណ្ឌទួលគោកប្រមាណ ៣០០ នាក់៕
វីដេអូ៖
