ភ្នំពេញៈ ក្រសួងសុខាភិបាលហាមឃាត់ការចែកចាយ ឬលក់ឱសថ Antipruritic Cream ដែលក្រសួងចាត់ទុកថា គ្មានលេខបញ្ជិកាពីក្រសួងសុខាភិបាល បន្ទាប់ពីក្រសួងរកឃើញថា ឱសថនេះត្រូវបានផ្សព្វផ្សាយលក់លើបណ្តាញសង្គមហ្វេសប៊ុក។
ក្រសួងសុខាភិបាលបញ្ជាក់ក្នុងសេចក្តីជូនដំណឹងនៅថ្ងៃនេះថា មានគណនីហ្វេសប៊ុកឈ្មោះ Antipruritic Cream បានកំពុងផ្សព្វផ្សាយលក់ឱសថនេះគ្មានលេខទិដ្ឋាការ ឬបញ្ចិកា និងគ្មានច្បាប់អនុញ្ញាតឱ្យផ្សព្វផ្សាយពីក្រសួងសុខាភិបាលគិតត្រឹមថ្ងៃទី ៣១ ខែ ឧសភា ឆ្នាំ ២០២២។
ប្រភពដដែលបន្តថា តាមច្បាប់ គឺតម្រូវឱ្យរាល់ការចរាចរឱសថ ឬផលិតផលដែលមានគុណភាពក្នុងការបង្ការ ឬព្យាបាលជំងឺគ្រប់ប្រភេទនៅកម្ពុជាត្រូវមានលេខទិដ្ឋាការ ឬបញ្ជិកា ពីក្រសួងសុខាភិបាល ហើយរាល់ការផ្សព្វផ្សាយផលិតផលទាំងនេះត្រូវមានការអនុញ្ញាតពីក្រសួងសុខាភិបាល។
សេចក្តីជូនដំណឹងនេះបញ្ជាក់ថា៖ «ដើម្បីចៀសវាងការខាតបង់ប្រាក់កាស និងប៉ះពាល់ដល់សុខភាពអ្នកប្រើប្រាស់ទៀតនោះ ក្រសួងសុខាភិបាលសូមជូនព័ត៌មានដល់បងប្អូនប្រជាពលរដ្ឋទាំងអស់ ត្រូវបញ្ឈប់ការប្រើប្រាស់ ឱសថគ្មានលេខទិដ្ឋាការ ឬបញ្ចិកា ពីក្រសួងសុខាភិបាលខាងលើជាបន្តទៀត ព្រោះផលិតផលនេះ គ្មានប្រភពច្បាស់លាស់ ដែលមិនអាចធានាបាននូវគុណភាព និងសុវត្ថិភាពបានឡើយ»។
ក្រសួងសុខាភិបាលបញ្ជាក់ថា ក្រសួងនឹងមានវិធានការតឹងរ៉ឹងទៅតាមផ្លូវច្បាប់ចំពោះម្ចាស់គណនីហ្វេសប៊ុកនេះ និងអ្នកពាក់ព័ន្ធដទៃទៀត ដែលបាននិងកំពុងផ្សព្វផ្សាយលក់ឱសថនេះទៅតាមច្បាប់៕
